ଅର୍ଗସ ବ୍ୟୁରୋ: ପାୱାରରେ ଥିଲାବେଳେ ପ୍ରଥମେ ମନ୍ତ୍ରୀଙ୍କ ଲାଗି ଉଦ୍ଦିଷ୍ଟ କ୍ବାର୍ଟର୍ସ ଦଖଲ କଲେ, ପରେ ସେଥିରେ କୋଟି କୋଟି ଟଙ୍କାର ବିଳାସପୂର୍ଣ୍ଣ ନିର୍ମାଣ ଏବଂ ଏବେ ସବୁ ଲୁଚାଇବାକୁ ଧ୍ୱଂସ କରିବାକୁ ଉଦ୍ୟମ କଲେ । ବିଜେଡିର ପୂର୍ବତନ ବିଧାୟକ ତଥା ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ଏଭଳି କାରସାଦିର ଗୋଟିଏ ପରେ ଗୋଟିଏ ଗୁମର ଖୋଲୁଛି । ଖାଲି ଗୁମର ଖୋଲୁଛି ତାହା ନୁହେଁ ବରଂ ବବିଙ୍କ ବିରୋଧରେ ତୁରନ୍ତ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଦାବି ବି ଜୋର ଧରିଲାଣି ।
ସରକାରରେ ଦଳ ଥିଲା ବେଳେ ଗୋଟିଏ ପରେ ଗୋଟିଏ ଦୁର୍ନୀତି କରୁଥିଲେ ବବି । ଖାଲି ଦୁର୍ନୀତି କରିଥିଲେ ତାହା ନୁହେଁ ବରଂ କୋଟି କୋଟି ଟଙ୍କାର ଅର୍ଥ ବି ହଡପ କରିଥିଲେ । ସାଧାରଣ ବିଧାୟକ ଥିବା ପରେ ବି ମନ୍ତ୍ରୀ ଓ ଆଇଏଏସଙ୍କ ପାଇଁ ଉଦ୍ଦିଷ୍ଟ ଥିବା କ୍ୱାର୍ଟର୍ସ ପାଇଥିଲେ । ସରକାରୀ ଜାଗାରେ ନିର୍ମାଣ କରିଥିଲେ କୋଟି କୋଟି ଟଙ୍କାର ବେଆଇନ୍ ନିର୍ମାଣ । ଆଉ ଏବେ, ସରକାରଙ୍କ ବିନା ଅନୁମତିରେ ସରକାରୀ ସଂପତ୍ତିର ମନଇଛା ଧ୍ୱଂସ । ବିଜେଡିର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ଏଭଳି କାରସାଦି ବିରୋଧରେ କି କାର୍ଯ୍ୟାନୁଷ୍ଠାନ ହେବ ? ତାହାକୁ ନେଇ ଏବେ ଚର୍ଚ୍ଚା ଜୋର ।
ଖୁଲମଖୁଲା ବିଡିଏ ରୁଲ୍ ଉଲ୍ଲଂଘନ କରିଛନ୍ତି କି ପ୍ରଣବ ? ଖାଲି ନିୟମ ଭଙ୍ଗ କରିଛନ୍ତି ତାହା ନୁହେଁ ବରଂ ସରକାରୀ ଜମି ନଷ୍ଟ, ଅର୍ଥ ତୋଷାରପାତ, ଠକେଇ ଅଭିଯୋଗରେ ତାଙ୍କ ନାଁରେ କ୍ରିମିନାଲ କେସ୍ ବି ହୋଇପାରେ । କାରଣ, କ୍ୱାର୍ଟରର ମାଲିକ ସରକାର । ପ୍ରଣବ ଭଡାଟିଆଙ୍କ ଭଳି ରହୁଥିଲେ । ଯଦି କ୍ୱାର୍ଟରରେ ପ୍ରଣବ ନିଜ ପାଇଁ କିଛି ନିର୍ମାଣ କରିଛନ୍ତି, ତେବେ ତାହା ସରକାରୀ ଜମିରେ ହୋଇଥିବାରୁ ତାର ମାଲିକ ସରକାର । କେବଳ ଘରର ଆସବାବପତ୍ର ତାଙ୍କର । ଭଡାଟିଆଙ୍କ କର୍ତ୍ତୃତ୍ୱ ନାହିଁ ଘର ଭାଙ୍ଗିବାକୁ । ଯାହା କରିବେ କେବଳ ସରକାର ହିଁ କରିବେ ।
ଗୁରୁତ୍ଵପୂର୍ଣ୍ଣ କଥା ହେଲା, ସରକାରୀ କ୍ଵାର୍ଟର୍ସକୁ ନେଇ ବିବାଦ ଘେରରେ ଛନ୍ଦି ହୋଇ ଯାଇଛନ୍ତି ପ୍ରଣବ ପ୍ରକାଶ ଦାସ । ନିଜ ଦୋଷ ଲୁଚାଇବାକୁ ଗୋଟିଏ ପରେ ଗୋଟିଏ ଭୁଲ କରୁଛନ୍ତି ବିଜେଡି ନେତା । ତେବେ କାର୍ଯ୍ୟାନୁଷ୍ଠାନ କେବେ ହେବ ତାହାକୁ ଅପେକ୍ଷା ।