ଅର୍ଗସ ବ୍ୟୁରୋ: ସତ କହିଲେ ନବୀନ ସରକାରକୁ ଭାରି ବାଧୁଛି । ୨୪ ବର୍ଷର ଶାସନରେ କେମିତି ରାଜ୍ୟର ଉନ୍ନତି ହେବ ସେହି କଥା ଚିନ୍ତା ନକରି କେମିତି ରାଜ୍ୟର ଅବନତି ହେବ ସେଥିରେ ଭାରି ବ୍ୟସ୍ତ ବିଜେଡି ନେତା । ବଲାଙ୍ଗିର ପରି ପଛୁଆ ଜିଲ୍ଲାରେ କୋଟି କୋଟି ଟଙ୍କା ରାଜସ୍ଵ ଫାଙ୍କି ବେପାର ଚାଲିଥିଲା କିନ୍ତୁ କେମିତି ପୋଲିସ କି ପ୍ରଶାସନ ଜାଣିପାରିନଥିଲେ ତାହା ସନ୍ଦେହ ଘେରରେ । କିନ୍ତୁ ଏହି ଘଟଣାରୁ ଯେତେ ଚେଷ୍ଟା କଲେ ବି ହାତ ଝାଡିପାରୁନି ବିଜେଡି । କାରଣ ମନ୍ତ୍ରୀ ଓ ବିଧାୟକମାନେ ମଦର ଗୋଳିଆ ପାଣିରେ ଏମିତି ଫଶିଛନ୍ତି ଯେ ଯେତେ ଗୋଡ ଧୋଇଲେ ପଙ୍କ ଛାଡୁନି । ଆଉ ଟଙ୍କା କାରବାରକୁ ନେଇ ଯେତେବେଳେ ଦେଶର ପ୍ରଧାନମନ୍ତ୍ରୀ ଟ୍ଵିଟ କଲେ ସେତେବେଳେ ବିଜେଡି ନେତାଙ୍କ ଛାତିରେ ପଶିଛି ଛନକା ।
ଗୁରୁତ୍ଵପୂର୍ଣ୍ଣ କଥା ହେଲା ବିଜେଡି ନେତାଙ୍କ ଛତ୍ରଛାୟାରେ ମଦ ବେପାରୀ କୁବେର ହେଉଥିଲେ । ନିଶରେ ତେଲମାରି ସାଲିସ କରୁଥିଲା ପୋଲିସ । ହେଲେ ଆଇଟି ବିଭାଗ ରେଡ୍ ମାରିବା ପରେ ଏବେ ସାମ୍ନାକୁ ଆସିଲା ସତ । ପାଖାପାଖି ୩୪୮ କୋଟି ଟଙ୍କା ମିଳିବା ପରେ ରାଜ୍ୟ ରାଜନୀତିରେ ଜୋର ଧରିଛି ଚର୍ଚ୍ଚା । ବଲାଙ୍ଗିରରୁ କେବଳ ୩୦୫ କୋଟି ମିଳିଥିବା ବେଳେ ଟିଟିଲାଗଡ଼ରୁ ୧୧ କୋଟି ଓ ସମ୍ବଲପୁରରୁ ମିଳିଛି ୩୭ କୋଟି ୫୦ ଲକ୍ଷ ।
ବଲାଙ୍ଗିରରୁ ଟଙ୍କା ରେଡ୍ ହେବା ପରେ ବିଜେଡିକୁ କାଠ ଗଡାକୁ ଟାଣିଛି ବିଜେପି । ନୀଳଗିରିର ବିଧାୟକ ସୁକାନ୍ତ ନାୟକ ସିଧାସିଧା କଂଗ୍ରେସର କଳାକାରନାମା କଥା କହିବା ସହ ହାତ ଓ ଶଙ୍ଖ ଭିତରେ କେମିତି ଭିତିରିଆ ସମ୍ପର୍କ ରହିଛି ସେ କଥା ବି କହିଛନ୍ତି । କେବଳ ଏତିକି ନୁହେଁ ବରଂ ଆଗାମୀ ନିର୍ବାଚନରେ ବିଜେଡି ଏହି ଟଙ୍କା ବ୍ୟବହାର କରିଥାଆନ୍ତା, କଂଗ୍ରେସ ସାଂସଦ ଧୀରଜ ସାହୁଙ୍କ ସଂପୃକ୍ତି ବି ଥିଲା । ଏମିତି ସଙ୍ଗୀନ ଅଭିଯୋଗ ଆଣିଛି ବିଜେପି । ସେପଟେ ପୂରା ଘଟଣାରେ କିନ୍ତୁ ଉଭୟ କଂଗ୍ରେସ କିମ୍ବା ବିଜେଡି ନେତାଙ୍କ ପ୍ରତିକ୍ରିୟା ଆମର ହସ୍ତଗତ ହୋଇନାହିଁ ।