ଅର୍ଗସ ବ୍ୟୁରୋ: ବିଜେଡିରେ ଏବେ ଚରମ କନ୍ଦଳ । ନିର୍ବାଚନ ହାରିବା ପରେ ନେତାଙ୍କର ଆଉ ସେମିତି କ୍ଷମତା ନାହିଁ କି ଦବଦାବ ନାହିଁ । ଯେଉଁଥି ଲାଗି ସେମାନେ ଅଣନିଶ୍ଵାସୀ ହୋଇ ପଡ଼ିଛନ୍ତି । ଖାସ କରି ସପ୍ତାହେ ହେଲା ଅମର-ଲେନିନ୍-ପ୍ରସନ୍ନ-ଦେବାଶିଷ ଓ ଶେଷରେ ଲତିକା ଯେଉଁ ବିସ୍ଫୋରକ ବୟାନ ଦେଇଛନ୍ତି ସେଥିରୁ ଗୋଟିଏ କଥା ସ୍ପଷ୍ଟ ହୋଇଛି କି ବିଜେଡିରେ ଆଉ କିଛି ଠିକ୍ଠାକ୍ ନାହିଁ । ସ୍ଥିତି ଯଦି ଏମିତି ଲାଗି ରହିବ ତାହାଲେ ଆଗାମୀ ଦିନରେ ବିଜେଡି ସଂପୂର୍ଣ୍ଣ ଲୋକଙ୍କଠାରୁ ଦୂରେଇ ଯିବ ବୋଲି ରାଜନୈତିକ ସମୀକ୍ଷକ କହିଲେଣି ।
ଗତକାଲି ଥିଲା ଅକ୍ଟୋବର ୧୬ । ବିଜେଡି ସୁପ୍ରିମୋଙ୍କ ଜନ୍ମଦିନ । ଜନ୍ମଦିନର ଶୁଭେଚ୍ଛା ଜଣାଇବା ପରେ ଆସ୍କା 'ବିଭୀଷଣ'ଙ୍କ ନାଁରେ ଅଭିଯୋଗ କଲେ ଲତିକା ପ୍ରଧାନ । କବିସୂର୍ଯ୍ୟନଗରର ପୂର୍ବତନ ବିଧାୟିକା ଲତିକା ପ୍ରଧାନ ବିଜେଡି ଆସ୍କା ସାଂସଦ ପ୍ରାର୍ଥିନୀ ରଞ୍ଜିତା ସାହୁଙ୍କ ନାଁରେ ଆଣିଛନ୍ତି ସାଂଘାତିକ ଅଭିଯୋଗ । ଖୋଲାଖୋଲି କହିଛନ୍ତି ତାଙ୍କ ପରାଜୟ ପାଇଁ ରଞ୍ଜିତା ହିଁ ଷଡ଼ଯନ୍ତ୍ର କରିଥିଲେ । ବିଜେପି ସହ ସାଲିସ୍ କରି ବିଜେଡିର କ୍ଷତି ଘଟାଇଛନ୍ତି । ଏବେ ବି ସେ ବିଜେପି ସଂପର୍କରେ ଅଛନ୍ତି । ରଞ୍ଜିତା ଗୃହ ଶତ୍ରୁ ବିଭୀଷଣର ଭୂମିକା ତୁଲାଇ ଗଞ୍ଜାମ ଗଡ଼ରେ ବିପର୍ଯ୍ୟୟ ଘଟାଇଲେ । ସେଇଥି ଲାଗି କୁଆଡ଼େ ନବୀନଙ୍କର ବି ମାର୍ଜିନ କମିଲା । ଏହାସହ ଚରମବାଣୀ ଶୁଣାଇ କହିଛନ୍ତି, ଯଦି ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନନିଆଯାଏ ତାହାଲେ ଆଗାମୀ ଦିନରେ ଦଳ ଆହୁରି ସାଙ୍ଘାତିକ ସ୍ଥିତି ଭୋଗିବ । ସେପଟେ ଅଭିଯୋଗ ଭିତ୍ତିହୀନ କହିବା ସହିତ କାହିଁକି ଦର ହାରିଲା ତାହାର ସମୀକ୍ଷା କରାଯାଉଛି ବୋଲି କହିଛନ୍ତି ରଂଜିତା ।
ବିଜେଡିର ନେତା ପ୍ରକୃତରେ କିଏ ? ନବୀନ ନା ପାଣ୍ଡିଆନ୍ ବୋଲି ପ୍ରସନ୍ନ ପାଟ୍ଟଶାଣୀ ଓ ଅମର ଶତପଥୀ ପ୍ରଶ୍ନ ଉଠାଇବା ପରେ ସେନେଇ ବି ତେଜିଲାଣି ରାଜନୈତିକ ବୟାନବାଜି । ଉଭୟ ନେତାଙ୍କୁ କାଉଣ୍ଟର କରିବାକୁ ଯାଇ କଟକର ବିଜେଡି ନେତା ତଥା ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ କହିଥିଲେ, ଭିକେ ପାଣ୍ଡିଆନ୍ କେବେ ହେଲେ ଆମର ନେତା ନଥିଲେ । ଆମ ନେତା ନବୀନ । ଯେଉଁମାନେ ନେତୃତ୍ବକୁ ନେଇ ପ୍ରଶ୍ନ ଉଠାଉଛନ୍ତି ସେମାନେ ଦଳ ଛାଡିଲେ କୌଣସି ଫରକ ପଡିବନି ।
୨୪ ବର୍ଷର ସ୍ଥିର ସରକାର, ୨୪ ବର୍ଷର ମୁଖ୍ୟମନ୍ତ୍ରୀ ଥିଲେ । ଏବେ ପୁଣି ନବୀନଙ୍କ କାନ୍ଧରେ ବିରୋଧୀ ଦଳ ନେତାର ଗୁରୁଦାୟିତ୍ଵ । କିନ୍ତୁ ଏତେ ଦିନର ରାଜନୈତିକ ଅଭିଜ୍ଞତା ଥିବା ପରେ ବି ନିଜ ଦଳର କନ୍ଦଳକୁ ସେ ପରିସମାପ୍ତ କରିପାରୁନାହାନ୍ତି । ତେଣୁ ଆଗାମୀ ଦିନରେ ଦଳ ଉପରେ ଏହାର ସିଧାସଳଖ ପଡ଼ିବ ଏବଂ ପଞ୍ଚାୟତ ନିର୍ବାଚନରେ ବିଜେଡି ଜଳକା ହୋଇ ରହିଯିବ ବୋଲି ଅନେକ କହିଲେଣି । ହେଲେ ସମୟ କହିବ ଆଗାମୀ ଦିନରେ ବିଜେଡିର ସ୍ଥିତି ହେଉଛି କଣ ?