କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି ଆର୍ଥିକ ବର୍ଷ ୨୦୨୬-୨୭ ଲାଗି ପୂର୍ଣ୍ଣାଙ୍କ କେନ୍ଦ୍ର ବଜେଟ୍ ୨୦୨୬ ଉପସ୍ଥାପନ କରିଛନ୍ତି । ଏହା ଥିଲା ନିର୍ମଳାଙ୍କ କ୍ରମାଗତ ନବମ ବଜେଟ୍ । ନିର୍ମଳା ନିଜର ଐତିହାସିକ ବଜେଟ୍ ଉପସ୍ଥାପନ ବେଳେ ଅନେକ ଗୁରୁତ୍ବପୂର୍ଣ୍ଣ ଘୋଷଣା କରିଛନ୍ତି । ଯେଉଁଥିରେ କଷ୍ଟମ ଡ୍ୟୁଟି ହ୍ରାସ ପାଇଁ ଘୋଷଣା ହୋଇଛି, ଯାହାଦ୍ବାରା ଅନେକ ସାମଗ୍ରୀ ଶସ୍ତା ହେବାକୁ ଯାଉଛି । ସେହିପରି ୭ ହାଇସ୍ପିଡ୍ ରେଳ କରିଡର ନିର୍ମାଣ ପାଇଁ ଅର୍ଥମନ୍ତ୍ରୀ ଘୋଷଣା କରିଛନ୍ତି । ଏହାବ୍ୟତୀତ ସରକାରଙ୍କ ପୁରା ଫୋକସ୍ ଚାଷୀଙ୍କ ସମୃଦ୍ଧି ଉପରେ ରହିବ ବୋଲି ଅର୍ଥମନ୍ତ୍ରୀ କହିଛନ୍ତି ।
- ବଜେଟ୍ରେ ମଧ୍ୟବିତ୍ତଙ୍କ ପାଇଁ କଣ ଖାସ୍ ?
ଏହି ବଜେଟ୍ରେ ଟିକସ ସମ୍ପର୍କିତ ଆଶା ଅନୁଯାୟୀ ସେପରି କୌଣସି ଘୋଷଣା ହୋଇନାହିଁ । ଲୋକମାନେ ଆଶା କରିଥିଲେ ଯେ ମାନକ ଡିଡକ୍ସନ ସୀମା ୭୫,୦୦ ଟଙ୍କାରୁ ୧ ଲକ୍ଷ ଟଙ୍କାକୁ ବୃଦ୍ଧି କରାଯିବ, କିନ୍ତୁ ଏପରି କିଛି ହୋଇନାହିଁ । ଏପରି ପରିସ୍ଥିତିରେ, ମଧ୍ୟବିତ୍ତ ବର୍ଗ ଖାଲି ହାତରେ ରହିଛନ୍ତି । ତଥାପି, କିଛି ଘୋଷଣା ସେମାନଙ୍କ ପାଇଁ ଲାଭଦାୟକ ମନେ ହେଉଛି । ଏଥିରେ ଅତ୍ୟାବଶ୍ୟକ ଔଷଧ ଉପରେ ଶୁଳ୍କ ଛାଡ଼ କରାଯାଇଛି । ବଜେଟ୍ରେ କର୍କଟ ଏବଂ ମଧୁମେହ ସମେତ ୧୭ଟି ଔଷଧ ଉପରେ କଷ୍ଟମ୍ ଡ୍ୟୁଟି ଉଚ୍ଛେଦ କରାଯାଇଛି । ଏହା ବ୍ୟତୀତ, ଅନେକ ଉତ୍ପାଦ ଉପରେ କଷ୍ଟମ୍ ଡ୍ୟୁଟି ହ୍ରାସ ଯୋଗୁଁ ଜୋତା, ଚପଲ, ସ୍ମାର୍ଟଫୋନ ସମେତ ମଧ୍ୟବିତ୍ତ ବର୍ଗ ଦ୍ୱାରା ବ୍ୟବହୃତ ଅନେକ ଜିନିଷ ଶସ୍ତା ହୋଇଯିବ ।
- MSME ଲାଗି ୧୦,୦୦୦ କୋଟି ଫଣ୍ଡ୍
ଏମଏସଏମଇ ବା ଲଘୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ କ୍ଷେତ୍ର ଲାଗି ୧୦ ହଜାର କୋଟି ଟଙ୍କା ଆବଣ୍ଟନ କରାଯାଇଛି । ଯେଉଁଥିରେ ଭବିଷ୍ଯତରେ ଚମ୍ପିଆନ ଉଦ୍ୟୋଗପତିଙ୍କୁ ପ୍ରୋତ୍ସାହିତ କରାଯିବାକୁ ଲକ୍ଷ୍ୟ ରଖାଯାଇଛି ।
- ସ୍ବାସ୍ଥ୍ୟ କ୍ଷେତ୍ର ଲାଗି କଣ ଯୋଜନା ?
