Argus News - ୫ ଦିନ ହେଲା ଖସୁଥିଲା ସୁନା-ରୁପା ଦାମ; ଟାରିଫ୍ ଡିଲ୍‌ ପରେ ପୁଣି ବଢ଼ିଲା

ମୁମ୍ବାଇ: ସୁନା ଓ ରୁପା ଦର ସର୍ବକାଳୀନ ରେକର୍ଡ ଛୁଇଁବା ପରେ ୫ ଦିନ ହେଲା ତଳକୁ ଖସୁଥିଲା । କିନ୍ତୁ ମଙ୍ଗଳବାର ସୁନା ଓ ରୁପା ମୂଲ୍ୟ ହ୍ରାସ୍‌ରେ ବ୍ରେକ୍ ଲାଗିଛି । ଏମସିଏକ୍ସ କାରବାର ଆରମ୍ଭରେ ସୁନା ଓ ରୁପା ଦର ପୁଣି ବଢ଼ିଛି ।

ରୁପା ସୋମବାର ହ୍ରାସ ପାଇ ପ୍ରତି କେଜି ୨ ଲକ୍ଷ ୨୫ ହଜାର ରହିଥିଲା । ଏବେ ଗୋଟିଏ ଝଟ୍‌କାରେ ରୁପା ଦର ୨୧ ହଜାର ଟଙ୍କା ବୃଦ୍ଧି ପାଇଛି । ସେହିଭଳି ସୁନା ମଧ୍ୟ କାରବାର ଆରମ୍ଭରୁ ୫ ହଜାର ଟଙ୍କା ମହଙ୍ଗା ହୋଇଛି ।

ଏଥିସହ ପଢ଼ନ୍ତୁ: ସରପଞ୍ଚ ହେବାକୁ ବାଟ ଓଗାଳୁଥିଲା ୩ ସନ୍ତାନ ନିୟମ; ଝିଅକୁ କେନାଲକୁ ଠେଲିଦେଲା ବାପା

କେତେ ବଢ଼ିଲା ରୁପା ?

ଆଜି ରୁପା ଦର କେଜି ପିଛା ୨୧ ହଜାର ଟଙ୍କା ବଢ଼ିଛି । ସୋମବାର ଏମସିଏକ୍ସରେ ରୁପା କେଜି ପିଛା ୨ ଲକ୍ଷ ୩୬ ହଜାର ୨୬୧ ଟଙ୍କା ରହିଥିଲା । ମଙ୍ଗଳବାର ବଜାର ଖୋଲିବା ମାତ୍ରେ ରୁପା କେଜି ପିଛା ୨ ଲକ୍ଷ ୫୭ ହଜାର ୪୮୦ ଟଙ୍କାରେ ପହଞ୍ଚିଛି ।

ମଙ୍ଗଳବାର ରୁପା ଦର ବୃଦ୍ଧି ସତ୍ତ୍ଵେ ସର୍ବକାଳୀନ ରେକର୍ଡ ଠାରୁ ବେଶ୍ ଶସ୍ତା ରହିଛି ରୁପା । ଜାନୁଆରୀ ୨୯ରେ ଏମସିଏକ୍ସରେ ରୁପା ଦର ପ୍ରଥମଥର ପାଇଁ ୪ ଲକ୍ଷ ଡେଇଁଥିଲା । କେଜି ପିଛା ୪ ଲକ୍ଷ ୩୦ ହଜାର ୪୮ ଟଙ୍କା ରହିଥିଲା ରୁପା ଦାମ । ତାହା ତୁଳନାରେ ଏବେ ରୁପା ୧ ଲକ୍ଷ ୬୨ ହଜାର ୫୬୮ ଟଙ୍କା ଶସ୍ତା ରହିଛି ।

ଏଥିସହ ପଢ଼ନ୍ତୁ: କାର୍‌ରୁ ନେଇ କପଡ଼ା ପର୍ଯ୍ୟନ୍ତ; ଟାରିଫ୍‌ରେ ୩୨ ପ୍ରତିଶତ ହ୍ରାସ୍ କଲା ଆମେରିକା

ସୁନା ବି ଚମକିଲା

ରୁପା ଭଳି ସୁନା ଦର ମଧ୍ୟ ବଢ଼ିଛି । ସୋମବାର ଏମସିଏକ୍ସରେ କାରବାର ବନ୍ଦ ସମୟରେ ସୁନା ଦର ୧୦ ଗ୍ରାମ ପିଛା ୧ ଲକ୍ଷ ୪୩ ହଜାର ୯୯୧ ଟଙ୍କା ରହିଥିଲା । ମଙ୍ଗଳବାର କାରବାର ଆରମ୍ଭରେ ସୁନା ଦର ୧୦ ଗ୍ରାମ ପିଛା ୧ ଲକ୍ଷ ୪୯ ହଜାର ୪୮୫ ଟଙ୍କାରେ ପହଞ୍ଚିଛି । ଅର୍ଥାତ ୧୦ ଗ୍ରାମ ପିଛା ସୁନା ଦର ୫ ହଜାର ଟଙ୍କା ବଢ଼ିଛି ।

ସୁନାର ସର୍ବକାଳୀନ ରେକର୍ଡ ଦର ୧ ଲକ୍ଷ ୯୨ ହଜାର ୯୬ ଟଙ୍କା ଛୁଇଁଥିଲା । ରୁପା ଭଳି ସୁନା ମଧ୍ୟ ଜାନୁଆରୀ ୨୯ରେ ସବୁଠୁ ମହଙ୍ଗା ଥିଲା । ୫ ଦିନ ଧରି ରୁପା ଓ ସୁନା ଦର ଖସି ଚାଲିଥିଲା । ସୁନା ସର୍ବକାଳୀନ ରେକର୍ଡ ଦର ଠାରୁ ଏବେ ୪୩ ହଜାର ୬୧୧ ଟଙ୍କା ଶସ୍ତା ରହିଛି ।