ଅର୍ଗସ ବ୍ୟୁରୋ : ବରଗଡ଼ରେ ଏଥର ପ୍ରସଙ୍ଗର ଲଢ଼େଇ, ଆଉ ପ୍ରସଙ୍ଗ ହେଉଛି ପରିବାରବାଦ । ୧୯୮୫ ମସିହାରୁ ବରଗଡ଼ରେ ଆଚାର୍ଯ୍ୟ ପରିବାରର ଦବଦବା । ପୂର୍ବରୁ ଜନତା ଦଳ ଏବଂ ଅସ୍ତିତ୍ବକୁ ଆସିବା ପରେ ବିଜେଡି ବରଗଡ଼ ନିର୍ବାଚନ ମଣ୍ଡଳୀରେ ଏହି ପରିବାରର ସଦସ୍ୟଙ୍କୁ ହିଁ କରିଛି ପ୍ରାର୍ଥୀ । ହେଲେ ଅଭିଯୋଗ ଦଶନ୍ଧି ଦଶନ୍ଧି ଧରି କ୍ଷମତା ଉପଭୋଗ କରିବା ପରେ ବି ବରଗଡ଼ ପ୍ରତି ଆଚାର୍ଯ୍ୟ ପରିବାରର ଅବଦାନ ନଗଣ୍ୟ ।
୧୯୯୦ ବିଧାନସଭା ନିର୍ବାଚନରେ ଜନତାଦଳ ଟିକେଟରେ ବିଜୟୀ ହୋଇଥିଲେ ପ୍ରସନ୍ନ ଆଚାର୍ଯ୍ୟ । ୧୯୯୫ରେ ପୁଣି ଜନତା ଦଳରୁ ଲଢ଼ି ବିଧାୟକ ହୋଇଥିଲେ ପ୍ରସନ୍ନ । ୨୦୦୦ ମସିହାରେ ବିଜେଡି ଟିକେଟରେ ଆନନ୍ଦ ଆଚାର୍ଯ୍ୟ ଜିତିଥିଲେ ନିର୍ବାଚନ । ୨୦୦୪ରେ ବି ପୁଣି ବିଜେଡିରୁ ଲଢ଼ି ଆନନ୍ଦ ଆଚାର୍ଯ୍ୟ ହୋଇଥିଲେ ବରଗଡ଼ର ବିଧାୟକ । ୨୦୦୯ରେ ବି ଆନନ୍ଦ ଆଚାର୍ଯ୍ୟଙ୍କୁ ଟିକେଟ ଦେଇଥିଲା ବିଜେଡି । କିନ୍ତୁ ସେ କଂଗ୍ରେସର ସାଧୁ ନେପାକଙ୍କଠାରୁ ପରାସ୍ତ ହୋଇଥିଲେ ।
ପରବର୍ତ୍ତୀ ଦୁଇଟି ନିର୍ବାଚନ ୨୦୧୪ ଓ ୧୯ ନିର୍ବାଚନରେ ବିଜେଡି ଟିକେଟରୁ ଲଢ଼ି ବିଜୟୀ ହେଲେ ଦେବେଶ ଆଚାର୍ଯ୍ୟ । ଏଥର ଲଗାତାର ତୃତୀୟ ଥର ଦେବେଶଙ୍କୁ ପ୍ରାର୍ଥୀ କରିଛି ବିଜେଡି । ଏପଟେ ୨୦୧୯ରେ ପ୍ରାୟ ୮ ହଜାର ଭୋଟରେ ପରାସ୍ତ ହୋଇଥିବା ଅଶ୍ବିନୀ ଷଡ଼ଙ୍ଗୀଙ୍କୁ ପୁଣି ଥରେ ମୈଦାନକୁ ଓହ୍ଲାଇଛି ଭାରତୀୟ ଜନତା ପାର୍ଟି । ୩ ଦଶନ୍ଧିର ପରିବାରବାଦ ବିରୋଧରେ ଲଢ଼େଇ ହେବ ବୋଲି କହିଛନ୍ତି ଅଶ୍ବିନୀ ।
ଅଧିକ ପଢନ୍ତୁ ଓଡ଼ିଶା ଖବର
ଆଚାର୍ଯ୍ୟ ପରିବାରର ୩ ଦଶନ୍ଧିର ଶାସନରେ ବରଗଡ଼ରେ କଣ ହୋଇଛି ବିକାଶ ? ଓଡ଼ିଶାର ଭାତହାଣ୍ଡି କୁହାଯାଉଥିବା ବରଗଡ଼ ଜିଲ୍ଲା ଦିନେ କଳ କାରଖାନା ଓ ଅନେକ ଗୁଡ଼ିଏ ଶିଳ୍ପରେ ଥିଲା ପରିପୂର୍ଣ୍ଣ । ସୂତାକାଳ, ସାରା କାରଖାନା, ଚିନି କଳ ସହିତ ଶତାଧିକ ଧାନ ମିଲ ଥିବା ବରଗଡ଼ ଏବେ ଧୀରେ ଧୀରେ ଶିଳ୍ପ ବିହୀନ ହେବାରେ ଲାଗିଛି । ରାସ୍ତାରୁ ନେଇ ପରିମଳ ସବୁଥିରେ ବରଗଡ଼ର ହାଲ୍ ବେହାଲ । ଗୋଟିଏ ପରେ ଗୋଟିଏ ନିର୍ବାଚନମଣ୍ଡଳୀରେ ବିଜୁ ଜନତା ଦଳ ଓ ଆଚାର୍ଯ୍ୟ ପରିବାର ଉପରେ ଆସ୍ଥାପ୍ରକଟ କରିଆସିଛନ୍ତି ବରଗଡ଼ବାସୀ । କିନ୍ତୁ ଏଥର ବିଜେପିର ବଢୁଥିବା ଶକ୍ତି ଓ ପରିବାରବାଦ ବିରୋଧରେ ଥିବା ଅସନ୍ତୋଷ ବରଗଡ଼ରେ ଆଣିବ କି ପରିବର୍ତ୍ତନର ଲହର ।