ବଜେଟ୍ ୨୦୨୬ରେ ସ୍ବାସ୍ଥ୍ୟ ଓ ଚିକିତ୍ସା କ୍ଷେତ୍ର ଉପରେ ଧ୍ୟାନ ଦିଆଯାଇଛି । ଅର୍ଥମନ୍ତ୍ରୀ ଘୋଷଣା କରିଛନ୍ତି ଯେ ୫ ମେଡିକାଲ ହବ୍ରେ ଘରୋଇ ସେକ୍ଟରର ଯୋଗଦାନ ରହିବ, ସେଠାରେ ଆୟୁଷ କେନ୍ଦ୍ର, ଡାଇଗ୍ନୋଷ୍ଟିକ୍ ସର୍ଭିସ୍, ଚିକିତ୍ସା ପରବର୍ତ୍ତୀ ଯତ୍ନ ଓ ରିହ୍ୟାବ୍ ସେଣ୍ଟର ବିକଶିତ କରାଯିବ । ଏଥିରୁ ସ୍ବାସ୍ଥ୍ୟ କ୍ଷେତ୍ରରେ ରୋଜଗାର ବଢିବ । ଏହାବ୍ୟତୀତ ଉଚ୍ଚ ଗୁଣବତ୍ତା ଆୟୁର୍ବେଦିକ ଉତ୍ପାଦର ରପ୍ତାନିକୁ ବୃଦ୍ଧି କରାଯାଇପାରିବ । ଏକ ବାୟୋଫାର୍ମା ଯୋଜନାର ମଧ୍ୟ ଘୋଷଣା କରାଯାଇଛି ।
ଅର୍ଥମନ୍ତ୍ରୀ ନିର୍ମଳା ସୀତାରମଣ ନିଜ ଅଭିଭାଷଣରେ ଚାଷୀ ଓ କୃଷି ବିଭାଗ ଲାଗି ବଡ଼ ଘୋଷଣା କରିଛନ୍ତି । ପଶୁପାଳନ କ୍ଷେତ୍ରରେ ରୋଜଗାରକୁ ବୃଦ୍ଧି କରିବା ଲାଗି କ୍ରେଡିଟ୍-ଲିଙ୍କଡ୍ ସବସିଡି ପ୍ରୋଗ୍ରାମ ଆରମ୍ଭ କରାଯିବ । ଦୁଗ୍ଧ, କୁକୁଡ଼ା ଓ ପଶୁପାଳନ ବ୍ୟବସାୟର ଆଧୁନିକୀକରଣ କରାଯିବ । ନଡ଼ିଆ ଓ ଚନ୍ଦନ ଭଳି ଉଚ୍ଚ ମୂଲ୍ୟର ଫସଲକୁ ସମର୍ଥନ ଲାଗି 'କୋକୋନଟ୍ ପ୍ରୋତ୍ସାହନ ଯୋଜନା' ସାହାଯ୍ୟରେ ୧ କୋଟି ଚାଷୀ ଓ ୩ କୋଟି ଲୋକଙ୍କୁ ସହାୟତା କରାଯାଇପାରିବ । ସେହିପରି 'AI ଏଗ୍ରୀ ଟୁଲ୍' ଚାଷୀଙ୍କ ଉତ୍ପାଦନକୁ ବୃଦ୍ଧି କରିବା ଓ ଉନ୍ନତ ଫସଲ ପ୍ରଦାନରେ ସାହାଯ୍ୟ କରିବ ।
