ଭୁବନେଶ୍ୱର: ବାତ୍ୟା ଗଲାପରେ ବଢିଯାଇଛି ଚାଷୀଙ୍କ ଚିନ୍ତା । ଧାନରୁ ପରିବା ସବୁ ବରବାଦ ହୋଇଛି । ରାଜ୍ୟରେ ୭୯ ହଜାର ୬୭୧ ହେକ୍ଟର ଚାଷ ଜମି ପ୍ରଭାବିତ ହୋଇଛି । ତୁରନ୍ତ କ୍ଷୟକ୍ଷତି ରିପୋର୍ଟ ଦେବାକୁ ବିଭାଗୀୟ ଅଧିକାରୀଙ୍କୁ ସରକାର ନିର୍ଦ୍ଦେଶ ଦେଇଛନ୍ତି । ହେକ୍ଟର ପିଛା ସର୍ବନିମ୍ନ ହାଜରେରୁ ସର୍ବାଧିକ ୨୨ ହଜାର ୫୦୦ ଟଙ୍କା ଯାଏ ମିଳିବ କ୍ଷତିପୂରଣ ।...
ବାତ୍ୟାକୁ ଦୁଇ ଦିନ ବିତିଲାଣି । ହେଲେ ଏବେ ବି ଜଳାର୍ଣ୍ଣବ ଚାଷଜମି, ଚଷାପୁଅର ଆଖି । ଦେଖିଲାବାଲାଙ୍କ ପାଇଁ ଇଏ ଉଜୁଡ଼ା ଫସଲ, ପଚିସଢ଼ି ଯାଇଥିବା ଧାନ, ଭେଣ୍ଡି, କାକୁଡ଼ି ଆଦି ପନିପରିବା ହୋଇଥାଇପାରେ । ହେଲେ ଦେହକୁ ମାଟି ଆଉ ରକ୍ତକୁ ଝାଳ କରି କ୍ଷେତରେ ସବୁଜିମାର ସ୍ବପ୍ନ ବୁଣିଥିବା ଚାଷୀଟିଏ ପାଇଁ ଇଏ ମୁଣ୍ଡ ଉପରେ ଅକାଳ ଚଡ଼କ ଠାରୁ କିଛି କମ୍ ନୁହେଁ । କେନ୍ଦ୍ରାପଡ଼ା, ଭଦ୍ରକ, ବାଲେଶ୍ବର , କେନ୍ଦୁଝର, ପୁରୀ । ଆଉ କେଇଟା ଦିନ ପରେ ସବୁଠି ଫସଲ ଅମଳ ହୋଇଥାନ୍ତା । ଚାଷୀ ମୁହଁରେ ହସ ଫୁଟିଥାନ୍ତା । ହେଲେ ସବୁ ଖିନଭିନ୍ କରିଦେଇଛି ଅକ୍ଟୋବରର ବାତ୍ୟା । ଦାନା ଛଡ଼ାଇ ନେଇ ଦାନା ଦେଇଯାଇଛି ଦାରୁଣ ଦୁଃଖ । ବହୁଳ ଚାଷ ହେଉଥିବା ବାଲେଶ୍ବର ଜିଲ୍ଲାର ବାଲିଆପାଳ, ଜଳେଶ୍ବର, ରେମୁଣା, ଭୋଗରାଇ ଓ ନୀଳଗିରି ବ୍ଲକ, ଭଦ୍ରକ ଜିଲ୍ଲାର ବାସୁଦେବପୁର, ତିହିଡ଼ି ଓ ଚାନ୍ଦବାଲି ବ୍ଲକ, କେନ୍ଦ୍ରାପଡ଼ାର ମହାକାଳପଡ଼ା, ଆଳି, ରାଜକନିକା ବ୍ଲକ ଏବଂ ପୁରୀ ପିପିଲର ଅନେକ ସ୍ଥାନରେ ହଜାର ହଜାର ଏକର ଧାନ ଆଉ ପରିବା କିଆରି ଏବେ ଶ୍ମଶାନ ପାଲଟିଛି । କେଉଁଠି ଧାନ କିଆରି ଉପରେ ଆଣ୍ଠୁଏ ଆଣ୍ଠୁଏ ପାଣି ତ ଆଉ କେଉଠି ପାଣିରେ ପଡ଼ି ପଚିଯାଇଛି ଧାନଗଛ । ତେଣୁ ଏବେ ସରକାରୀ ହାତଟେକା ଅପେକ୍ଷାରେ ଚାଷୀ ।
ସେପଟେ କୃଷି ଭବନରେ ବରିଷ୍ଠ ଅଧିକାରୀଙ୍କୁ ଧରି ଆଜି ଚାଷୀଙ୍କ କ୍ଷୟକ୍ଷତିର ସମୀକ୍ଷା କରିଛନ୍ତି କୃଷି ବିଭାଗର ମୁଖିଆ ଉପମୁଖ୍ୟମନ୍ତ୍ରୀ କେ.ଭି. ସିଂହଦେଓ । ଦାନା ପ୍ରଭାବିତ ଜିଲ୍ଲାର ଅଫିସରମାନେ ବି ଏହି ବୈଠକରେ ସାମିଲ ହୋଇଛନ୍ତି । ତେବେ ପ୍ରାଥମିକ ଆକଳନ ରିପୋର୍ଟ ଅନୁଯାୟୀ, ରାଜ୍ୟରେ 79 ହଜାର 671 ହେକ୍ଟର ଚାଷ ଜମି ପ୍ରଭାବିତ ହୋଇଛି । 1 ଲକ୍ଷ 99 ହଜାର 177 ଏକର ଜମିରେ ଚାଷ କ୍ଷତିଗ୍ରସ୍ତ ହୋଇଛି । କେନ୍ଦ୍ରାପଡ଼ାରେ 23 ହଜାର ହେକ୍ଟର ଜମି କ୍ଷତିଗ୍ରସ୍ତ ହୋଇଛି । ଭଦ୍ରକରେ 24 ହଜାର 115 ହେକ୍ଟର ଜମି କ୍ଷତିଗ୍ରସ୍ତ ହୋଇଛି । ବାଲେଶ୍ବରରେ 3140 ହେକ୍ଟର ଜମି କ୍ଷତିଗ୍ରସ୍ତ ହୋଇଛି । ସେହିପରି ମୟୂରଭଞ୍ଜରେ ମୋଟ 2381, ଯାଜପୁରରେ 2709 ଓ ଜଗତସିଂହପୁର 2498 ହେକ୍ଟର ଜମି କ୍ଷତିଗ୍ରସ୍ତ ହୋଇଛି । ବର୍ଷା କମିଲା ପରେ ଫିଲଡ଼କୁ ଯାଇ ଜିଓ ଟେଗିଙ୍ଗ କରି ସରକାରଙ୍କୁ ରିପୋର୍ଟ ଦେବା ପାଇଁ ନିର୍ଦ୍ଦେଶ ଦିଆଯାଇଥିବା କହିଛନ୍ତି କେ.ଭି । SRCଙ୍କ ନୂଆ ଗାଇଡଲାଇନ ଅନୁଯାୟୀ DBT ମାଧ୍ୟମରେ ଲୋକଙ୍କୁ କ୍ଷତି ପୂରଣ ଦିଆଯିବ । ଭୁଲ ରିପୋର୍ଟ ନଦେବା ପାଇଁ ସତର୍କ କରାଇଛନ୍ତି ଉପମୁଖ୍ୟମନ୍ତ୍ରୀ ।
କ୍ଷତିପୂରଣ ନେଇ ମଧ୍ୟ ଫିଗର୍ କ୍ଲିଅର କରିଛନ୍ତି ସରକାର । ଅଧା ହେକ୍ଟର ଚାଷ ଜମିରେ ଫସଲ ନଷ୍ଟ ହୋଇଥିଲେ ମିଳିବ ୪ ହଜାର ୨୦୦ ଟଙ୍କାର ସହାୟତା । ଜଳସେଚିତ ଜମିରେ ଫସଲ ନଷ୍ଟ ହୋଇଥିଲେ ହେକ୍ଟର ପିଛା ୧୭ ହଜାର ଏବଂ ସେହି ଜମିରେ ଛୋଟ ଚାଷୀଙ୍କୁ ସର୍ବନିମ୍ନ ୨ ହଜାର ଟଙ୍କା ଦେବେ ସରକାର । ଆଗ୍ରୋ ଫରେଷ୍ଟ ବା ପ୍ଲାଟେସନ ଚାଷ ନଷ୍ଟ ହୋଇଥିଲେ ହେକ୍ଟର ପିଛା ୨୨ ହଜାର ୫୦୦ ଟଙ୍କା ଏବଂ ଅତି କମରେ ୨ ହଜାର ୫୦୦ ଟଙ୍କା ଦେବେ ସରକାର । ଅଳ୍ପ କିଛି କ୍ଷତି ହୋଇଥିଲେ ଚାଷୀଙ୍କୁ ସର୍ବନିମ୍ନ ହଜାରେ ଟଙ୍କା କ୍ଷତିପୂରଣ ଦିଆଯିବ ବୋଲି କୃଷି ସଚିବ ଅରବିନ୍ଦ ପାଢ଼ୀ ସ୍ପଷ୍ଟ କରିଛନ୍ତି । ଦାନା ସବୁଠୁ ଜୋର ପାହାର ପକାଇଛି ବର୍ଷକର ଦାନା ଉପରେ । ଚାଷୀଙ୍କ ଅଣ୍ଟା ଭାଙ୍ଗିଛି । ତେଣୁ ସରକାର ଖୁବଶୀଘ୍ର ଚାଷୀଙ୍କୁ ସହାୟତା ଯୋଗାଇବାର ଆବଶ୍ୟକତା ରହିଛି ।
ଅଧିକ ପଢନ୍ତୁ ଓଡିଶା ଖବର