ବାଲେଶ୍ୱର: ପାଣିରେ ବୁଡି ଶିଶୁ କନ୍ୟାର ଗଲା ଜୀବନ । ସୋର ଡାକ୍ତରଖାନା ଆଣିଥିବାବେଳେ ଡାକ୍ତର ମୃତ ଘୋଷଣା କରିଛନ୍ତି । ଖଇରା ଥାନା ଡାଲଙ୍ଗ -୨ ପଲ୍ହା ସାହି ଗ୍ରାମରେ ଘର ଆଗରେ ଥିବା ନଈରେ ପଡି ଜଣେ ଶିଶୁ କନ୍ୟାଙ୍କର ମୃତ୍ୟୁ ହୋଇ ଥିବା ପରିବାର ଲୋକେ କହିଛନ୍ତି । ଖଇରା ଥାନା ଡ଼ାଲଙ୍ଗ -୨ ପହ୍ଲାସାହି ଗ୍ରାମର ହରିହର ମହାରଣାଙ୍କ ଅଢେ଼ଇ ବର୍ଷର ଝିଅ ଆଦ୍ୟାଶା ମହାରଣା ଆଜି ସକାଳେ ଖେଳୁଥିବାବେଳେ ଘର ନିକଟରେ ଥିବା ନଈରେ ପଡି ଯାଇଥିଲେ ।
ନଈରେ ଅଧିକ ପାଣି ପ୍ରବାହିତ ହେଉଥିବାରୁ ଦୀର୍ଘ ସମୟ ଖୋଜାଖୋଜି କରିବା ପରେ ପରିବାର ଲୋକେ ତାଙ୍କୁ ଉଦ୍ଧାର କରି ମଧ୍ୟାହ୍ନରେ ସୋର ଡାକ୍ତରଖାନାକୁ ଆଣିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଖବର ପାଇ ସୋର ପୁଲିସ ଡାକ୍ତରଖାନାରେ ପହଞ୍ଚି ଶବ ବ୍ୟବଚ୍ଛେଦ ପାଇଁ ରଖିବା ସହିତ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
ବାତ୍ୟା ଦାନାର ଭୀଷଣ ତାଣ୍ଡବ ପରେ ଏବେ ଦାଉ ସାଧୁଛି ବନ୍ୟା । ବାଲେଶ୍ବର ଜିଲ୍ଲାର ସଦର ବ୍ଲକ ଅନ୍ତର୍ଗତ ବଇଁଞ୍ଚା ଗାଆଁରେ ବନ୍ୟା ହୋଇଥିବାରୁ ବାହ୍ୟ ଜଗତରୁ ବିଛିନ୍ନ ହୋଇଛି । କେବଳ ଏହି ଗୋଟିଏ ଗ୍ରାମ ପଞ୍ଚାୟତ ନୁହେଁ ପାଖାପାଖି ୨୦ ରୁ ଉର୍ଦ୍ଧ୍ବ ଗାଁ ଗୁଡ଼ିକ ଏବେ ବନ୍ୟା ଜଳରେ ପ୍ରଭାବିତ ହେଉଛନ୍ତି । ବାତ୍ୟା ପ୍ରଭାବରୁ ୨ ଦିନ ଲଗାଣ ବର୍ଷା ଫଳରେ ବୁଢ଼ାବଳଙ୍ଗ ନଦୀରେ ବିପତ ସଙ୍କେତ ମୁହାଁ ହେଉଛି ।