ଭୁବନେଶ୍ୱର: ମୋହନଙ୍କ ବଜେଟରେ କୃଷି, ଶିକ୍ଷା ସହ ଜନକଲ୍ୟାଣକାରୀ ଯୋଜନାକୁ ଗୁରୁତ୍ବ। ପୂର୍ବବର୍ଷ ଅପେକ୍ଷା କୃଷି ବଜେଟ ପରିମାଣ 36 ପ୍ରତିଶତ ବୃଦ୍ଧି। ସମୃଦ୍ଧ କୃଷକ ଯୋଜନା ପାଇଁ 5 ହଜାର କୋଟି ବ୍ୟୟ ବରାଦ। ରାଜ୍ୟରେ ଖୁବଶୀଘ୍ର ଲାଗୁ ହେବ ଜାତୀୟ ଶିକ୍ଷା ନୀତି-୨୦୨୦। ମୋ ସ୍କୁଲ ନାଁ ପରିବର୍ତ୍ତନ କରି ପଞ୍ଚସଖା ଶିକ୍ଷା ସେତୁ କରାଯିବ। 332 କୋଟି ଟଙ୍କା ବ୍ୟୟ ବରାଦ। ରାଜ୍ୟରେ ନୂଆ ସରକାର, ନୂଆ ବଜେଟ୍ । କ୍ଷମତାକୁ ଆସିବା ପରେ ବିଜେପି ସରକାରର ପ୍ରଥମ ବଜେଟରେ ଲୋକଙ୍କ ରୋଜଗାର ବଢ଼ାଇବା ଉପରେ ଫୋକସ । ଖଣି ଟିକସ ଉପରେ ନିର୍ଭରଶୀଳ ରାଜ୍ୟ ଅର୍ଥବ୍ୟବସ୍ଥାକୁ ପରିବର୍ତ୍ତନ କରିବାକୁ ବଡ଼ ପଦକ୍ଷେପ ନେଇଛନ୍ତି ମୋବନ ସରକାର ।

ଲୋକଙ୍କ ଆୟ ବଢ଼ାଇବା ପାଇଁ କୃଷି, ଶିକ୍ଷା ଉପରେ ସର୍ବାଧିକ ଗୁରୁତ୍ବ ଦେଇଛନ୍ତି ମୋହନ ସରକାର  । 33 ହଜାର 919 କୋଟିର କୃଷି ବଜେଟ୍ ସହ କୃଷି ପାଇଁ ବଜେଟରେ ସ୍ବତନ୍ତ୍ର ବ୍ୟବସ୍ଥା ହୋଇଛି । ପୂର୍ବବର୍ଷ ତୁଳନାରେ କୃଷି ବଜେଟ ପରିମାଣ  36 ପ୍ରତିଶତ ବୃଦ୍ଧି ପାଇଛି । ସିଏମ କିସାନ ଯୋଜନା ପାଇଁ 1935 କୋଟି, ଶ୍ରୀ ଅନ୍ନ ଯୋଜନା ପାଇଁ 649 କୋଟି ଘୋଷଣା ହୋଇଛି । ପୂର୍ବ ଘୋଷଣା ଅନୁସାରେ 31 ଶହ ଟଙ୍କାରେ ଧାନ କିଣିବେ ମୋହନ ସରକାର । ରାଜ୍ୟରେ ଆରମ୍ଭ ହେବ ମୁଖ୍ୟମନ୍ତ୍ରୀ କାମଧେନୁ ଯୋଜନା । ସମୃଦ୍ଧ କୃଷକ ଯୋଜନା ପାଇଁ ବଜେଟରେ 5 ହଜାର କୋଟି ବ୍ୟୟବରାଦ ହୋଇଥିବାବେଳେ ସୁଭଦ୍ରା ଯୋଜନା ପାଇଁ 10 ହଜାର କୋଟି ଅନୁଦାନ ଘୋଷଣା ହୋଇଛି । ରାଜ୍ୟରେ ବନ୍ୟା ଓ ବାତ୍ୟା ଦାଉରୁ ଚାଷ ଓ ଚାଷୀଙ୍କୁ ରକ୍ଷା କରିବାକୁ ବଜେଟରେ ବଡ଼ ଘୋଷଣା କରିଛନ୍ତି ମୋହନ ସରକାର । ପାର୍ବତୀ ଗିରି ମେଗା ଲିପ୍ଟ  ପ୍ରୋଜେକ୍ଟ ପାଇଁ  ୧୧୨୫ କୋଟି, ବନ୍ୟା ନିୟନ୍ତ୍ରଣ ଓ ଡ୍ରେନେଜ୍  ପାଇଁ ୧୦୩୬ କୋଟି ଅନୁଦାନ ଘୋଷଣା ହୋଇଛି । ଜଳ ସଂରକ୍ଷଣ ଓ ଇରିଗେସନ ଡେଭେଲୋପମେଣ୍ଟ ପାଇଁ 1872 କୋଟି ଟଙ୍କା ଅନୁଦାନ ଯୋଗାଇଦେବେ ରାଜ୍ୟ ସରକାର । ଶିକ୍ଷା ବ୍ୟବସ୍ଥାରେ ବଡ଼ ପରିବର୍ତ୍ତନ ଆସିବାକୁ ଯାଉଛି ।  