କେନ୍ଦ୍ରୀୟ କର୍ମଚାରୀଙ୍କ ପାଇଁ ଖୁସି ଖବର । ସରକାର ୬୦% ମହଙ୍ଗା ଭତ୍ତା ବୃଦ୍ଧି କାର୍ଯ୍ୟକାରୀ ହୋଇଛି । କେନ୍ଦ୍ର ସରକାର ଏଥିପାଇଁ ନିର୍ଦ୍ଦେଶ ଜାରି କରିଛନ୍ତି । ଏହି ମହଙ୍ଗା ଭତ୍ତା ୧ ଜାନୁଆରୀ, ୨୦୨୬ରୁ କାର୍ଯ୍ୟକାରୀ ହେବ । ଦୁଇ ଦିନ ପୂର୍ବରୁ ସରକାର କେନ୍ଦ୍ରୀୟ କର୍ମଚାରୀଙ୍କ ପାଇଁ ମହଙ୍ଗା ଭତ୍ତା ୨ ପ୍ରତିଶତ ବୃଦ୍ଧି ଘୋଷଣା କରିଥିଲେ । ପୂର୍ବରୁ ଏହା ୫୮ ପ୍ରତିଶତ ଥିଲା ।

କେନ୍ଦ୍ର ସରକାରଙ୍କ ଅଧୀନରେ କାମ କରୁଥିବା ସରକାରୀ କର୍ମଚାରୀମାନେ ବହୁ ଦିନ ଧରି ମହଙ୍ଗା ଭତ୍ତା ବୃଦ୍ଧି ପାଇଁ ଦାବି କରିଆସୁଥିଲେ । କିନ୍ତୁ, ଏଥର ମହଙ୍ଗା ଭତ୍ତା ବୃଦ୍ଧି ଘୋଷଣା ବହୁତ ବିଳମ୍ବରେ ହୋଇଛି । ଏହି ବୃଦ୍ଧି ସିଧାସଳଖ କର୍ମଚାରୀଙ୍କ ଦରମା ଉପରେ ପ୍ରଭାବ ପକାଇବ । ଉଦାହରଣ ସ୍ୱରୂପ, ଯଦି ଜଣେ କର୍ମଚାରୀଙ୍କ ମୂଳ ଦରମା ₹୫୦,୦୦୦ ହୁଏ, ତେବେ ସେମାନେ ପ୍ରତି ମାସରେ ଅତିରିକ୍ତ ପ୍ରାୟ ₹୧,୦୦୦ ଟଙ୍କା ଅଧିକ ପାଇବେ ।

• ଦରମା କେତେ ବଢିବ ?

ସାଧାରଣତଃ କର୍ମଚାରୀମାନେ ଭାବୁଥିବା ଏହି ୨ ପ୍ରତିଶତ ମହଙ୍ଗା ଭତ୍ତା ବଢିବା ପରେ ସେମାନଙ୍କ ଦରମା କେତେ ବଢିବ ? ଧରାଯାଉ ଜଣେ କେନ୍ଦ୍ର ସରକାରୀ କର୍ମଚାରୀଙ୍କ ମୂଳ ଦରମା ୫୦,୦୦୦ ଟଙ୍କା । ପୂର୍ବରୁ ୫୮ ପ୍ରତିଶତ ହାରରେ, ସେମାନଙ୍କର ପୂର୍ବ ମହଙ୍ଗା ଭତ୍ତା ୨୯,୦୦୦ ଥିଲା । ମାତ୍ର ବର୍ତ୍ତମାନ DA ୬୦ ପ୍ରତିଶତକୁ ବୃଦ୍ଧି ପାଇଛି, ଯାହାଦ୍ଵାରା ସେମାନଙ୍କର ମହଙ୍ଗା ଭତ୍ତା ୩୦,୦୦୦କୁ ବୃଦ୍ଧି ପାଇବ । ଅର୍ଥାତ ସେମାନେ ଏପ୍ରିଲଠାରୁ ଅତିରିକ୍ତ ୧୦୦୦ ଟଙ୍କା DA ପାଇବେ । ଯେହେତୁ DA ବୃଦ୍ଧି ଜାନୁଆରୀ ୧, ୨୦୨୬ରୁ କାର୍ଯ୍ୟକାରୀ ହେଉଛି, ସେମାନେ ପୂର୍ବ ତିନି ମାସର ବକେୟା ମଧ୍ୟ ପାଇବେ ।

• ପେନସନଭୋଗୀ କିପରି ଲାଭବାନ ହେବେ ?