ବଜେଟ୍ରେ ୨୦୨୬-୨୭ ଆର୍ଥିକ ବର୍ଷ ପାଇଁ ପ୍ରତିରକ୍ଷା ମନ୍ତ୍ରଣାଳୟକୁ ₹୭.୮ ଲକ୍ଷ କୋଟି ଆବଣ୍ଟିତ ହୋଇଛି । ଏହା ସାମରିକ ଆଧୁନିକୀକରଣ ଉପରେ ସରକାରଙ୍କ ଧ୍ୟାନକୁ ପ୍ରତିଫଳିତ କରେ । ପ୍ରତିରକ୍ଷା ବାହିନୀ ପାଇଁ ପୁଞ୍ଜି ଖର୍ଚ୍ଚ ₹୨.୧୯ ଲକ୍ଷ କୋଟି ହେବ ବୋଲି ଆକଳନ କରାଯାଇଛି, ଯାହା ଗତ ବର୍ଷ ₹୧.୮୦ ଲକ୍ଷ କୋଟି ଥିଲା । ଅପରେସନ ସିନ୍ଦୂରର ସଫଳତା ପୂର୍ବରୁ ପ୍ରତିରକ୍ଷା କ୍ଷେତ୍ର ପାଇଁ ପ୍ରମୁଖ ଘୋଷଣାର ଆଶା ବଢ଼ାଇ ଦେଇଥିଲା ।
- କ୍ରୀଡାବିତ୍ଙ୍କୁ ପ୍ରୋତ୍ସାହନ ଉଦ୍ୟମ
ସରକାର କ୍ରୀଡ଼ା କ୍ଷେତ୍ରକୁ ବି ବେଶ ଧ୍ୟାନରେ ରଖିଛନ୍ତି । ଏଥିଲାଗି 'ଖେଲୋ ଇଣ୍ଡିଆ' ମିଶନକୁ ଆଗାମୀ ୧୦ ବର୍ଷ ଲାଗି ମଜଭୁତ କରିବା ପାଇଁ ଘୋଷଣା ହୋଇଛି । ଏହି ମିଶନ ଅନୁସାରେ ଟ୍ରେନିଂ ସେଣ୍ଟର ନିର୍ମାଣ ହେବ । ଏହାସହ କୋଚ୍ ଓ ଷ୍ଟାଫଙ୍କୁ ତାଲିମ ଦିଆଯିବ । ଏହାବ୍ଯତୀତ କ୍ରୀଡ଼ା ସାମଗ୍ରୀ ଉପରେ କଷ୍ଟମ ହ୍ରାସ ଯୋଗୁଁ ଏହା ଶସ୍ତା ହେବ ।
- ମହିଳାଙ୍କ ଲାଗି SHE-ମାର୍ଟ୍ସ ଘୋଷଣା
ଗ୍ରାମୀଣ ମହିଳାମାନଙ୍କ ପାଇଁ ସି-ମାର୍ଟ ଘୋଷଣା କରାଯାଇଛି । ମହିଳାମାନଙ୍କ ନେତୃତ୍ୱାଧୀନ ବ୍ୟବସାୟକୁ ପ୍ରୋତ୍ସାହିତ କରିବା ପାଇଁ SHE (ସ୍ୱୟଂ ସହାୟକ ଉଦ୍ୟୋଗୀ) ମାର୍ଟ ପ୍ରତିଷ୍ଠା କରାଯିବ, ଯାହା ମହିଳାମାନଙ୍କୁ ସହଜରେ ସେମାନଙ୍କର ଉତ୍ପାଦ ବିକ୍ରି କରିବାକୁ ଅନୁମତି ଦେବ । ଅର୍ଥମନ୍ତ୍ରୀ ଲକ୍ଷପତି ଦିଦି ଯୋଜନାର ସଫଳତା ବିଷୟରେ ମଧ୍ୟ ଉଲ୍ଲେଖ କରିଥିଲେ । ଏହା ସହିତ, ପ୍ରାୟ ୮୦୦ ଜିଲ୍ଲାରେ ମହିଳା ଛାତ୍ରୀମାନଙ୍କ ପାଇଁ ଛାତ୍ରାବାସ ନିର୍ମାଣ କରାଯିବ, ପ୍ରତ୍ୟେକ ଜିଲ୍ଲାରେ ଅତି କମରେ ଗୋଟିଏ ଛାତ୍ରାବାସ ନିର୍ମାଣ କରିବାର ଲକ୍ଷ୍ୟ ରଖାଯାଇଛି ।
