ମୟୂରଭଞ୍ଜ: ସର୍ଭେରେ ଅଟକିଛି ସୁରିଆଗଡା ସୁନା ଖଣି । ୨୪ ବର୍ଷ ବିଜେଡି ସରକାରରେ ହୋଇପାରିଲାନି ସର୍ଭେ । ଏସିଆ ମହାଦେଶର ସର୍ବପ୍ରଥମ ଲୌହଖଣି ଅଞ୍ଚଳରେ ସୁନା ଖଣି ଥିବା ସତ୍ତ୍ବେ ପୂର୍ବ ସରକାରଙ୍କ ଅପାରଗତା ଯୋଗୁଁ ନା ହୋଇପାରିଲା ଶିଳ୍ପ ପ୍ରତିଷ୍ଠା ନା ହୋଇପାରିଲା ସୁନା ଖଣି ଖନନ । ଅଞ୍ଚଳବାସୀ ଦାରିଦ୍ର୍ୟ ସୀମାରେଖା ତଳେ କାଟୁଛନ୍ତି ଜୀବନ । ଆଦିବାସୀ ଅଧ୍ୟୁଷିତ ମୟୂରଭଞ୍ଜ ଜିଲ୍ଲାର ବାମନଘାଟି ଅଞ୍ଚଳରେ ମିଳିଛି ସୁନା ଖଣିର ସନ୍ଧାନ। ସୁଲେଇପାଟ, ବାଦାମପାହାଡ଼, ଗୋରୁମହିଷାଣି, ରୁଆଁସି, ଇଡେଲକୋଚା, ସୁରିଆଗୁଡ଼ା, ମାରେଡିହିରେ ସୁନା ପଥର ରହିଛି । ହେଲେ ଦୀର୍ଘ ବର୍ଷ ବିତିଯାଇଥିଲେ ବି ଏକଥା କେବଳ ସର୍ଭେରେ ଅଟକିଛି । 24 ବର୍ଷ ଶାସନରେ ରହିଲା ବିଜେଡି ସରକାର । ହେଲେ ସୁନା ଖଣି ଖନନ ଲାଗି ପଦକ୍ଷେପ ନିଆଗଲା ନାହିଁ । ଗୋରୁମହିଷାଣି ଲୁହା ଖଣିରେ ପୂର୍ବରୁ ଲୋକେ କାମ କରି ତାଙ୍କର ଗୁଜୁରାଣ ମେଣ୍ଟାଉଥିଲେ । କିନ୍ତୁ ପୂର୍ବ ସରକାର ଶିଳ୍ପ ପ୍ରତିଷ୍ଠା ନକରି ଲେବର୍ ମାଇନ୍ସକୁ ମେସିନ୍ ମାଇନ୍ସରେ କନଭର୍ଟ କରିଦେଲେ । ଫଳରେ ଲୋକେ ନିଜ ଅଞ୍ଚଳରେ କାମ ନପାଇ ବାହାରକୁ ଦାଦନ ଖଟି ଯାଉଛନ୍ତି ।
ବିଧାନସଭାରେ ଏ ପ୍ରସଙ୍ଗ ଉଠାଇଥିଲେ ରାଇରଙ୍ଗପୁର ବିଧାୟକ ଜଲେନ୍ ନାଏକ । ବାମନଘାଟି ଉପଖଣ୍ଡରେ ଯଥାଶୀଘ୍ର ଶିଳ୍ପ ପ୍ରତିଷ୍ଠା କରାଗଲେ ଅଞ୍ଚଳବାସୀ ଉପକୃତ ହେବେ ବୋଲି ଶିଳ୍ପମନ୍ତ୍ରୀଙ୍କୁ ସେ ଅନୁରୋଧ କରିଛନ୍ତି । ସୁନା ଖଣି ଖନନ ହେବା ଦ୍ବାରା କେବଳ ମୟୂରଭଞ୍ଜ ନୁହେଁ ସାରା ଭାରତ ବର୍ଷର ଉନ୍ନତି ହେବ । ବିଜେଡି ସରକାରର ଆନ୍ତରିକତା ଅଭାବ ଯୋଗୁଁ ଅଟକିଥିବା କାମ ମୋହନ ସରକାରରେ ପୂରଣ ହେବାର ଆଶା ସୃଷ୍ଟି ହୋଇଛି।
ଅଧିକ ପଢନ୍ତୁ ଓଡିଶା ଖବର