ମହଙ୍ଗା ଭତ୍ତା ୨ ପ୍ରତିଶତ ବଢିବା ପରେ ପେନସନଭୋଗୀ ମଧ୍ୟ ଉପକୃତ ହେବେ । ଯଦି ଜଣେ କେନ୍ଦ୍ର ସରକାରଙ୍କ ପେନସନଭୋଗୀ ପ୍ରତି ମାସରେ ୬୦,୦୦୦ ମୂଳ ପେନସନ ପାଆନ୍ତି, ତେବେ ସେମାନେ ପୂର୍ବ DR ହାର ୫୮%ରେ ୩୪,୮୦୦ ଟଙ୍କା ପାଉଥିଲେ । ବର୍ତ୍ତମାନ DR ୬୦% କୁ ବୃଦ୍ଧି ପାଇଛି, ତେଣୁ ସେମାନେ ପ୍ରତି ମାସରେ ୩୬,୦୦୦ ମହଙ୍ଗା ଭତ୍ତା ପାଇବେ । ଏହାର ଅର୍ଥ ହେଉଛି ସେମାନଙ୍କର ପେନସନ ପ୍ରତି ମାସରେ ୧,୨୦୦ ବୃଦ୍ଧି ପାଇବ ।

• କର୍ମଚାରୀଙ୍କ ପାଇଁ ଆଶ୍ୱସ୍ତି

ମହଙ୍ଗା ଭତ୍ତା ବଢିବା ପରେ ଏହା ବୃଦ୍ଧି ପାଉଥିବା ମୁଦ୍ରାସ୍ଫୀତି ମଧ୍ୟରେ ସରକାରୀ କର୍ମଚାରୀଙ୍କ ଆୟକୁ କିଛି ଆଶ୍ୱସ୍ତି ଦେବ ବୋଲି ଆଶା କରାଯାଉଛି । ଏହି ୨ ପ୍ରତିଶତ ବୃଦ୍ଧି ସରକାରଙ୍କ ନିୟମିତ ଦ୍ଵିବାର୍ଷିକ କାର୍ଯ୍ୟକ୍ରମର ଏକ ଅଂଶ, ଯାହା ମାଧ୍ୟମରେ ସରକାର କର୍ମଚାରୀଙ୍କ ପ୍ରକୃତ ଆୟକୁ ସୁରକ୍ଷା ମିଳେ ଏବଂ ମହଙ୍ଗା ମାଡ଼ର ବୋଝରୁ କର୍ମଚାରୀଙ୍କୁ ଆଶ୍ଵସ୍ତି ମିଳେ । ଜାନୁଆରୀ ୨୦୨୬ରୁ ବକେୟା ସମେତ ସଂଶୋଧିତ ମହଙ୍ଗା ଭତ୍ତା (DA) ପ୍ରଦାନ କରାଯିବ, ଯାହା ଲକ୍ଷ ଲକ୍ଷ କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀଙ୍କୁ ଲାଭ ଦେବ ।

ପଢନ୍ତୁ ଏହି ଖବର: ନୂଆ ଶ୍ରମ ଆଇନ୍ କରିବ ମାଲେମାଲ୍; ଓଭର ଟାଇମ୍ କଲେ ମିଳିବ ଦ୍ଵିଗୁଣା ଦରମା

• କେଉଁ କର୍ମଚାରୀଙ୍କ ଉପରେ ଲାଗୁ ହେବ ?

ଅର୍ଥ ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ଏହି ସ୍ମାରକପତ୍ରରେ ସ୍ପଷ୍ଟ ଭାବରେ କୁହାଯାଇଛି ଯେ ସଂଶୋଧିତ DA ହାର କେବଳ କେନ୍ଦ୍ର ସରକାରଙ୍କ ନାଗରିକ କର୍ମଚାରୀଙ୍କ ପାଇଁ ନୁହେଁ, ବରଂ ପ୍ରତିରକ୍ଷା ସେବା ଆକଳନରୁ ଦରମା ନେଉଥିବା ବ୍ୟକ୍ତିଙ୍କ ପାଇଁ ମଧ୍ୟ ପ୍ରଯୁଜ୍ୟ ହେବ । ମାତ୍ର ସଶସ୍ତ୍ର ବାହିନୀ କର୍ମଚାରୀ ଏବଂ ରେଳ କର୍ମଚାରୀଙ୍କ ପାଇଁ ପ୍ରତିରକ୍ଷା ମନ୍ତ୍ରଣାଳୟ ଏବଂ ରେଳ ମନ୍ତ୍ରଣାଳୟ ପକ୍ଷରୁ ଯଥାକ୍ରମେ ଆଉ ଏକ ଅଲଗା ନିର୍ଦ୍ଦେଶ ଜାରି କରାଯିବାର ଆଶା କରାଯାଉଛି ।