Farmer Pension Scheme / ଚାଷୀଙ୍କ ପାଇଁ ପେନସନ ଯୋଜନା; ୬୦ବର୍ଷରେ ମିଳିବ ମାସକୁ ୩୦୦୦ ଟଙ୍କା

ନୂଆଦିଲ୍ଲୀ: ଚାଷକାର୍ଯ୍ୟରୁ ହେଉଥିବା ରୋଜଗାରରୁ ଜୀବନସାରା ଘର ଚଳାଇବା ପରେ ଚାଷୀଙ୍କ ଲାଗି ଭବିଷ୍ୟତ ପାଇଁ ଟଙ୍କା ସଞ୍ଚୟ କରିବା ସହଜ ହୋଇନଥାଏ । ବିଶେଷ କରି କ୍ଷୁଦ୍ର ଚାଷୀଙ୍କ କ୍ଷେତ୍ରରେ ଏହି ସମସ୍ୟା ଅଧିକ ଦେଖାଦିଏ । ଜୀବନସାରା ଝାଳବୁହା ପରିