ଅର୍ଗସ ବ୍ୟୁରୋ: ଚାଷୀଙ୍କୁ କେମିତି ଉଚିତ୍ ମୂଲ ମିଳିବ, କେମିତି ବିନା କଟନୀ ଛଟନୀରେ ଧାନ କିଣିବେ ସରକାର ସେନେଇ ରାଜ୍ୟ ସରକାର ବଡ଼ ନିଷ୍ପତ୍ତି ନେଇଛନ୍ତି । ଗତକାଲି ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା ଧାନ ସଂଗ୍ରହ ବୈଠକରେ ନିଷ୍ପତ୍ତି ହୋଇଛି ଯେ ଏଣିକି ଧାନକିଣା ବେଳେ ସିଲ୍ ହେବ ପଡ଼ୋଶୀ ରାଜ୍ୟ ସୀମା । ପ୍ରତି ଜିଲ୍ଲା ଦାୟିତ୍ୱରେ ରହିବେ ମନ୍ତ୍ରୀ ।
ଅମଳ କରିବା ପରେ ଧାନକୁ ବିକ୍ରି କରିବାକୁ ଚାଷୀ ଯେଉଁପରି ସଂଘର୍ଷ କରୁଛି ତାହା କାହାକୁ ବି ଅଛପା ନାହିଁ । ସ୍ଥିତି ଏମିତି ହେଉଛି ଯେ ଦଲାଲ ହାତରେ ବର୍ଷକ ଯାକର ଫସଲକୁ ଟେକି ଦେବାକୁ ବାଧ୍ୟ ହେଉଛି ଚାଷୀ । କିନ୍ତୁ ରାଜ୍ୟରେ ବିଜେପି କ୍ଷମତାକୁ ଆସିବା ପରେ ଏବେ ଚାଷୀଙ୍କୁ ହଇରାଣ ହେବାକୁ ଆଦୌ ପଡ଼ିବ ନାହିଁ । କଟନୀଛଟନୀ ବନ୍ଦ କରିବାକୁ ଧାନର ମାନ ଥରେ ମାତ୍ର ଯାଞ୍ଚ କରିବାକୁ ହୋଇଛି ବୈଠକରେ ନିଷ୍ପତ୍ତି ହୋଇଛି । ସେହିପରି ଟୋକନ୍ ସମୟ ସୀମା ଜିଲ୍ଲାପାଳମାନେ ଯଦି ଚାହିଁବେ ତେବେ ବଢ଼ାଇ ପାରିବେ । ତେଣୁ ରହିବନି କଟନୀଛଟନୀ ।
୨୪ ବର୍ଷ ଶାସନ କାଳରେ ମଣ୍ଡିରେ ଚାଷୀ କେମିତି ଅସୁବିଧା ସାମ୍ନା କରୁଥିଲେ ତାହା କାହାକୁ ବି ଛପା ନାହିଁ । ବାରମ୍ବାର ଧାନର ମାନ ଯାଂଚ ହେଉ କି କଟନୀଛଟନୀ ହେଉ, ହିନସ୍ତା ହେଉଥିଲେ ଚାଷୀ କିନ୍ତୁ ଉଚିତ୍ ପ୍ରାପ୍ୟ ପାଉନଥିଲେ । ସେଇଥି ଲାଗି ତ ମଣ୍ଡିରେ ଏବେ କେବଳ ଥରେ ହିଁ ଯାଞ୍ଚ ହେବ ଧାନର ମାନ । ସେହି ମାନ ଅନୁସାରେ ଧାନ କିଣିବେ ମିଲର । ସବୁଠୁ ବଡ଼ ନିଷ୍ପତ୍ତି ହେଲା, ଧାନ ବିକ୍ରି ବେଳେ ସିଲ୍ ହେବ ପଡ଼ୋଶୀ ରାଜ୍ୟ ସୀମା । ଛତିଶଗଡ଼, ଝାଡ଼ଖଣ୍ଡ ଏବଂ ପଶ୍ଚିମବଙ୍ଗ ସୀମାରେ ଚେକିଂ କଡାକଡି ଜୋରଦାର ହେବ । ଏ ବର୍ଷ ପ୍ରଥମଥର ପାଇଁ ଓଡ଼ିଶାର ଚାଷୀ ଧାନ କ୍ୱିଣ୍ଟାଲ ବାବଦକୁ ୩୧୦୦ ଟଙ୍କା ପାଇବେ ।
ବୈଠକରେ ନିଆଯାଇଥିବା ଗୁରୁତ୍ୱପୂର୍ଣ୍ଣ ନିଷ୍ପତ୍ତି ହେଲା, ଏବେଠୁ ଜିଲ୍ଲାପାଳ ବଢାଇ ପାରିବେ ଚାଷୀଙ୍କ ଟୋକନ ସୀମା । ସେଥିପାଇଁ ଜିଲ୍ଲାପାଳଙ୍କୁ ଅଧିକୃତ କ୍ଷମତା ଦିଆଯିବ । ଆଉ ରାଜ୍ୟ ସରକାର ପାଖକୁ ପଠାଇବେନି ପ୍ରସ୍ତାବ । ସେପଟେ ବର୍ଷା ଦାଉରୁ ବଂଚିବାକୁ ମଣ୍ଡିଗୁଡିକରେ ନିର୍ମାଣ ହେବ ଗୋଦାମ । ମଣ୍ଡିଗୁଡିକର ଆଧୁନିକୀକରଣ ପାଇଁ ୫୫୦ କୋଟି ଖର୍ଚ୍ଚ କରିବେ ରାଜ୍ୟ ସରକାର । ପୁଣି ମଣ୍ଡି ଜଗିବାକୁ ଧାନ କିଣା ବେଳେ ଜିଲ୍ଲା ଦାୟିତ୍ୱରେ ରହିବେ ମନ୍ତ୍ରୀ । ପ୍ରତି ମଣ୍ଡିରେ ରହିବେ ଜଣେ ଅଧିକୃତ ଅଧିକାରୀ । ଦୀର୍ଘଦିନର ଦାବି ପରେ ପ୍ରଥମ ଥର ପାଇଁ ଧାନ କ୍ୱିଣ୍ଟାଲ ପିଛା ୩୧୦୦ ଟଙ୍କା ପାଇବାକୁ ନେଇ ବେଶ୍ ଉତ୍ସାହିତ ଚାଷୀ । ସୂଚନା ଅନୁସାରେ, ଗତବର୍ଷ ୫୮ ଲକ୍ଷ ଟନ୍ ଧାନ କିଣା ହୋଇଥିଲା ବେଳେ ଏଥର ୮୦ ଲକ୍ଷ ଟନ୍ ଧାନ କିଣିବେ ରାଜ୍ୟ ସରକାର ।