ଅର୍ଗସ ବ୍ୟୁରୋ : ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଆଜି ଅବପାତର ରୂପ ନେଇଛି । ପାରାଦ୍ୱୀପ ଠାରୁ ଦକ୍ଷିଣପୂର୍ବ ଦିଗରେ ୭୩୦ କି.ମି ଦୂରରେ କେନ୍ଦ୍ରୀଭୂତଜ ଅଛି । ଧୀରେ ଧୀରେ ସମୁଦ୍ର ଭିତରେ ବଳ ଗୋଟାଇ ଆସନ୍ତାକାଲି ସକାଳେ ବାତ୍ୟାର ରୂପ ନେବ । ଆଉ ୨୪ ରାତି କିମ୍ବା ୨୫ ପାହାନ୍ତିରେ ପ୍ରବଳରୁ ଅତିପ୍ରବଳ ବର୍ଷା ହେବା ସହିତ ଉପକୂଳରେ ତାଣ୍ଡବ କରିବ ବୋଲି ପାଣିପାଗ ବିଭାଗର ପୂର୍ବାନୁମାନ ପରେ ଏବେ ଉପକୂଳିଆବାସୀ ଛନକା ।
ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ପୁରୀରୁ ପଶ୍ଚିମ ବଙ୍ଗର ସାଗର ଦ୍ଵୀପ ମଧ୍ୟରେ ଅତିକ୍ରମ କଲା ବେଳକୁ ପବନର ବେଗ ୧୨୦ କିଲୋମିଟର ପାଖାପାଖି ଯିବ ବୋଲି ପୂର୍ବାନୁମାନ କରିଛନ୍ତି ଆଇଏମଡି ଡିଜି । ଏଣେ ୨୪ ଓ ୨୫ ଦୁଇ ଦିନ ଧରି ଓଡ଼ିଶା ଉପକୂଳରେ ପ୍ରବଳ ବର୍ଷା ନେଇ ଚେତାଇଛି ଆଞ୍ଚଳିକ ପାଣିପାଗ କେନ୍ଦ୍ର ।
ସମ୍ଭାବ୍ୟ ବାତ୍ୟାର ଗତିପଥ ନେଇ IMD ମହାନିର୍ଦ୍ଦେଶକ ଡକ୍ଟର ମୃତ୍ୟୁଞ୍ଜୟ ମହାପାତ୍ର କହିଛନ୍ତି- ବାତ୍ୟା ଉତ୍ତର ଓଡ଼ିଶାକୁ କୋପ ଦେଖାଇବା ସମ୍ଭାବନା ଅଧିକ । ପୂର୍ବ- କେନ୍ଦ୍ରୀୟ ବଙ୍ଗୋପ ସାଗରରେ ଏବେ ସୁଦୃଶ୍ୟ ଅବପାତ ସ୍ଥିତିରେ ରହିଥିବା ବେଳେ ଆସନ୍ତାକାଲି ସକାଳେ ବାତ୍ୟାର ରୂପ ନେବ । ୨୪ ରାତିରୁ ୨୫ ଭୋର୍ ମଧ୍ୟରେ ଏହା ଭୀଷଣ ବାତ୍ୟା ରୂପ ନେଇ ସ୍ଥଳଭାଗ ଛୁଇଁଲା ବେଳକୁ ପବନର ବେଗ ଘଣ୍ଟା ପ୍ରତି ୧୦୦ରୁ ୧୨୦ କିଲୋମିଟର ରହିବା ଅନୁମାନ କରାଯାଉଛି । ବାତ୍ୟା ପ୍ରଭାବରେ ଭଦ୍ରକ ଓ ବାଲେଶ୍ଵରରେ ସମୁଦ୍ର ଅଧିକ ଜୁଆରିଆ ହେବା ସହିତ ପ୍ରବଳ ବର୍ଷାର ପୂର୍ବାନୁମାନ କରାଯାଇଛି । ସେପଟେ ବାତ୍ୟା ପ୍ରଭାବରେ ୭ ଜିଲ୍ଲାକୁ ରେଡ୍ ୱାର୍ଣ୍ଣିଂ ଜାରି କରାଯାଇଛି । ୨୪ରେ ଯେଉଁ ୭ ଜିଲ୍ଲାକୁ ରେଡ୍ ଆଲର୍ଟ ଜାରି ହୋଇଛି-ସେଗୁଡ଼ିକ ହେଲା ମୟୂରଭଞ୍ଜ, ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର, ଯାଜପୁର ଓ କଟକ । ସେମିତି ୨୫ରେ କେନ୍ଦୁଝର, ଭଦ୍ରକ, ବାଲେଶ୍ୱର ଓ ମୟୂରଭଞ୍ଜ ଜିଲ୍ଲାକୁ ଜାରି ହୋଇଛି ରେଡ୍ ୱାର୍ଣ୍ଣିଂ ।
ବାତ୍ୟା ପାଇଁ ୨୫ ତାରିଖ ପର୍ଯ୍ୟନ୍ତ ସମୁଦ୍ର ମଧ୍ୟକୁ ମତ୍ସ୍ୟଜୀବୀଙ୍କୁ ବାରଣ କରାଯାଇଛି । ବାତ୍ୟା ପ୍ରଭାବରେ ପବନର ବେଗ ଅଧିକ ରହିବ । ୨୨ ତାରିଖରେ ପ୍ରାୟ ଘଣ୍ଟାପ୍ରତି ୫୫ ରୁ ୬୫ ସର୍ବାଧିକ ୭୫ କିଲୋମିଟର ବେଗ ରହିବ । ୨୩ ତାରିଖରେ ଘଣ୍ଟାପ୍ରତି ୮୦ ରୁ ୯୦ ସର୍ବାଧିକ ୧୦୦ କିଲୋମିଟର ଏବଂ ୨୪ ତାରିଖରେ ଘଣ୍ଟାପ୍ରତି ୧୦୦ ରୁ ୧୧୦ ସର୍ବାଧିକ ୧୨୦ କିଲୋମିଟର ରହିବା ନେଇ ପୂର୍ବାନୁମାନ କରିଛି ପାଣିପାଗ କେନ୍ଦ୍ର ।