ଅର୍ଗସ ବ୍ୟୁରୋ: ଅନୁଗୋଳ ଆଠମଲ୍ଲିକ ବ୍ଲକର ଜଗନ୍ନାଥପୁରରେ ଲୋକଙ୍କୁ ମିଳୁନି ବିଶୁଦ୍ଧ ପାନୀୟ ଜଳ।  ଗାଁରେ ଥିବା ୫ଟି ନଳକୂଅରୁ ଫ୍ଲୋରାଇଡ ମିଶା ପାଣି ବାହାରୁଛି । ଏହି ପାଣି ପିଇ ଲୋକମାନଙ୍କ ସ୍ବାସ୍ଥ୍ୟସମସ୍ୟା ଦେଖାଦେଉଛି । ନଳକୂପର ପାଣିରେ ଗୁଣ୍ଡମିଶା କଳାପାଣି ବାହାରୁଥିଲେ ମଧ୍ୟ ଗାଁ ଲୋକ ପିଇବାକୁ ବାଧ୍ୟ ହେଉଛନ୍ତି । ଏହି ଫ୍ଲୋରାଇଡ ମିଶା ପାଣି ପିଇବା ଯୋଗୁଁ ଗ୍ରାମରେ କୀଡୀନି ରୋଗୀଙ୍କ ସଂଖ୍ୟା ବଢୁଥିବା ଗ୍ରାମବାସୀ ଅଭିଯୋଗ କରିଛନ୍ତି I କିଡନୀ ରୋଗରେ ଦୁଇ ବର୍ଷରେ ୧୦ରୁ ଅଧିକ ଲୋକଙ୍କ ଜୀବନ ଯାଇଥିବା ବେଳେ ୩୦ରୁ ଅଧିକ ଆକ୍ରାନ୍ତ ହୋଇଛନ୍ତି । ଫ୍ଲୋରାଇଡ ମିଶା ପାଣି ପିଇ ଲୋକଙ୍କ ଦାନ୍ତ ହଳଦିଆ ଓ କଳା ପଡିଯାଉଥିବା ଅଭିଯୋଗ ହୋଇଛି ।

ଜଗନ୍ନାଥପୁର ଗାଁରେ ପାଖାପାଖି ୩୦୦ ଲୋକ ବସବାସ କରୁଛନ୍ତି । ପାନୀୟ ଜଳ ସମସ୍ୟା ନେଇ ସେମାନେ ସରପଞ୍ଚଙ୍କ ଠାରୁ ଆରମ୍ଭ କରି ବ୍ଲକ ପ୍ରଶାସନକୁ ଜଣେଇଛନ୍ତି । କିନ୍ତୁ ଏପର୍ଯ୍ୟନ୍ତ କୌଣସି ପଦକ୍ଷେପ ନିଆଯାଉ ନଥିବା ୱାର୍ଡ ମେମ୍ବର ଅଭିଯୋଗ କରିଛନ୍ତି । ୨୪ ବର୍ଷର ସ୍ଥାୟୀ ବିଜେଡି ସରକାରରେ ସାଧାରଣ ଲୋକଙ୍କୁ ବିଶୁଦ୍ଧ ପାନୀୟ ଜଳ ବୁନ୍ଦାଏ ମିଳିପାରିଲାନାହିଁ I ନୂଆ ସରକାର ପାନୀୟ ଜଳ ସମସ୍ୟାର ସମାଧାନ କରିବେ ବୋଲି ଗାଁ ଲୋକ ଆଶା ରଖିଛନ୍ତି ।