ଅର୍ଗସ ବ୍ୟୁରୋ : ବିଜେଡିକୁ ନେଇ ଏବେ ଚିନ୍ତାରେ ସଭାପତି ନବୀନ ପଟ୍ଟନାୟକ । କାରଣ ଦୀର୍ଘ ୨୪ ବର୍ଷ ଧରି ଶାସନ କରିବା ପରେ ଏବେ ସରକାରୀ ଦଳରୁ ବିରୋଧୀ ଦଳର ହୋଇଛି ଶଙ୍ଖ । ଲଗାତାର ମୁଖ୍ୟମନ୍ତ୍ରୀ ପଦରେ ଥିବା ନବୀନ ବି ବିରୋଧୀ ଦଳର ନେତା ହୋଇଛନ୍ତି । ଅବଶ୍ୟ ଦଳ ହଠାତ୍ ଏମିତି ପରାଜୟର ସ୍ଵାଦ ଚାଖିବ ତାହା କେହି ବି ବିଶ୍ଵାସ କରିନଥିଲେ । ହେଲେ ଏଥର ସବୁ ଓଲଟପାଲଟ ହୋଇଯାଇଛି । ତେଣୁ ଜନମତକୁ ସ୍ଵୀକାର କରିବା ଛଡ଼ା ବିଜେଡି ପାଖରେ କିଛି ଉପାୟ ବି ନାହିଁ । ହେଲେ ଏହାରି ଭିତରେ ନବୀନଙ୍କ ପ୍ରତିକ୍ରିୟାକୁ ନେଇ ସାଧାରଣରେ ଭାରି ଚର୍ଚ୍ଚା ।
ନବୀନଙ୍କୁ ଘାରିଛି କି ବିଜେଡି ଭାଙ୍ଗିଯିବା ଭୟ ? ଦଳ ଭିତରେ କନ୍ଦଳକୁ ନେଇ ଚିନ୍ତାରେ କି ନବୀନ ? କାରଣ ଦଳରେ ପାଣ୍ଡିଆନ ବିରୋଧୀ ଅସନ୍ତୋଷକୁ ନେଇ ଟେନସନରେ କି ବିଜେଡି ସୁପ୍ରିମୋ ? ଏକଜୁଟ୍ ହୋଇ ରହିବାକୁ ଦଳୀୟ କର୍ମୀଙ୍କୁ ନବୀନଙ୍କ ଆହ୍ୱାନ ପରେ ଉଠିଛି ଏମିତି ଅନେକ ପ୍ରଶ୍ନ । କାରଣ ଶନିବାର ନବୀନ ନିବାସରେ କବିସୂର୍ଯ୍ୟନଗର, ତେଲକୋଇ, ବାଙ୍କୀ ନିର୍ବାଚନ ମଣ୍ଡଳୀର ନେତା ଓ କର୍ମୀଙ୍କୁ ଭେଟିବା ବେଳେ ଏକଜୁଟ୍ ରହିବାକୁ ପରାମର୍ଶ ଦେଇଛନ୍ତି ନବୀନ । ଏହାସହ କହିଛନ୍ତି, ଅପେକ୍ଷା କର, ଆଉ ଏକଜୁଟ୍ ହୋଇ ରୁହ । ଦଳକୁ ମଜଭୁତ କର । ଆଉ ନବୀନଙ୍କ ଏହି ମନ୍ତବ୍ୟକୁ ନେଇ ରାଜ୍ୟ ରାଜନୀତିରେ ଚର୍ଚ୍ଚା ଯେତିକି, ବିଜେଡି ଅନ୍ଦର ମହଲରେ ବି ଆଲୋଚନା ବି ସେତିକି ।
କଥା ହେଲା ଏବେ ପ୍ରତିଦନ ନିର୍ବାଚନ ମଣ୍ଡଳୀ ୱାରି କିଛି ନେତାଙ୍କୁ ଡାକି ଆଲୋଚନା କରୁଛନ୍ତି ନବୀନ । ଫିଡ୍ ବ୍ୟାକ୍ ବି ନେଉଛନ୍ତି । ନେତାଙ୍କ ସହ ୱାନ ଟୁ ୱାନ ଆଲୋଚନା ବି କରୁଛନ୍ତି । କିନ୍ତୁ ପ୍ରଶ୍ନ , ନିର୍ବାଚନ ପରାଜୟର ସମୀକ୍ଷା ନ କରି କାହିଁକି ନିଇତି ନେତାଙ୍କୁ ଡାକି କରୁଛନ୍ତି ଆଲୋଚନା ? କେଉଁ ଗୁରୁତ୍ଵପୂର୍ଣ୍ଣ ବିଷୟକୁ ନେଇ ନବୀନଙ୍କୁ ଭେଟୁଛନ୍ତି ନେତା ? ପୂର୍ବରୁ ନବୀନ କୌଣସି ଦଳୀୟ ନେତାଙ୍କୁ ଭେଟୁନଥିଲେ କି ଆଲୋଚନା କରୁନଥିଲେ । ଏବେ କେମିତି ଆଲୋଚନା କରୁଛନ୍ତି ? କଣ ଆଲୋଚନା କରୁଛନ୍ତି ତାହାକୁ ନେଇ ଚର୍ଚ୍ଚା ଜୋର ।
ଏପଟେ, ଦୁଇଦିନ ତଳେ ଭୁବନେଶ୍ୱର ଏବଂ କଟକ ମହାନଗର ନିଗମରେ କମିଟି ଅଧ୍ୟକ୍ଷ ନିର୍ବାଚନରେ ବି ପଦାରେ ପଡିଥିଲା ଗୋଷ୍ଠୀ କନ୍ଦଳ । ପ୍ରଶ୍ନ ଉଠୁଛି ଦଳରେ ବିଭାଜନ ଆଶଙ୍କାରେ ସମୀକ୍ଷା କରିବାକୁ ପଛାଉଛନ୍ତି କି ନବୀନ ? ନିର୍ବାଚନ ଚାଲିଥିବା ବେଳେ ପାଣ୍ଡିଆନ ମଧ୍ୟ ସମାନ ଆଶାଙ୍କା କରିଥିଲେ । ବିଜେପି ୫୦ ଉପରକୁ ଗଲେ ବିଜେଡିକୁ ଭାଙ୍ଗି ସରକାର କରିବା ଥୟ ବୋଲି ଆଶଙ୍କା ପ୍ରକାଶ କରିଥିଲେ । ହେଲେ ରାଜ୍ୟରେ ବିଜେପି ୫୦ ନୁହେଁ ମ୍ୟାଜିକ ନମ୍ବରରୁ ବି ବହୁ ଅଧିକ ଭୋଟ୍ ପାଇଲା । ତେଣୁ ବିଜେଡି ନୁହେଁ ଏବେ ବିଜେପି ସରକାର ହେଲା । କିନ୍ତୁ ନବୀନ ଏବେ ଯେଉଁ ପରି ଭାବରେ ସମୀକ୍ଷା କରୁଛନ୍ତି ତାହାକୁ ନେଇ ଚର୍ଚ୍ଚା ଜୋର ।