ଅର୍ଗସ ବ୍ୟୁରୋ:  ବିଜେଡି ନେତାଙ୍କୁ କାଉଣ୍ଟର କଲେ ବିଜେଡି ନେତା । କିଛି ବିଜେଡି ନେତା ପୁଣି ସରକାରକୁ ଫେରିବା ନେଇ ଦେଖୁଥିବା ଦିବାସ୍ଵପ୍ନ ଉପରେ ପାଣି ଢାଳି ଢାଳିଦେଲେ ବିଜେଡି ବିଧାୟକ ବଦ୍ରି ପାତ୍ର । କିଛି ଦିନ ହେବ କଂଗ୍ରେସ ସହ ମିଶି ବିଜେଡି ସରକାର କରିବ...୫ ବର୍ଷ ପୂର୍ବରୁ ବିଜେଡି ପୁଣି ସରକାରକୁ ଫେରିବ...ଆଉ ନବୀନ ପୁଣି ମୁଖ୍ୟମନ୍ତ୍ରୀ ହେବେ ବୋଲି ବୟାନବାଜି କରି ବେଶ ଚର୍ଚ୍ଚା ସାଉଁଟିଥିଲେ ବିଜେଡି ସାଂସଦ ଦେବାଶିଷ ସାମନ୍ତରାୟ ଓ ପୂର୍ବତନ ବିଜେଡି ବିଧାୟକ ଅତନୁ ସବ୍ୟସାଚୀ ନାୟକ । କବିସୂର୍ଯ୍ୟନଗରର ପୂର୍ବତନ ବିଧାୟିକା ବି କହିଥିଲେ ନବୀନ ପୁଣି ମୁଖ୍ୟମନ୍ତ୍ରୀ ହେବ ।

କିନ୍ତୁ ଏସବୁ କଥାର କୌଣସି ଯଥାର୍ଥତା ନାହିଁ ବୋଲି କହିଛନ୍ତି ବରିଷ୍ଠ ବିଜେଡି ବିଧାୟକ ବଦ୍ରି ପାତ୍ର । ସେ ଆହୁରି କହିଛନ୍ତି, ୫ ବର୍ଷ ପୂର୍ବରୁ ବିଜେଡ଼ି ପୁଣି ସରକାରକୁ ଫେରିବା ଅବାସ୍ତବ କଥା । ସଂଖ୍ୟା ଗରିଷ୍ଠତା ପାଇ ବିଜେପି ସରକାର କରିଛି । ତାପରେ ବି ବିଜେଡ଼ି କଂଗ୍ରେସ ସହିତ ମିଶି ସରକାର କରିବ ବୋଲି କହିବା ଅବାସ୍ତବ କଥା । ଆଉ ଏସବୁ ଅବାସ୍ତବ କଥା କହିବାକୁ ସେମାନେ ପ୍ରାଧିକୃତ କି ନାହିଁ ଜଣାନାହିଁ । ନବୀନ ବାବୁ ଏହା କହିବାକୁ ସେମାନଙ୍କୁ କହିଛନ୍ତି ନା ନାହିଁ ସେକଥା ଜଣାନାହିଁ । ଯେଉଁମାନେ କହୁଛନ୍ତି କଂଗ୍ରେସ ସହ ମିଶି ବିଜେଡି ପୁଣି ସରକାରକୁ ଆସିବ । ସେମାନଙ୍କର ମତି ବିଭ୍ରାଟ ହୋଇଛି  ବୋଲି କହିଛନ୍ତି ବଦ୍ରିପାତ୍ର।

ସେପଟେ ବଦ୍ରି ପାତ୍ରଙ୍କ କଟାକ୍ଷ ପରେ ବିଜେଡି ନେତାଙ୍କ କଟା ଘାଆରେ ଚୁନ ମାରିଛି ବିଜେପି । ଆସ୍କା ବିଧାୟକ ସରୋଜ ପାଢୀ କହିଛନ୍ତି, ବିଜେଡି ନେତା ମାନେ ଧର୍ଯ୍ୟହରା ହୋଇଯାଉଛନ୍ତି । ଶାସନରେ ଥିଲେ, ଯାହା ଚାହୁଁଥିଲେ ତାହା କରୁଥିଲେ । ଏବେ ହାରିଛନ୍ତି କିନ୍ତୁ ସେ ଅଭ୍ୟାସ ଯାଇନି । ତେବେ ୨୦୦୯ରେ କଂଗ୍ରେସ ସାଜିଥିଲା ନବୀନଙ୍କ ସଂଜୀବନୀ । ୨୦୦୯ରେ ବିଜେପି- ବିଜେଡି ମେଣ୍ଟ ଭାଙ୍ଗିବା ପରେ ବାହାରୁ ସମର୍ଥନ କରି ବିଜେଡି ସରକାରକୁ ବଞ୍ଚାଇଥିଲା କଂଗ୍ରେସ । ତେବେ ବର୍ତ୍ତମାନ ସ୍ଥିତିରେ କଂଗ୍ରେସ ସମର୍ଥନରେ ବିଜେଡି ସରକାର କରିବାର ସ୍ଵପ୍ନରେ କେତେ ବାସ୍ତବତା ଅଛି ଶୁଣନ୍ତୁ କଣ କହୁଛନ୍ତି ରାଜନୈତିକ ସମୀକ୍ଷକ ।

ନିକଟ ଅତୀତରେ ଦୁଇ ଜଣ ରାଜ୍ୟସଭା ସାଂସଦ ମମତା ମହାନ୍ତ ଓ ସୁଜିତ କୁମାର ବିଜେଡି ଛାଡି ବିଜେପିରେ ମିଶିଛନ୍ତି । ଆଗକୁ ଆହୁରି ରାଜ୍ୟସଭା ସାଂସଦ ଗୋଡ କାଢି ବସିଥିବା ଚର୍ଚ୍ଚା ହେଉଛି । ଆଉ ଏସବୁ ଭିତରେ ବିଜେଡିର ଭିତିରି ଅସନ୍ତୋଷ ଯେତେ ଲୁଚାଇଲେ ବି ଆଉ ଲୁଚି ପାନୁନି । ଆଉ ଅତନୁ, ଦେବାଶିଷଙ୍କ ଦମ୍ଭୋକ୍ତିକୁ ବଦ୍ରି ପାତ୍ରଙ୍କ ଭଳି ଜଣେ ବରିଷ୍ଠ ନେତା ଅବାସ୍ତବ କହିବା ବିଜେଡିର ଭବିଷ୍ୟତ ଉପରେ ପ୍ରଶ୍ନ ଚିହ୍ନ ଛିଡା କରିଛି ।