ଅର୍ଗସ ବ୍ୟୁରୋ: କଶ୍ମୀର ପାଇଁ ପାଗଳ ହୋଇଗଲାଣି ପାକିସ୍ତାନ । ଗୋଟିଏ ପଟେ ପିଓକେ ଅଂଚଳର ଲୋକେ ପାକିସ୍ତାନକୁ ବିରୋଧ କରି ଜମ୍ମୁରେ ମିଶିବା ପାଇଁ କହିଲେଣି । ଏମିତିକି ଜମ୍ମୁ ବିଧାନସଭାରେ ଭୋଟ୍ ଦେବାକୁ ବି କହିଲେଣି । ସେପଟେ ମିଳିତ ଜାତିସଂଘରେ ପାକିସ୍ତାନ କହୁଛି କାଶ୍ମୀରରେ କୁଆଡ଼େ ଭାରତ ଅତ୍ୟାଚାର କରୁଛି । ଯାହା ହାସ୍ୟାସ୍ପଦ । କଥା ହେଲା ପାକିସ୍ତାନର ଅର୍ଥନୀତି ସଂପୂର୍ଣ୍ଣ ଦୋହଲିଯାଇଛି । ଲୋକେ ଠିକ୍ରେ ଖାଇବାକୁ ବି ପାଉନାହାନ୍ତି । ଏହାରି ଭିତରେ ଦେଶରେ କେମିତି ଜନତା ଶାନ୍ତିରେ ରହିବେ ସେନେଇ ଚିନ୍ତା ନକରି ଭାରତ କଣ କରୁଛି କଣ ନାହିଁ ଚିନ୍ତା କରୁଥିବାରୁ ବିଦେଶରେ ବି ପାକିସ୍ତାନକୁ ନିନ୍ଦିତ ହେବାକୁ ପଡ଼ିଛି ।
ପୁଣି ଥରେ ଜାତିସଂଘରେ ନିଜେ ନିଜର ଗୁମର ଖୋଲିଲା ପାକିସ୍ତାନ । ମିଳିତ ଜାତିସଂଘରେ କାଶ୍ମୀର ପ୍ରସଙ୍ଗ ଉଠାଇ ନିଜକୁ ବିବାଦ ଭିତରକୁ ଟାଣି ନେଇଛନ୍ତି ପାକିସ୍ତାନ ପ୍ରଧାନମନ୍ତ୍ରୀ । ପାକ୍ ପିଏମ ଶେହବାଜ ସରିଫ୍ କହିଛନ୍ତି, କଶ୍ମୀରରେ ଭାରତର ଅତ୍ୟାଚାର ଜାରି ରହିଛି । ସେଠାକାର ଲୋକମାନେ ନିଜ ସ୍ଵାଧୀନତା ଓ ଆତ୍ମ ନିୟନ୍ତ୍ରଣ ଅଧିକାର ପାଇଁ ଲଢୁଛନ୍ତି । ଜମ୍ମୁ-କଶ୍ମୀରବାସୀ ଶାନ୍ତି ଚାହୁଁଛନ୍ତି । କିନ୍ତୁ ଶାନ୍ତି ଆଡ଼କୁ ଗତି କରିବା ପରିବର୍ତ୍ତେ ଭାରତ କଶ୍ମୀରରେ ଜାତିସଂଘ ସଂକଳ୍ପ ପାଳନ କରିବାକୁ ଦେଉନାହିଁ । ଏହି ଅବସରରେ ସରିଫ ୨୦୧୯, ଅଗଷ୍ଟ ୫ରେ ହୋଇଥିବା ଧାରା ୩୭୦ ପ୍ରତ୍ୟାହାର ପ୍ରସଙ୍ଗ ବି ଉଠାଇଥିଲେ । କଶ୍ମୀରରେ ଭାରତୀୟ ସେନାର ୯ ଲକ୍ଷ ସୈନିକ ରହି କଶ୍ମୀରବାସୀଙ୍କ ଉପରେ ଅତ୍ୟାଚାର କରୁଛନ୍ତି ବୋଲି ସେ ଦାବି କରିଛନ୍ତି ।
ଦେଶରେ ସରକାର ବଦଳିବା ପରେ ପାକିସ୍ତାନ ଚିନ୍ତାରେ । କାରଣ ଶତ୍ରୁକୁ ଶତ୍ରୁ ଭାଷାରେ ହିଁ ଜବାବ ଦିଆଯିବ ବୋଲି ମୋଦି ସରକାର ସ୍ପଷ୍ଟ କରିଛନ୍ତି । ପୂର୍ବରୁ ପାକିସ୍ତାନ ମନମାନିକୁ କଂଗ୍ରେସ ହଜମ କରୁଥିବାରୁ ଭାରତକୁ ସବୁବେଳେ ଦୋଷାରୋପର କରିବା ପାକିସ୍ତାନର ପୁରୁଣା ଅଭ୍ୟାସ । ହେଲେ ଏବେ ଭାରତ ପାକିସ୍ତାନ ସହ ସମସ୍ତ ବାଣିଜ୍ୟିକ ସମ୍ପର୍କ ଛିହ୍ନ କରିବା ପରେ ବିଳିବିଳାଉଛି ପାକିସ୍ତାନ । ତେଣୁ ଜାତିସଂଘରେ ପାକିସ୍ତାନ ପ୍ରଧାନମନ୍ତ୍ରୀ କହିଛନ୍ତି, ଭାରତ ଓ ପାକିସ୍ତାନ ମଧ୍ୟରେ ସୀମା ଓ କୂଟନୈତିକ ସମ୍ପର୍କକୁ ସ୍ୱାଭାବିକ କରିବା ନିଷ୍ପତ୍ତିର ପୁନର୍ବିଚାର କରିବା ଉଚିତ । ସ୍ଥାୟୀ ଶାନ୍ତି ପାଇଁ ଭାରତ ଅଗଷ୍ଟ ୫, ୨୦୧୯ରେ ନିଆଯାଇଥିବା ଏକତରଫା ଏବଂ ବେଆଇନ ପଦକ୍ଷେପକୁ ପ୍ରତ୍ୟାହାର କରିବା ଉଚିତ ଏବଂ ଜାତିସଂଘ ନିରାପତ୍ତା ପରିଷଦ ପ୍ରସ୍ତାବ ଏବଂ କାଶ୍ମୀରବାସୀଙ୍କ ଆକାଂକ୍ଷା ଅନୁଯାୟୀ ଜମ୍ମୁ-କଶ୍ମୀର ବିବାଦର ଶାନ୍ତିପୂର୍ଣ୍ଣ ସମାଧାନ ପାଇଁ ଆଲୋଚନା କରିବା ଉଚିତ । ସେପଟେ ଭାରତ ମଧ୍ୟ ପ୍ରତିକ୍ରିୟା ରଖିଛି । କହିଛି, ପାକିସ୍ତାନ ବର୍ତ୍ତମାନ ନୁହେଁ ଅତୀତରେ ହିଁ ବଞ୍ଚିଛି । ତେବେ ଆଗାମୀ ଦିନରେ ପାକିସ୍ତାନର ଅବସ୍ଥା କେତେ ସଙ୍ଗୀନ ହେଉଛି ତାହା ଦେଖିବାକୁ ବାକି ରହିଲା ।