ଅର୍ଗସ ବ୍ୟୁରୋ : ଡଙ୍କାରୀକୁ ନେଇ ଥମୁନି ଚର୍ଚ୍ଚା । କାରଣ ଦୁର୍ନୀତି ଏତେ ମାତ୍ରାରେ ହୋଇଛି ଯେ ଆଖି ତରାଟି ଯାଉଛି । ଖାସ୍ କରି ଡଙ୍କାରୀ, ବିଛାଖଣ୍ଡି, ରାହାଡପୁର, ଆରୁହା, ଲୁଣିବର, ବାଜବାଟି ପରି ଅଞ୍ଚଳରୁ କଳାପଥର ଲୁଟି ଲୁଟେରା ହେଉଛନ୍ତି ମାଲେମାଲେ । ଆଉ ଖାଦାନରେ ବେଆଇନ୍ ବିସ୍ପୋରଣ କରାଇ ନେଇ ଚାଲିଛନ୍ତି ଗୋଟିଏ ପରେ ଗୋଟିଏ ମୁଣ୍ଡ । ଯାହା ଏବେ ରାଜ୍ୟ ରାଜନୀତିରେ ସୃଷ୍ଟି କଲାଣି ଝଡ ।
ଧର୍ମଶାଳାରେ ବେଆଇନ୍ ଭାବେ ଲୁଟ୍ ହେଉଛି କଳାପଥର । ଏହି ଲୁଟ୍ ଫଳରେ ମାଲାମାଲ୍ ହେଉଛନ୍ତି ଯାଜପୁରର ୩ ପ୍ରଭାବଶାଳୀ ଓ ପ୍ରତିପତ୍ତିଶାଳୀ ରାଜନୈତିକ ପରିବାର । ଅନ୍ୟପଟେ ପଥର ତଳେ ଯାଉଛି ଗରିବ ଶ୍ରମିକଙ୍କ ଜୀବନ । ଖାଦାନରେ କାମ କରୁଥିବା ଶ୍ରମିକଙ୍କ ପାଇଁ କାହାରି ଦୟା ନାହିଁ କି ମାୟା ନାହିଁ । ଏ ଯାଏଁ ଡଙ୍କାରୀରେ ମୃତ ଶ୍ରମିକଙ୍କୁ ସହାୟତା ମିଳିନଥିବାବେଳେ କେବେ ବେଆଇନ ଲୁଟ୍ ବନ୍ଦ ହେବ ଏବଂ କେବେ ଲୁଟେରାଙ୍କଠାରୁ ଆଦାୟ ହେବ ଜରିମାନା ତାହା ସବୁଠାରୁ ବଡ଼ ପ୍ରଶ୍ନ ।
ସୂଚନା ଅଧିକାର ଆଇନ୍ ବଳରେ ମିଳିଥିବା ଏହି ତଥ୍ୟ ଉପରେ । ନିକଟରେ ଡଙ୍କାରୀରେ ହୋଇଥିବା ବିସ୍ପୋରଣରେ ରାଜ୍ୟ ବାହାରର ଜଣଙ୍କର ଆଉ ରାଜ୍ୟ ଭିତରରେ ଦୁଇଜଣଙ୍କ ଜୀବନ ଯାଇଥିବା କଥା ପ୍ରଶାସନ ସ୍ୱୀକାର କରିଛନ୍ତି । ହେଲେ ମୃତ ଶ୍ରମିକଙ୍କ ପରିବାରକୁ କଣ ସହାୟତା ମିଳିଲା ତାହା କିନ୍ତୁ କାହାକୁ ଜଣାନାହିଁ । ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ ଧର୍ମଶାଳାର ପୂର୍ବତନ ବିଧାୟକ ପ୍ରଣବ ବଳବନ୍ତରାୟ ଓ ତାଙ୍କ ଭାଇ ବ୍ଲକ ଚେୟାରମ୍ୟାନ୍ ପ୍ରଭାତ ବଳବନ୍ତରାୟଙ୍କ ଚାପରେ ସବୁ ମାମଲାକୁ ଚାପି ଦିଆଯାଉଛି । ପ୍ରତିଦିନ କଳାପଥର ତଳେ ବହୁ ଲୋକଙ୍କର ଜୀବନ ଯାଉଥିବା ବେଳେ ଏହା କିନ୍ତୁ ପ୍ରଶାସନର ଆଢୁଆଳରେ ରହିଯାଉଛି ।
ଖଣି-ଖାଦାନରେ ଭରା ଯାଜପୁର ଜିଲ୍ଲା । ହେଲେ ଯାଜପୁରର ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସ, ଧର୍ମଶାଳାର ପୂର୍ବତନ ବିଧାୟକ ପ୍ରଣବ ବଳବନ୍ତରାୟ ଓ ସୁକିନ୍ଦାର ପୂର୍ବତନ ବିଧାୟକ ପ୍ରୀତିରଞ୍ଜନ ଘଡେଇ ମନଇଚ୍ଛା ଦୁର୍ନୀତି କରିଥିବା ନେଇ ସଙ୍ଗୀନ ଓ ସାଙ୍ଘାତିକ ଅଭିଯୋଗ ହେଲାଣି । ଶାସନ କ୍ଷମତାରେ ରହିଥିବା ସମୟରେ କଳାପଥର ଲୁଟ ଓ ଖଣି ଲୁଟକୁ ପ୍ରୋତ୍ସାହନ ଦେଇ ଆସୁଥିବା ଅଭିଯୋଗ ହୋଇ ଆସୁଥିଲା ଏହି ୩ ପରିବାର ବିରୋଧରେ । ଏବେ ଧର୍ମଶାଳାର ନବାଗତ ବିଧାୟକ ହିମାଶୁଂ ଶେଖର ସାହୁଙ୍କ ଚିଠି ପରେ ଖଣି ବିଭାଗ ହଠାତ୍ ଆକ୍ଟିଭ ହୋଇଯିବା । ଖଣି ଅଞ୍ଚଳରେ ବିଧାୟକଙ୍କ ସହ ପ୍ରଶାସନିକ ଅଧିକାରୀ ଯାଇ ତଦନ୍ତ କରିବା ପରେ ଏବେ ସାଧାରଣରେ ଅନେକ ପ୍ରଶ୍ନ ଉଠିଛି । ବିଗତ ଦିନରେ ଯେଉଁ ଖଣିମାଫିଆଙ୍କ ଉପରେ ଫାଇନ୍ ଲଗାଯାଇଥିଲା ତାହା ଆଦାୟ ହେବ ତ ? ଦୋଷୀଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ହେବ ତ ? କିଛି ଏମିତି ଚର୍ଚ୍ଚା ଭିତରେ କିନ୍ତୁ ଅଭିଯୋଗ ଯେଉଁ ନେତାଙ୍କ ବିରୋଧରେ ଆସିଛି ସେମାନଙ୍କର କୌଣସି ପ୍ରତିକ୍ରିୟା ଆମର ହସ୍ତଗତ ହୋଇନାହିଁ ।