ବଜେଟ ଘୋଷଣା ଅନୁସାରେ ରାଜ୍ୟରେ ଖୁବଶୀଘ୍ର ଲାଗୁ ହେବ ଜାତୀୟ ଶିକ୍ଷା ନୀତି-୨୦୨୦ ।  

ମୋ ସ୍କୁଲ ନାଁ ପରିବର୍ତ୍ତନ କରି ପଞ୍ଚସଖା ଶିକ୍ଷା ସେତୁ କରାଯିବ ।ଏଥିପାଇଁ 332 କୋଟି ଟଙ୍କା ବ୍ୟୟ ବରାଦ ହୋଇଛି । ୫୦ କୋଟି ବ୍ୟୟ ବରଦାରେ ଗୋଦାବରୀଶ ମିଶ୍ର ପ୍ରାଥମିକ ଆଦର୍ଶ ସ୍କୁଲ ଯୋଜନା ହେବାକୁ ଯାଉଛି ।  ମୁଖ୍ୟମନ୍ତ୍ରୀ ଶିକ୍ଷା ପୁରସ୍କାର ପାଇଁ ୧୩୯ କୋଟି ଟଙ୍କା ଘୋଷଣା ହୋଇଛି । ଏହାସହ ପିଏମ ପୋଷଣ ଯୋଜନାରେ 997 କୋଟି ଓ ସମଗ୍ର ଶିକ୍ଷା ଯୋଜନା ପାଇଁ 3791 କୋଟି ଟଙ୍କା ବ୍ୟୟ ବରାଦ ହୋଇଛି । ସହରାଞ୍ଚଳ ବିକାଶ ପାଇଁ ବଜେଟରେ ବଡ଼ ଘୋଷଣା । ଭୁବନେଶ୍ବର ମେଟ୍ରୋ ରେଳ ପାଇଁ ବଜେଟରେ 1 ହଜାର କୋଟି ଟଙ୍କାର ବ୍ୟବସ୍ଥା କରାଯାଇଛି। ସେହିଭଳି ସହରାଞ୍ଚଳ ଜଳ ଯୋଗାଣ ପାଇଁ 357 କୋଟି ଟଙ୍କାର ବ୍ୟୟମଂଜୁରୀ ହୋଇଛି । ସହରାଞ୍ଚଳରେ ସ୍ବଚ୍ଛ ଭାରତ ମିଶନରେ ଖର୍ଚ୍ଚ ହେବ 534 କୋଟି ଟଙ୍କା। ନୂଆ ସହର ବିକାଶ ପାଇଁ 918 କୋଟି ଟଙ୍କାର ହୋଇଛି ବ୍ୟବସ୍ଥା।  ଅନୁସୁଚିତ ଜାତି-ଜନଜାତି, ପଛୁଆ ବର୍ଗ ଓ ସଂଖ୍ୟାଲଘୁଙ୍କ ବିକାଶ ପାଇଁ ମୋହନଙ୍କ ବଜେଟରେ ରହିଛି ବିଶେଷ ବ୍ୟବସ୍ଥା। ଡ୍ରପ ଆଉଟ୍ ରୋକିବା ପାଇଁ ଆରମ୍ଭ ହେଉଛି ମାଧୋ ସିଂହ ହାତ ଖର୍ଚ୍ଚ। ଏ ବାବଦରେ ପିଲାଙ୍କୁ ବର୍ଷକୁ ମିଳିବ 5 ହଜାର ଟଙ୍କା। ଏଥିପାଇଁ 156 କୋଟି ଟଙ୍କାର ହୋଇଛି ବ୍ୟବସ୍ଥା। ପିଲାଙ୍କ ବୃତ୍ତି ପାଇଁ ରହିଛି 11 ଶହ 70 କୋଟି ଟଙ୍କା। ମୁଖ୍ୟମନ୍ତ୍ରୀ ଜନଜାତି ଜିବୀକାରେ ଖର୍ଚ୍ଚ ହେବ 2 ଶହ କୋଟି ଟଙ୍କା।  
ଅଧିକ ପଢନ୍ତୁ ଓଡ଼ିଶା ଖବର