GPF Interest Rate / ଚାକିରିଆଙ୍କ ପାଇଁ ବଡ଼ ଖବର! GPF ସୁଧ ହାର ଘୋଷଣା, ଆପଣଙ୍କ ଖାତାରେ କେତେ ବଢ଼ିବ ଟଙ୍କା?

ନୂଆଦିଲ୍ଲୀ: ସରକାରୀ କର୍ମଚାରୀଙ୍କ ପାଇଁ ଜରୁରୀ ଖବର । ୨୦୨୬ ଅକ୍ଟୋବରରୁ ଡିସେମ୍ବର ମାସ ପର୍ଯ୍ୟନ୍ତ ଜେନେରାଲ ପ୍ରୋଭିଡେଣ୍ଟ ଫଣ୍ଡ (GPF) ଉପରେ ସୁଧ ହାର ୭.୧ ପ୍ରତିଶତ ରହିବ । ଏହି ତିନି ମାସ ପାଇଁ ସରକାର ସୁଧ ହାରରେ କୌଣସି ପରିବର୍ତ୍ତନ କରିନାହାନ୍ତି । ଅର୍ଥାତ୍ ପୂର୍ବ ତ୍ରୈମାସିକ ଭଳି ଏଥର ମଧ୍ୟ କର୍ମଚାରୀଙ୍କୁ ସମାନ ହାରରେ ସୁଧ ମିଳିବ ।

ଅର୍ଥ ମନ୍ତ୍ରଣାଳୟ ପକ୍ଷରୁ ଅକ୍ଟୋବର ୧ରୁ ଡିସେମ୍ବର ୩୧, ୨୦୨୬ ପର୍ଯ୍ୟନ୍ତ ସୁଧ ହାର ନିର୍ଦ୍ଧାରଣ କରାଯାଇଛି । ଏଠାରେ କହିରଖୁଛୁ କି, GPF ବା ସାଧାରଣ ଭବିଷ୍ୟ ନିଧି ପାଣ୍ଠି ହେଉଛି ଏକ ସଞ୍ଚୟ ଯୋଜନା ଯେଉଁଥିରେ ଯୋଗ୍ୟ ସରକାରୀ କର୍ମଚାରୀମାନେ ନିଜ ଦରମାରୁ ନିର୍ଦ୍ଧାରିତ ଅଂଶ ଜମା କରନ୍ତି । ଏହି ଜମା ରାଶି ଉପରେ ସରକାର ସୁଧ ପ୍ରଦାନ କରନ୍ତି ।

• କେଉଁ କର୍ମଚାରୀ ପାଇବେ ଏହି ସୁବିଧା?

ପୁରୁଣା ପେନସନ ଯୋଜନା (OPS) ଅଧୀନରେ ଥିବା ଯୋଗ୍ୟ କେନ୍ଦ୍ର ଓ ରାଜ୍ୟ ସରକାରୀ କର୍ମଚାରୀମାନେ ସାଧାରଣତଃ GPF ସୁବିଧା ପାଇଥାନ୍ତି । ଚାକିରି ସମୟରେ ଜମା ହେଉଥିବା ଟଙ୍କା ଉପରେ ସୁଧ ମିଶି ମୋଟ ରାଶି ବଢ଼ିଥାଏ । ଅବସର ସମୟରେ ନିୟମ ଅନୁସାରେ ଜମା ହୋଇଥିବା ରାଶି ଓ ସୁଧ ମିଶି କର୍ମଚାରୀଙ୍କୁ ମିଳିଥାଏ । ତେବେ ନ୍ୟାସନାଲ ପେନସନ ସିଷ୍ଟମ (NPS) ଅଧୀନରେ ଥିବା କର୍ମଚାରୀମାନେ ସାଧାରଣତଃ GPF ସୁବିଧା ପାଆନ୍ତି ନାହିଁ । ତେଣୁ ନିଜ ପେନସନ ଯୋଜନା ଅନୁଯାୟୀ କର୍ମଚାରୀମାନେ ଏହି ସୁଧ ହାରର ଲାଭ ପାଇବେ ।

