Union Budget Highlights / କେନ୍ଦ୍ରୀୟ ବଜେଟ୍ ୨୦୨୬; ମହଙ୍ଗା ହେଲା ମଦ; ଶସ୍ତା ହେଲା ଟିଭି, ଫ୍ରିଜ୍

ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି (ରବିବାର) ପୂର୍ଣ୍ଣାଙ୍ଗ କେନ୍ଦ୍ର ବଜେଟ୍ ୨୦୨୬ ଉପସ୍ଥାପନ କରିଛନ୍ତି । ସେ ନିଜ ଅଭିଭାଷଣରେ ଅର୍ଥମନ୍ତ୍ରୀ ଅନେକ ଗୁରୁତ୍ବପୂର୍ଣ୍ଣ ଘୋଷଣା କରିଛନ୍ତି । ସାଧାରଣତଃ ବଜେଟ୍ ଆସିଲେ ମଧ୍ୟବିତ୍ତମାନେ କଣ ଶସ୍ତା ହେବ ଓ କଣ ମହଙ୍ଗା ହେବ ତାହା ଉପରେ ବିଶେଷ ଭାବରେ ନଜର ରଖିଥାନ୍ତି । ତେବେ ଚଳିତ ବଜେଟ୍‌ରେ ମଧ୍ୟ ଏ ନେଇ ନିର୍ମଳା ଘୋଷଣା କରିଛନ୍ତି ।

ପ୍ରତିବର୍ଷ ସରକାର ଘରୋଇ ଉତ୍ପାଦନକୁ ସମର୍ଥନ କରିବା, ଆମଦାନୀ ନିୟନ୍ତ୍ରଣ କରିବା ଏବଂ ଚାହିଦା ବୃଦ୍ଧି କରିବା ପାଇଁ ସୀମା ଶୁଳ୍କ ଏବଂ ଉତ୍ପାଦ ଶୁଳ୍କର ସନ୍ତୁଳନ ରକ୍ଷା କରନ୍ତି । ଯେତେବେଳେ ଶୁଳ୍କ ହ୍ରାସ କରାଯାଏ, ସାଧାରଣତଃ ଗ୍ରାହକମାନଙ୍କ ପାଇଁ ମୂଲ୍ୟ ହ୍ରାସ ପାଏ । ଯେତେବେଳେ ଶୁଳ୍କ ବୃଦ୍ଧି କରାଯାଏ, କିଛି ଜିନିଷ ମହଙ୍ଗା ହୋଇଯାଏ । ଏଥର ଅନେକ ଜିନିଷ ଶସ୍ତା ହୋଇଥିବାବେଳେ ମଦ ମହଙ୍ଗା ହୋଇଛି ।

କଣ ଶସ୍ତା ହେଲା ?

ମୌଳିକ ସୀମା ଶୁଳ୍କ ଓ ଅନ୍ୟାନ୍ୟ ଟିକସ ଛାଡ଼ ଯୋଗୁଁ ଅନେକ ସାମଗ୍ରୀ ଶସ୍ତା ହେବାକୁ ଯାଉଛି । ସେଗୁଡ଼ିକ ହେଉଛି:

