ଅର୍ଗସ ବ୍ୟୁରୋ: ସୁଭଦ୍ରା ଯୋଜନାକୁ ନେଇ ପୁରା ରାଜ୍ୟରେ ଏବେ ଉଛୁଳା ଉତ୍ସାହ । କେମିତି ରାଜ୍ୟ ସରକାରଙ୍କ ଏହି ଯୋଜନାରେ ଲାଭ ପାଇବେ ମହିଳା ସେନେଇ ସବୁ ପ୍ରକାର ବନ୍ଦୋବସ୍ତ କରୁଛନ୍ତି ସରକାର । କାରଣ ସୁଭଦ୍ରା ଏମିତି ଏକ ଯୋଜନା ଯେଉଁଠାରେ ଓଡ଼ିଶା ଇତିହାସରେ ସର୍ବାଧିକ ମହିଳା ଲାଭାର୍ଥୀ ହେବେ । ଏପଟେ, ସୁଭଦ୍ରା ରଥର ଉଦଘାଟନ କଲେ ମୁଖ୍ୟମନ୍ତ୍ରୀ, କହିଲେ- ସୁଭଦ୍ରା ଏକ ଯୋଜନା ନୁହେଁ, ଅସ୍ମିତା । ଫର୍ମ ପାଇଁ ଭିଡ଼ ନ କରିବାକୁ ଆହ୍ଵାନ କଲେ ଉପମୁଖ୍ୟମନ୍ତ୍ରୀ । ରାଜ୍ୟରେ ଗଡିଲା ସୁଭଦ୍ରା ରଥ। ପଞ୍ଚାୟତ ରୁ ବ୍ଲକ ବୁଲିବ..ଲୋକଙ୍କୁ ସଚେତନ କରିବ ।
ନିର୍ବାଚନ ପୂର୍ବରୁ ଯାହା କଥା ଦେଇଥିଲେ ନିର୍ବାଚନରେ ଜିତିବା ପରେ ସେଇୟା ହିଁ କଲେ । ଅର୍ଥାତ୍ ମହିଳାମାନେ ସୁଭଦ୍ରା ଯୋଜନା ଭରପୁର ଲାଭ ପାଇବେ । ତେବେ ସୁଭଦ୍ରା ଫର୍ମ କେଉଁଠି ମିଳିବ, ଏହାକୁ ମହିଳାମାନେ କେମିତି ଆବେଦନ କରିବେ ଓ ଏହା ଏକ ନିଃଶୁଳ୍କ ପ୍ରକ୍ରିୟା ବୋଲି ରଥରେ ଲାଗିଥିବା ଏଲ.ଇ.ଡି.ସ୍କ୍ରିନ ଦ୍ଵାରା ହିତାଧିକାରୀଙ୍କୁ ବୁଝିଯିବା ସହିତ ସଚେତନ ବି କରାଯିବ । ସୂଚନା ଅନୁସାରେ, ପ୍ରତି ବ୍ଲକ, ପଂଚାୟତ, ଗାଁ ଓ ସାହିରେ ବୁଲିବ ଏହି ରଥ । ଏପଟେ, ଗତକାଲି ସୁଭଦ୍ରା ରଥ ଉଦଘାଟନ କରିବା ଅବସରରେ ସୁଭଦ୍ରା ଏକ ଯୋଜନା ନୁହେଁ ବରଂ ଅସ୍ମିତାର ପ୍ରତୀକ ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଓଡ଼ିଶା ଇତିହାସର ସୁଭଦ୍ରା ଏମିତି ଗୋଟିଏ ଯୋଜନା ଯେଉଁଥିରେ ସବୁଠୁ ଅଧିକ ମହିଳା ଲାଭାର୍ଥୀ ହେବେ । ମାଲକାନଗିରି, ନୟାଗଡ଼ରେ ସ୍ଥାନୀୟ ଜିଲ୍ଲାପାଳ ସୁଭଦ୍ରା ରଥର ଉଦଘାଟନ କରିଥିବା ବେଳେ ସୁବର୍ଣ୍ଣପୁରରେ ସ୍ଵାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଓ ରାୟଗଡାରେ ପରିବହନ ମନ୍ତ୍ରୀ ବିଭୁତି ଜେନା ସୁଭଦ୍ରା ରଥର ଶୁଭାରମ୍ଭ କରିଛନ୍ତି ।
ରାଜ୍ୟ ସରକାର ଯୋଜନା ଆରମ୍ଭ କରିବା ପରେ ଅନେକ ସ୍ଥାନରେ ଅନିୟମିତତା ଅଭିଯୋଗ ଆସିଥିଲା । ଏମିତିକି ଆଧାର ଅଥଣ୍ଟିକେସନ ପାଇଁ ଅଧିକ ଟଙ୍କା ମଗାଯାଉଥିବା କୁହାଯାଉଥିଲା । ପୂର୍ବରୁ ବି ସରକାର ସ୍ପଷ୍ଟ ଭାବରେ କହିଥିଲେ ଯୋଜନାରେ ଟଙ୍କା ମାଗିଲେ କାର୍ଯ୍ୟାନୁଷ୍ଠାନ ନିଆଯିବ । ଏହି ପର୍ଯ୍ୟାୟରେ, ସୁଭଦ୍ରା ଫର୍ମ ବଣ୍ଟନରେ ଅନିୟମିତତା ହୋଇଥିବା ଅଭିଯୋଗରେ ବାଲେଶ୍ୱର ବାଲିଆପାଳରେ ଜଣେ ଅଙ୍ଗନବାଡି ଦିଦିଙ୍କ ଉପରେ ଆକ୍ସନ ନେଇ ଗୋଟିଏ ମାସର ଦରମା ବନ୍ଦ କରିଛି ଜିଲ୍ଲା ପ୍ରଶାସନ । ଗୁରୁତ୍ଵପୂର୍ଣ୍ଣ କଥା ହେଲା, ଏଇ ୧୭ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡିଶା ଆସି ସୁଭଦ୍ରା ଯୋଜନାର ଶୁଭାରମ୍ଭ କରିବେ ।
(ଭୁବନେଶ୍ଵରରୁ ଦିବ୍ୟଜ୍ୟୋତି ମହାନ୍ତିଙ୍କ ରିପୋର୍ଟ)