ଜଗତସିଂହପୁର: ଜଗତସିଂହପୁର ଜିଲ୍ଲା ରଘୁନାଥପୁର ବ୍ଲକର କେରକେରା ସ୍ଥିତ ବିଭୂତି କ୍ଷେତ୍ର ବାବା ଗୋରେଖନାଥଙ୍କ ପୀଠରେ ଆସନ୍ତାକାଲି ପ୍ରଭୁ ଗୋରେଖନାଥଙ୍କ ଜନ୍ମ ବାର୍ଷିକ ଉତ୍ସବ ପାଳିତ ହେବ । ଏଥିପାଇଁ ମନ୍ଦିର ପ୍ରଶାସନ ତରଫରୁ ବ୍ୟାପକ ବ୍ୟବସ୍ଥା କରାଯାଇଛି । ସକାଳ ୫ ଟାରେ ପହୁଡ ଖୋଲାଯିବା ପରେ ସ୍ନାନ, ମଙ୍ଗଳ ଆଳତୀ ,ଭୋଗ ଲାଗି କରାଯିବ ।
ଏହା ସହିତ ହୋମ ଯଜ୍ଞ କରାଯାଇ ଆହୁତି ପ୍ରଦାନ କରାଯିବ । ଶ୍ରଦ୍ଧାଳୁମାନେ କିଭଳି ସୁରୁଖୁରୁରେ ବାବା ଗୋରେଖନାଥଙ୍କୁ ଦର୍ଶନ କରିପାରିବେ ସେଥିପାଇଁ ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଶ୍ରଦ୍ଧାଳୁମାନଙ୍କ ପାଇଁ ମଧ୍ୟାହ୍ନରେ ପ୍ରସାଦ ସେବନର ବ୍ୟବସ୍ଥା କରାଯାଇଛି ।
ଭିଡ଼କୁ ଦୃଷ୍ଟିରେ ରଖି ପୋଲିସ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥାକୁ ମଧ୍ୟ କଡାକଡି କରାଯାଇଛି । ମନ୍ଦିରର ଦୁଇ ଶହ ମିଟର ଦୂରରେ ଗାଡ଼ି ପାର୍କିଂ କରିବା ସହିତ ମନ୍ଦିର ଭିତରକୁ ବେଢ଼ା ବାହାରେ ବିକ୍ରୀ ହେଉଥିବା ଭୋଗ, ଦୀପ ଓ ପୂଜା ସାମଗ୍ରୀକୁ ମନ୍ଦିର ଭିତରକୁ ବାରଣ କରାଯାଇଛି । ଶ୍ରଦ୍ଧାଳୁ ମାନଙ୍କ ଶୃଙ୍ଖଳିତ ଦର୍ଶନ ପାଇଁ ବ୍ୟାରିକେଡ଼ର ମଧ୍ୟ ବ୍ୟବସ୍ଥା କରାଯାଇଛି ।