ଅତ୍ୟାବଶ୍ୟକୀୟ ଔଷଧ: ମୌଳିକ ସୀମା ଶୁଳ୍କ ଛାଡ଼ ଯୋଗୁଁ ୧୭ଟି କର୍କଟ ଔଷଧ ଏବଂ କିଛି ମଧୁମେହ ଔଷଧ ଅଧିକ ସୁଲଭ ହେବ ।
ଇଲେକ୍ଟ୍ରୋନିକ୍ସ: ସ୍ମାର୍ଟଫୋନ, ଇଭି ବ୍ୟାଟେରୀ ଏବଂ ସୌର ପ୍ୟାନେଲ ଶସ୍ତା ହେବ ।
ଚମଡ଼ା ସାମଗ୍ରୀ: ଚମଡ଼ାରୁ ତିଆରି ଉତ୍ପାଦ ଯେପରିକି ଜୋତା, ବ୍ୟାଗ୍ ଅଧିକ ସୁଲଭ ହେବ।
ଭ୍ରମଣ: ବିଦେଶ ପର୍ଯ୍ୟଟନ ପ୍ୟାକେଜଗୁଡ଼ିକ ଶସ୍ତା ହେବ ।
ଶିକ୍ଷା: ବିଦେଶୀ ଶିକ୍ଷା ଖର୍ଚ୍ଚ ଅଧିକ ସୁଲଭ ହେବ ।
କ୍ରୀଡା ଉପକରଣ: କ୍ରୀଡାବିତମାନଙ୍କୁ ଉତ୍ସାହିତ କରିବା ପାଇଁ କ୍ରୀଡା ସାମଗ୍ରୀ ଅଧିକ ସୁଲଭ ହେବ ।
ଖାଦ୍ୟପାନୀୟ: ବାୟୋଗ୍ୟାସ୍ ଆଧାରିତ ସିଏନଜି ଅଧିକ ଶସ୍ତା ହେବ ।
ବିମାନ ସାମଗ୍ରୀ: ବିମାନରେ ବ୍ୟବହୃତ ସାମଗ୍ରୀ ପୂର୍ବାପେକ୍ଷା ଶସ୍ତା ହେବ ।
ପରମାଣୁ ଶକ୍ତି: ପରମାଣୁ ଶକ୍ତି ପ୍ରକଳ୍ପ ପାଇଁ ଆମଦାନୀ ହେଉଥିବା ସାମଗ୍ରୀଗୁଡ଼ିକୁ ମୌଳିକ ସୀମା ଶୁଳ୍କରୁ ମୁକ୍ତ କରାଯିବ । ଫଳରେ ଏହା ଶସ୍ତା ହେବ ।
ମାଇକ୍ରୋୱେଭ୍ ଓଭେନ୍: ମାଇକ୍ରୋୱେଭ୍ ଓଭେନ୍ ତିଆରି ପାଇଁ ବ୍ୟବହୃତ ଅଂଶଗୁଡ଼ିକ ମୌଳିକ ସୀମା ଶୁଳ୍କରୁ ମୁକ୍ତ ହେବା ଯୋଗୁଁ ଏହା ଶସ୍ତା ହେବ ।
ବୈଦ୍ୟୁତିକ ଯାନ: ବ୍ୟାଟେରୀ ଉତ୍ପାଦନରେ ବ୍ୟବହୃତ କଞ୍ଚାମାଲ ଉପରେ ଟିକସ ହ୍ରାସ କରାଗଲେ ବୈଦ୍ୟୁତିକ କାର ଏବଂ ଦୁଇଚକିଆ ଯାନ ଅଧିକ ସୁଲଭ ହୋଇପାରିବ।
ଜୀବନ ରକ୍ଷାକାରୀ ଔଷଧ: ଗୁରୁତ୍ୱପୂର୍ଣ୍ଣ ଚିକିତ୍ସା ଉପକରଣ ଏବଂ ଜୀବନ ରକ୍ଷାକାରୀ କର୍କଟ ଔଷଧ ଶସ୍ତା ହେବ ।
ଘରୋଇ ଇଲେକ୍ଟ୍ରୋନିକ୍ସ: ଟେଲିଭିଜନ ଏବଂ ରେଫ୍ରିଜିରେଟର ଭଳି ଘରୋଇ ଇଲେକ୍ଟ୍ରୋନିକ୍ସର ମୂଲ୍ୟ ହ୍ରାସ ପାଇପାରେ ।



କଣ ହେଲା ମହଙ୍ଗା ?

ମାଦକ ଦ୍ରବ୍ୟ: ମଦ, ସିଗାରେଟ ପରି ନିଶା ଦ୍ରବ୍ୟ ଅଧିକ ମହଙ୍ଗା ହେବ । ପାନ ମସଲା ଓ ତମାଖୁ ଜାତୀୟ ପଦାର୍ଥ ମଧ୍ୟ ପୂର୍ବାପେକ୍ଷା ଅଧିକ ମହଙ୍ଗା ହେବ ।
ବିଦେଶୀ କାର: ଅନ୍ୟ ଦେଶରୁ ଆମଦାନୀ ହେଉଥିବା ପ୍ରିମିୟମ କାର ଉପରେ ଟ୍ୟାକ୍ସ ବଢିବା ଯୋଗୁଁ ଏହା ମଧ୍ୟ ମହଙ୍ଗା ହେବ ।
କସମେଟିକ୍ସ: ବାହାର ଦେଶରୁ ଆମଦାନୀ ହେଉଥିବା ଲଗଜରୀ ବ୍ୟୁଟି ପ୍ରଡକ୍ଟ୍ସ ଯେପରିକି ଅତର, ମେକଅପ୍ ସାମଗ୍ରୀ ମହଙ୍ଗା ହେବ ।
ସୁନାରୁପା: ଯଦି ଆମଦାନୀ ଶୁଳ୍କରେ କୌଣସି ପରିବର୍ତ୍ତନ ହୁଏ, ତେବେ ଭବିଷ୍ୟତରେ ସୁନା ଓ ରୁପା ଅଳଙ୍କାର ମଧ୍ୟ ମହଙ୍ଗା ହେବ ।

ଖୁବଶୀଘ୍ର ବଜାରରେ ମଦ ମହଙ୍ଗା ହେବାକୁ ଯାଉଛି । ଯଦି ଆମେ ତଥ୍ୟ ଦେଖିବା ତେବେ ଭାରତରେ ପ୍ରାୟ ୧୬ କୋଟି ଲୋକେ ମଦ୍ୟପାନ କରନ୍ତି । ତେବେ ସର୍ବାଧିକ ସହରାଞ୍ଚଳରେ ମଦପାନ କରାଯାଏ । ଏଥିରେ ପୁରୁଷଙ୍କ ସଂଖ୍ୟା ୨୨.୪%ରୁ ୨୭.୩% ଥିବାବେଳେ ମହିଳାଙ୍କ ସଂଖ୍ୟା ୨ ପ୍ରତିଶତ ରହିଛି । ତେବେ ମଦ ମହଙ୍ଗା ହେବା ପରେ ଏହି ବର୍ଗ ପ୍ରଭାବିତ ହେବେ ।

ଏଥିସହ ପଢନ୍ତୁ: ଆୟକର ଫାଙ୍କିଲେ ଆଉ ମିଳିବନି ଦଣ୍ଡ, ଅତିରିକ୍ତ ୩୦% ଟିକସ ଦେଇ ମୁକୁଳିପାରିବେ