8th Pay Commission / ଆପଣଙ୍କ ଦରମା ₹୫୦,୦୦୦ କି ? ଅଷ୍ଟମ ବେତନରେ କେତେ ମିଳିବ ଏରିଅର, ଜାଣନ୍ତୁ

ନୂଆଦିଲ୍ଲୀ: ଅଷ୍ଟମ ବେତନ ଆୟୋଗ ଅନୁସାରେ କେବେ ଦରମା ମିଳିବ ତାକୁ ନେଇ ଚାହିଁ ବସିଛନ୍ତି କେନ୍ଦ୍ର ସରକାରଙ୍କ କର୍ମଚାରୀ । ଅପେକ୍ଷାର ଅନ୍ତ ଘଟୁନାହିଁ । କମିଶନ ବର୍ତ୍ତମାନ ବିଭିନ୍ନ କର୍ମଚାରୀ ସଂଗଠନ ଏବଂ ଅନ୍ୟାନ୍ୟ ଅଂଶୀଦାରମାନଙ୍କଠାରୁ ପରାମର୍ଶ ନେଉଛି । ସରକାର କମିଶନକୁ ଏହାର ରିପୋର୍ଟ ଦାଖଲ କରିବାକୁ ୧୮ ମାସ ସମୟ ଦେଇଛନ୍ତି । ତେଣୁ ନୂତନ ଦରମା କାର୍ଯ୍ୟକାରୀ ହେବାରେ ଆଉ କିଛି ସମୟ ଲାଗିପାରେ ।

ମାତ୍ର ଏହାରି ଭିତରେ ସବୁଠାରୁ ବଡ଼ ପ୍ରଶ୍ନ ହେଉଛି ଯେ ଯଦି ନୂତନ ଦରମା ବିଳମ୍ବରେ ଲାଗୁ ହୁଏ, ତେବେ କର୍ମଚାରୀମାନେ ପୂର୍ବ ମାସଗୁଡ଼ିକର ବକେୟା ପାଉଣା ପାଇବେ କି ? ଯଦି ଜଣେ କର୍ମଚାରୀଙ୍କର ବର୍ତ୍ତମାନର ମୂଳ ଦରମା ₹୫୦,୦୦୦ ହୁଏ, ତେବେ ସେମାନେ କେତେ ଟଙ୍କା ପାଇପାରିବେ ? ସରକାରଙ୍କ ମତରେ ଅଷ୍ଟମ ବେତନ କମିଶନ ୧ ଜାନୁଆରୀ, ୨୦୨୬ରୁ ଲାଗୁ ହୋଇପାରେ । ଏହାର ଅର୍ଥ ହେଉଛି ଯେତେ ବିଳମ୍ବ ହେବ, ବକେୟା ସେତେ ଅଧିକ ହେବ ।

• ଆସନ୍ତୁ ୫୦,୦୦୦ ମୂଳ ଦରମାର ଗଣନା ବୁଝିବା

ଧରାଯାଉ ଜଣେ କର୍ମଚାରୀଙ୍କ ବର୍ତ୍ତମାନର ମୂଳ ଦରମା ₹୫୦,୦୦୦ । ସପ୍ତମ ବେତନ କମିଶନ ଅନୁଯାୟୀ, ବର୍ତ୍ତମାନ ମୂଳ ଦରମା ସହିତ DA ପୃଥକ ଭାବରେ ପ୍ରଦାନ କରାଯାଏ । ଜାନୁଆରୀ ୨୦୨୬ରୁ କେନ୍ଦ୍ର ସରକାରୀ କର୍ମଚାରୀଙ୍କ ପାଇଁ DA ୬୦%କୁ ବୃଦ୍ଧି କରିଥିଲେ । ଏହାର ଅର୍ଥ ହେଉଛି ଯେ ₹୫୦,୦୦୦ ମୂଳ ଦରମା ଉପରେ DA ପ୍ରାୟ ₹୩୦,୦୦୦ । ଫଳରେ କର୍ମଚାରୀ ଜଣକ ପ୍ରତି ମାସରେ ₹୮୦,୦୦୦ ମୋଟ ଦରମା ପାଆନ୍ତି ।

• ଫିଟମେଣ୍ଟ ଫ୍ୟାକ୍ଟର ଅନୁଯାୟୀ କେତେ ଦରମା ମିଳିବ ?

