ଅର୍ଗସ ବ୍ୟୁରୋ: ଦିଲ୍ଲୀରେ ରାଜନୈତିକ ଅସ୍ଥିରତା ତୀବ୍ର ହୋଇଛି। ହରିୟାଣା ନିର୍ବାଚନ ପୂର୍ବରୁ ଅରବିନ୍ଦ କେଜରିୱାଲ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାକୁ ଯାଉଛନ୍ତି। ସେପ୍ଟେମ୍ବର ୧୭ରେ ଅରବିନ୍ଦ କେଜରିୱାଲ ଦିଲ୍ଲୀର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବେ। ରବିବାର ଅରବିନ୍ଦ କେଜରିୱାଲ ଏହା ଘୋଷଣା କରିଛନ୍ତି। ସେ କହିଛନ୍ତି ଯେ ସେ ଜନସାଧାରଣଙ୍କଠାରୁ ସଚ୍ଚୋଟତାର ପ୍ରମାଣପତ୍ର ନ ପାଇବା ପର୍ଯ୍ୟନ୍ତ ସେ ମୁଖ୍ୟମନ୍ତ୍ରୀ ପଦରେ ବସିବେ ନାହିଁ। ସେ ତିହାର ଜେଲରୁ ଜାମିନରେ ଆସିବା ମାତ୍ରେ ଇସ୍ତଫା ଘୋଷଣା କରିବା ସହ ଶୀଘ୍ର ନିର୍ବାଚନ ଦାବି କରି ରାଜନୈତିକ ତାପମାତ୍ରା ବଢାଇଥିଲେ। ଏବେ ଦିଲ୍ଲୀର ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବେ ସେନେଇ କଳ୍ପନାଜଳ୍ପନାର ବଜାର ଗରମ ହୋଇଛି। ଦିଲ୍ଲୀର ମଦ ଦୁର୍ନୀତି ମାମଲାରେ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ଅରବିନ୍ଦ କେଜରିୱାଲ ଜାମିନରେ ଅଛନ୍ତି।
ଇସ୍ତଫା ଘୋଷଣା କରି ଅରବିନ୍ଦ କେଜରିୱାଲ ଏକ ବଡ଼ ରାଜନୈତିକ ଜୁଆ ଖେଳିଛନ୍ତି। ତାଙ୍କ ଇସ୍ତଫା ପରେ ଦିଲ୍ଲୀର ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବେ ସେନେଇ ସନ୍ଦେହ ଜାରି ରହିଛି। କୌତୁହଳର ବିଷୟ, ସେ ଜେଲରେ ଥିବାବେଳେ ସେ ଏହି ନିଷ୍ପତ୍ତି ନେଇ ନ ଥିଲେ, କିନ୍ତୁ ଜାମିନରୁ ଜେଲରୁ ବାହାରିବା ମାତ୍ରେ ତାଙ୍କ ନିଷ୍ପତ୍ତି ଆଶ୍ଚର୍ଯ୍ୟ କରିଛି। ଏହା ପଛରେ ତାଙ୍କର ନିଜର ରାଜନୈତିକ ଉଦ୍ଦେଶ୍ୟ ରହିଛି। ସେ ଏକାସାଙ୍ଗରେ ଅନେକ ଉଦ୍ଦେଶ୍ୟ ହାସଲ କରିବାକୁ ଚାହୁଁଛନ୍ତି। ଗୋଟିଏ ପଟେ ହରିୟାଣା ବିଧାନସଭା ନିର୍ବାଚନ ଏବଂ ଅନ୍ୟ ପଟେ ଆସନ୍ତା ବର୍ଷ ଆରମ୍ଭରେ ଦିଲ୍ଲୀ ନିର୍ବାଚନ ହେବ। ଏଭଳି ପରିସ୍ଥିତିରେ ଅରବିନ୍ଦ କେଜରିୱାଲ ଏହି ପଦକ୍ଷେପ ସହିତ ଆମ ଆଦମୀ ପାର୍ଟିକୁ ରାଜନୈତିକ ଫାଇଦା ପ୍ରଦାନ କରିବାକୁ ଚାହୁଁଛନ୍ତି ବୋଲି ଚର୍ଚ୍ଚା ହେଉଛି।
ଅରବିନ୍ଦ କେଜ୍ରିୱାଲ ଏବଂ ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ସୋମବାର ସାକ୍ଷାତ କରିବେ। ଏହି ସାକ୍ଷାତ ସମୟରେ ମୁଖ୍ୟମନ୍ତ୍ରୀ ନାଁକୁ ନେଇ ମୋହର ବାଜିବାର ସମ୍ଭାବନା ରହିଛି। ଦିଲ୍ଲୀ ମୁଖ୍ୟ ରେସ୍ରେ ଆତିଶି, ସୌରଭ ଭରଦ୍ୱାଜ, ରାଘବ ଚଢା, ଗୋପାଳ ରାୟ, କୈଳାଶ ଗେହଲଟ, ସୁନୀତା କେଜ୍ରିୱାଲଙ୍କ ନାଁ ଆଗରେ ରହିଛି।
ଅଧିକ ପଢ଼ନ୍ତୁ ଭାରତ ଖବର