Argus News - ସରକାରୀ କର୍ମଚାରୀଙ୍କ ଲାଗି ଖୁସି ଖବର; ମିଳିଲା ମଞ୍ଜୁରୀ, ବଢିବ ଦରମା

ଦେଶର କୋଟି କୋଟି କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀଙ୍କ ଅପେକ୍ଷାର ଅନ୍ତ ଘଟିଛି । ଆଜି (ଶନିବାର) ଏମାନଙ୍କ ପାଇଁ ମହଙ୍ଗା ଭତ୍ତା (DA)ରେ ୨% ବୃଦ୍ଧିକୁ କ୍ୟାବିନେଟ୍ ଅନୁମୋଦନ ପ୍ରଦାନ କରିଛନ୍ତି । ଏହା କେନ୍ଦ୍ର ସରକାରୀ କର୍ମଚାରୀଙ୍କ ମହଙ୍ଗା ଭତ୍ତା ଏବଂ ପେନସନ ୫୮% ରୁ ୬୦%କୁ ବୃଦ୍ଧି କରିବ । କେନ୍ଦ୍ରର କର୍ମଚାରୀମାନେ ବହୁ ଦିନ ଧରି ମହଙ୍ଗା ଭତ୍ତା ପାଇଁ ଅପେକ୍ଷା କରିଥିଲେ । ଜାନୁଆରୀ ୧, ୨୦୨୬ରୁ ଏହା କାର୍ଯ୍ୟକାରୀ ହେଉଥିବାରୁ କର୍ମଚାରୀମାନେ ପୂର୍ବ ତିନି ମାସର ବକେୟା ମଧ୍ୟ ପାଇବେ ।

ତେବେ ଚଳିତ ବର୍ଷ ଜାନୁଆରୀରେ ଲାଗୁ ହେବାକୁ ଥିବା ଏହି ଭତ୍ତା ମାର୍ଚ୍ଚ ଆରମ୍ଭରୁ ଅପେକ୍ଷା କରାଯାଇଥିଲା । ସରକାର ସାଧାରଣତଃ ମାର୍ଚ୍ଚରେ ଏହି ଘୋଷଣା କରନ୍ତି । କିନ୍ତୁ ଚଳିତ ବର୍ଷ, ଏହା ଏପ୍ରିଲ ମାସର ଅଧା ବିତିଯିବା ପରେ କର୍ମଚାରୀମାନେ ଅପେକ୍ଷା କରିଥିଲେ । ଶେଷରେ ସରକାର ଏହି ଘୋଷଣା କରିଛନ୍ତି ।

• ମୌଳିକ ଦରମା ₹୬୯,୦୦୦ କରିବା ଦାବି

ଏହି ନିଷ୍ପତ୍ତି ଏପରି ସମୟରେ ଆସିଛି ଯେତେବେଳେ କର୍ମଚାରୀ ସଂଘଗୁଡ଼ିକ ପ୍ରସ୍ତାବିତ ଅଷ୍ଟମ ବେତନ କମିଶନ ଅଧୀନରେ ଦରମା ଗଠନରେ ବଡ଼ ପରିବର୍ତ୍ତନ ଦାବି କରିଛନ୍ତି । ସଂଘ ନିଜ ଦାବିପତ୍ରରେ, ନ୍ୟାସନାଲ କାଉନସିଲ-ଜଏଣ୍ଟ କନସଲ୍ଟେଟିଭ୍ ମେସିନାରୀ (NC-JCM) ୩.୮୩ର ଅଧିକ ଫିଟମେଣ୍ଟ ଫ୍ୟାକ୍ଟର ଦାବି କରିଛି, ଯାହା ସର୍ବନିମ୍ନ ମୌଳିକ ଦରମା ₹୧୮,୦୦୦ରୁ ପ୍ରାୟ ₹୬୯,୦୦୦କୁ ବୃଦ୍ଧି କରିପାରିବ । ଏହାସହିତ ସାଲାରୀ କ୍ୟାଲକୁଲେସନରେ ପରିବାରକୁ ସାମିଲ କରିବା ଦାବି କରାଯାଇଛି, ଯାହାଦ୍ଵାରା କର୍ମଚାରୀଙ୍କ ଉପରେ ନିର୍ଭରଶୀଳ ପିତାମାତା ଏହାର ଲାଭ ଉଠାଇପାରିବେ ।

• ଦୁଇ ଥର ବଢିଥାଏ DA

ଏଠାରେ କହିରଖୁଛୁ କି, ସରକାର ବର୍ଷକୁ ଦୁଇଥର ଜାନୁଆରୀ ଏବଂ ଜୁଲାଇ ମାସରେ କର୍ମଚାରୀ ଏବଂ ପେନସନଭୋଗୀଙ୍କ ଦରମା ଉପରେ ମହଙ୍ଗା ଭତ୍ତା (DA)କୁ ବୃଦ୍ଧି କରନ୍ତି । ଏହି ଭତ୍ତା ବୃଦ୍ଧି କରିବାର ଉଦ୍ଦେଶ୍ୟ ହେଉଛି ମୁଦ୍ରାସ୍ଫୀତିର ପ୍ରଭାବକୁ ହ୍ରାସ କରିବା ଏବଂ କର୍ମଚାରୀ ଓ ପେନସନଭୋଗୀଙ୍କ କ୍ରୟ ଶକ୍ତି ଏବଂ ଜୀବନଧାରଣ ମାନ ବଜାୟ ରଖିବା ପାଇଁ ଉଦ୍ଦିଷ୍ଟ ।

ପଢନ୍ତୁ ଏହି ଖବର: DA ବଢିବ: ସରକାରୀ କର୍ମଚାରୀଙ୍କୁ ବଡ଼ ଖୁସି ଖବର...

• DA ବୃଦ୍ଧି ହେଲେ କଣ ହୁଏ ?

ମହଙ୍ଗା ଭତ୍ତା ବଢିବା ପରେ କେନ୍ଦ୍ର ସରକାରୀ କର୍ମଚାରୀଙ୍କ 'ଟେକ୍-ହୋମ ପେ' ବା ହାତକୁ ଆସୁଥିବା ଦରମା ସିଧାସଳଖ ବୃଦ୍ଧି ପାଏ । ସେପଟେ ପେନସନଧାରୀଙ୍କ ଲାଗି ଏହି ଦରମା 'ଡିୟରନେସ୍ ରିଲିଫ' (DR) ଭାବେ ଦେଖାଯାଏ । ମହଙ୍ଗା ଭତ୍ତା ହେଉଛି ସରକାରୀ କର୍ମଚାରୀ ଓ ପେନସନଭୋଗୀଙ୍କୁ ମୁଦ୍ରାସ୍ଫୀତି (ବଢୁଥିବା ଦରଦାମ)ର ମୁକାବିଲା ପାଇଁ ଦିଆଯାଉଥିବା ଅତିରିକ୍ତ ଦରମା । ଏହା ମୂଳ ଦରମାର ଏକ ନିର୍ଦ୍ଦିଷ୍ଟ ପ୍ରତିଶତ ଭାବେ ଗଣନା କରାଯାଏ, ଯାହାଦ୍ୱାରା ଦରଦାମ ବୃଦ୍ଧି ସତ୍ତ୍ୱେ କର୍ମଚାରୀଙ୍କ ଜୀବନଧାରଣ ମାନ ପ୍ରଭାବିତ ହୁଏ ନାହିଁ ।

ଅଧିକ ଖବର ପଢନ୍ତୁ...