ଯଦି ବର୍ତ୍ତମାନର ମୂଳ ଦରମା ୫୦,୦୦୦ ଟଙ୍କା ଏବଂ DA ୩୦,୦୦୦ ଟଙ୍କା ହୁଏ, ତେବେ ମୂଳ ଏବଂ DA ମିଳିତ ଭାବରେ ୮୦,୦୦୦ ଟଙ୍କା ହେବ । ମାତ୍ର ଅଷ୍ଟମ ବେତନରେ ଫିଟମେଣ୍ଟ ଫ୍ୟାକ୍ଟର ଅନୁଯାୟୀ, ଦରମା ଆହୁରି ବଢିବ । ଏହାକୁ ଆହୁରି ସରଳ ଭାବେ ବୁଝିବା ଲାଗି ନିମ୍ନରେ ହିସାବ ଦିଆଯାଇଛି:

ଫିଟମେଣ୍ଟ ଫ୍ୟାକ୍ଟର ୨.୫୭ ହେଲେ:
ଅଷ୍ଟମ ବେତନ ଲାଗୁ ହେଲେ ଯଦି ଆପଣଙ୍କର ବେସିକ୍ ଦରମା ଏବେ ୫୦,୦୦୦ ଟଙ୍କା ଅଛି ତେବେ ତାହା ₹୧,୨୮,୫୦୦ ହେବ । ନୂତନ ଗଠନରେ DA ଶୂନରୁ ଆରମ୍ଭ ହୁଏ । ତେଣୁ DA ପାଇଁ ଅତିରିକ୍ତ ଟଙ୍କା ମିଳିବ ନାହିଁ । ଏଣୁ ଅଷ୍ଟମ ବେତନ ଲାଗୁ ହେଲେ ଆପଣ ବର୍ତ୍ତମାନର ଦରମା ଅପେକ୍ଷା ₹୪୮,୫୦୦ ପ୍ରତି ମାସରେ ଅଧିକ ପାଇବେ । ଏବେ ଯଦି ୧୨ ମାସ ପାଇଁ ବକେୟା ହିସାବ କରାଯାଏ, ତେବେ ଏହା ₹୫.୮୨ ଲକ୍ଷ ହେବ । ଯଦି ୧୮ ମାସ ପାଇଁ ବକେୟା ହିସାବ କରାଯାଏ, ତେବେ ଏହା ₹୮.୭୩ ଲକ୍ଷ ହେବ । ଏହାର ଅର୍ଥ ହେଉଛି ବର୍ତ୍ତମାନ ଦରମାରେ ପାର୍ଥକ୍ୟ ₹୫.୮୨ ଲକ୍ଷରୁ ₹୮.୭୩ ଲକ୍ଷ ପର୍ଯ୍ୟନ୍ତ ହୋଇପାରେ ।

ପଢନ୍ତୁ ଏହି ଖବର: ୨୫ବର୍ଷ ମଧ୍ୟରେ ଏପରି ହୋଇନଥିଲା...ଲଗାତାର ୮ମ ସପ୍ତାହରେ ଖସିଲା ସେୟାର ବଜାର

• ଯଦି ଫିଟମେଣ୍ଟ ଫ୍ୟାକ୍ଟର ୨.୮୬ ହୁଏ ତେବେ କଣ ହେବ?

ଏବେ ଆସନ୍ତୁ ସମାନ ଉଦାହରଣକୁ ୨.୮୬ ଫିଟମେଣ୍ଟ ଫ୍ୟାକ୍ଟର ସହିତ ବିଚାର କରିବା । ଯଦି ମୂଳ ଦରମା ₹୧,୪୩,୦୦୦ ଏବଂ ୬୦% DA ₹୮୦,୦୦୦ ହୁଏ, ତେବେ ଏବେ ଅପେକ୍ଷା ଆପଣଙ୍କୁ ପ୍ରତି ମାସରେ ଅଧିକ ₹୬୩,୦୦୦ ହେବ । ତେଣୁ ୧୨ ମାସ ପାଇଁ ପାର୍ଥକ୍ୟ ₹୭.୫୬ ଲକ୍ଷ, ଯେତେବେଳେ ୧୮ ମାସ ପାଇଁ ଏହା ₹୧୧.୩୪ ଲକ୍ଷ ହେବ ।

• କେବେ ରିପୋର୍ଟ ଦାଖଲ ହେବ ?

ଅଷ୍ଟମ କେନ୍ଦ୍ରୀୟ ବେତନ କମିଶନ ନଭେମ୍ବର ୨୦୨୫ରେ ଗଠିତ ହୋଇଥିଲା ଏବଂ ଏହାର ରିପୋର୍ଟ ଦାଖଲ କରିବା ପାଇଁ ୧୮ ମାସ ସମୟ ଦିଆଯାଇଛି । ଏହାର ଅର୍ଥ ହେଉଛି ସମୟସୀମା ଅନୁଯାୟୀ, କମିଶନ ୨୦୨୭ରେ ଏହାର ରିପୋର୍ଟ ଦାଖଲ କରିବେ ବୋଲି ଆଶା କରାଯାଉଛି । କମିଶନ ବର୍ତ୍ତମାନ କର୍ମଚାରୀ, ପେନସନଭୋଗୀ ଏବଂ ଅନ୍ୟାନ୍ୟ ଅଂଶୀଦାରମାନଙ୍କ ସହିତ ବୈଠକ କରୁଛନ୍ତି । ଏହାପରେ ରିପୋର୍ଟ ଉପରେ ସରକାରଙ୍କ ଅନୁମୋଦନ ଏବଂ ନୂତନ ଦରମା ମାଟ୍ରିକ୍ସ କାର୍ଯ୍ୟକାରୀ ହେବ ।