ପଢନ୍ତୁ ଏହି ଖବର: ଚାଷୀଙ୍କ ପାଇଁ ପେନସନ ଯୋଜନା; ୬୦ବର୍ଷରେ ମିଳିବ ମାସକୁ ୩୦୦୦ ଟଙ୍କା

ଏହା ଭାରତରେ ସରକାରୀ କର୍ମଚାରୀମାନଙ୍କ ପାଇଁ ଉଦ୍ଦିଷ୍ଟ ଏକ ଦୀର୍ଘକାଳୀନ ସଞ୍ଚୟ ଯୋଜନା । ଏଥିରେ ବେସରକାରୀ କର୍ମଚାରୀ ସାମିଲ ହୋଇପାରିବେ ନାହିଁ । ତେବେ ସରକାର ପ୍ରତି ତିନି ମାସରେ ଏହାର ସମୀକ୍ଷା କରନ୍ତି । ଅର୍ଥାତ ବର୍ଷକୁ ୪ ଥର ଏହି ହାର ବଦଳିପାରେ, କିନ୍ତୁ ସରକାର ଚାହିଁଲେ ଏହାକୁ ଅପରିବର୍ତ୍ତିତ (ସମାନ) ମଧ୍ୟ ରଖିପାରନ୍ତି । ବଜାର ସ୍ଥିତି ଅନୁଯାୟୀ ସୁଧ ହାର ବଢ଼ିପାରେ, କମିପାରେ କିମ୍ବା ସ୍ଥିର ରହିପାରେ । ସୁଧହାର ବଢିଲେ ସରକାରୀ କର୍ମଚାରୀଙ୍କ ଜିପିଏଫ୍ ଖାତାରେ ଜମା ଥିବା ଟଙ୍କା ଉପରେ ବାର୍ଷିକ ସୁଧ ମିଳିଥାଏ । ଯାହା ଫଳରେ ସରକାରୀ କର୍ମଚାରୀମାନେ ଅବସର ପରେ ଏକ ମୋଟା ଅଙ୍କର ଜମାରାଶି ପାଇଥାନ୍ତି ।

• ଅନ୍ୟ ସରକାରୀ ଫଣ୍ଡରେ ମଧ୍ୟ ୭.୧% ସୁଧ

GPF ସହିତ ସରକାରଙ୍କ ଅନ୍ୟ କେତେକ ପ୍ରୋଭିଡେଣ୍ଟ ଫଣ୍ଡ (PF) ଉପରେ ମଧ୍ୟ ୭.୧ ପ୍ରତିଶତ ସୁଧ ହାର ଲାଗୁ ହେବ । ଏଥିରେ ଡିଫେନ୍ସ ସର୍ଭିସେସ୍ ପ୍ରୋଭିଡେଣ୍ଟ ଫଣ୍ଡ, ଅଲ୍ ଇଣ୍ଡିଆ ସର୍ଭିସେସ୍ ପ୍ରୋଭିଡେଣ୍ଟ ଫଣ୍ଡ ଏବଂ ଷ୍ଟେଟ୍ ରେଲୱେ ପ୍ରୋଭିଡେଣ୍ଟ ଫଣ୍ଡ ଭଳି କେତେକ ଫଣ୍ଡ ସାମିଲ ଅଛି ।

• PPF ସୁଧ ହାର ମଧ୍ୟ ଅପରିବର୍ତ୍ତିତ

ସେହିପରି, ପବ୍ଲିକ ପ୍ରୋଭିଡେଣ୍ଟ ଫଣ୍ଡ (PPF) ଉପରେ ମଧ୍ୟ ଅକ୍ଟୋବରରୁ ଡିସେମ୍ବର ୨୦୨୬ ତ୍ରୈମାସିକ ପାଇଁ ସୁଧ ହାର ୭.୧ ପ୍ରତିଶତ ରହିଛି । ଅର୍ଥାତ୍ ଏହି ସମୟରେ PPF ଜମାକାରୀଙ୍କୁ ମଧ୍ୟ ପୂର୍ବ ହାରରେ ସୁଧ ମିଳିବ । ତେବେ GPF ହେଉ କି PPF, ନିଜ ଜମା ରାଶି ଉପରେ କେତେ ସୁଧ ମିଳିବ, ତାହା ଜମା ରାଶି ଓ ପ୍ରଯୁଜ୍ୟ ନିୟମ ଉପରେ ନିର୍ଭର କରିବ ।