ବରଗଡ଼: ବରଗଡ଼ ପୌର ପରିଷଦରେ କାର୍ଯ୍ୟରତ ଆଉଟସୋର୍ସିଙ୍ଗ ସଫେଇ କର୍ମଚାରୀଙ୍କୁ ସରକାରୀ ବିଲ ହିସାବରେ 13 ରୁ 14 ହଜାର ଟଙ୍କା ଦରମା ମିଳିବା କଥା । କିନ୍ତୁ ମିଳୁଛି 4 ହଜାର ଟଙ୍କା | ବାକି 9 ହଜାର ଟଙ୍କା ଆଦିଶକ୍ତି ନାମକ ଠିକା ସଂସ୍ଥା ଲୁଟ କରୁଥିବା ଅଭିଯୋଗ ହୋଇଛି । 2019 ମସିହାରୁ ଏହି ଲୁଟ ଚାଲିଛି । ପୌର ପରିଷଦ ଆଖି ବନ୍ଦ କରିଦେଇଛି । ଆଶ୍ଚର୍ଯ୍ୟର କଥା କର୍ମଚାରୀଙ୍କ ପାସବୁକ ଓ ATM କାର୍ଡ ମଧ୍ୟ ଶ୍ରୀନିବାସ ମଲିକ ନାମକ ଜଣେ କର୍ମଚାରୀଙ୍କ ପାଖରେ ବନ୍ଧା ପଡିଛି । ଏହି ଦୁର୍ନୀତିର ମାଷ୍ଟର ମାଇଣ୍ଡ ଶ୍ରୀନିବାସ ପ୍ରତି ମାସରେ 20 ଲକ୍ଷରୁ ଅଧିକ ଲୁଟ କରୁଥିବା ଅଭିଯୋଗ ହେଇଛି ।
କେବଳ ଏତିକି ନୁହେଁ ସାନିଟାରୀ ଇନ୍ସପେକ୍ଟରଙ୍କ ବିନା ଦସ୍ତଖତରେ ରେ ବିଲ ଗୁଡିକ ପାସ ହୋଇଛି । 2019 ମସିହାରୁ ଚାଲିଛି ଏହି ମହାଲୁଟ୍। ଅର୍ଥାତ ଶ୍ରୀନିବାସ ମଲ୍ଲିକ ଓ ଠିକା ସଂସ୍ଥା ଏଯାଏଁ କୋଟି କୋଟି ଟଙ୍କା ଲୁଟି ଥିବା ଅଭିଯୋଗ। ସଫେଇ କର୍ମଚାରୀଙ୍କ ବୟାନ ଓ ପୌର ପରିଷଦର ଏହି ବିଲ୍ ଦେଖିଲେ ଯେ କେହି କହିବ ଟଙ୍କା କେମିତି ହୋଇଛି ଲୁଟ । ହେଲେ ବଡ଼ ପ୍ରଶ୍ନ କେମିତି କିଛି ଜାଣିପାରୁନାହାଁନ୍ତି ଏକଜିକ୍ୟୁଟିଭ୍ ଇଞ୍ଜିନିୟର । କେମିତି କିଛି ଜାଣିପାରୁନି ଆକାଉଣ୍ଟ ସେକ୍ସନ । କେମିତି କିଛି ଜାଣିପାରୁନାହାଁନ୍ତି ପୌରପରିଷଦ ଅଧ୍ୟକ୍ଷା। ସବୁଠାରୁ ବଡ଼କଥା ପ୍ରତି ବର୍ଷ ଅଡ଼ିଟ ହୁଏ, ବିଲ୍ ଯାଞ୍ଚ ହୁଏ । ତଥାପି କେହି ଧରା ପଡ଼ନ୍ତି ନାହିଁ । କାରଣ ସାଧାରଣ ସଫେଇ କର୍ମଚାରୀଙ୍କୁ ଏମାନେ ଭୟଭୀତ କରି ରଖିଥିବା ଅଭିଯୋଗ ହୋଇଛି । ମୁହଁ ଖୋଲିଲେ କାମ ହରାଇବେ ବୋଲି ଧମକ ବି ଦିଅନ୍ତି। କିଛି ଦିନ ପୂର୍ବରୁ ୟୁଜର୍ସ ଫି ଘୋଟାଲାରେ 2 ଜଣ ଅଧିକାରୀ ବହିଷ୍କୃତ ହୋଇଥିବା ବେଳେ ଜଣେ ନିଲମ୍ବନ ହୋଇଛନ୍ତି । ଏବେ ପୁଣି ସାମ୍ନାକୁ ଆସିଛି ମହାଲୁଟର କାହାଣୀ ।
ଅଧିକ ପଢନ୍ତୁ ଓଡିଶା ଖବର