- ବିଦେଶରେ ପାଠ ପଢିବା ପାଇଁ ଛାତ୍ରଙ୍କୁ ଭେଟି
ଭାରତ ବାହାରେ ମେଡିକାଲ ଓ ଉଚ୍ଚ ଶିକ୍ଷା ପାଇଁ ଯାଉଥିବା ଛାତ୍ରଛାତ୍ରୀଙ୍କ ଲାଗି ବଜେଟ୍ରେ ଗୁରୁତ୍ବପୂର୍ଣ୍ଣ ଘୋଷଣା କରାଯାଇଛି । ସରକାର TCS ଦରକୁ ୫ ପ୍ରତିଶତରୁ ହ୍ରାସ କରି ୨ ପ୍ରତିଶତ କରିଛି । ଅର୍ଥାତ ଆପଣ ବିଦେଶରେ ପଇସା ଖର୍ଚ୍ଚ କଲେ କମ ସୁଧ ଦେବାକୁ ପଡ଼ିବ । ସିଧାସିଧା କହିଲେ, ଏବେ ବିଦେଶରେ ପାଠ ପଢିବା ଶସ୍ତା ହେବ । ଯେଉଁ ଛାତ୍ରଛାତ୍ରୀ ଉଚ୍ଚ ଶିକ୍ଷା ଲାଗି ବିଦେଶ ଯିବାକୁ ଚାହୁଁଛନ୍ତି, ସେମାନେ ବେଶ ଉପକୃତ ହେବେ ।
ବଜେଟ୍ ଭାଷଣରେ ଅର୍ଥମନ୍ତ୍ରୀ ମାନୁଫାକଚରିଂ ସେକ୍ଟର ଉପରେ ବିଶେଷ ଫୋକସ୍ କରିଛନ୍ତି । ଇଏମଏସ ବା ଇଲେକ୍ଟ୍ରୋନିକ୍ସ ମାନୁଫାକଚରିଂ ସର୍ଭିସ ସେକ୍ଟର ଲାଗି ୪୦,୦୦୦ କୋଟି ଟଙ୍କା ଖର୍ଚ୍ଚ କରାଯିବ ବୋଲି ଘୋଷଣା ହୋଇଛି । ଗତବର୍ଷ ଏଥିଲାଗି ବଜେଟ୍ ୧୯,୫୦୦ କୋଟି ଟଙ୍କା ଥିଲା ।
- 'ମେକ୍ ଇନ୍ ଇଣ୍ଡିଆ'କୁ ପ୍ରୋତ୍ସାହନ
ସରକାର ସ୍ବଦେଶୀ ସାମଗ୍ରୀ ଉପରେ ଅଧିକ ଗୁରୁତ୍ବ ଦେଇଛନ୍ତି । ଏଣୁ ଆଗାମୀ ଦିନରେ ବୈଦ୍ୟୁତିକ ଯାନର ବିଭିନ୍ନ ଯନ୍ତ୍ରାଂଶ, ଲିଥିଅମ ବ୍ୟାଟେରୀ, ମୋବାଇଲ ଉତ୍ପାଦନ, ସୌର ପିଭି ସେଲ୍ ଏବଂ ୩୬ଟି ଜୀବନରକ୍ଷକ ଔଷଧ ଉପରେ କଷ୍ଟମ ଡ୍ୟୁଟି ବା ସୀମା ଶୁଳ୍କ ଛାଡ଼ କରାଯାଇଛି ।
ଏଥିସହ ପଢନ୍ତୁ: ପ୍ରତିରକ୍ଷା ମନ୍ତ୍ରଣାଳୟ ଉପରେ 'ଅପରେସନ ସିନ୍ଦୂର'ର ପ୍ରଭାବ; ୧୫% ବଢିଲା ବଜେଟ୍
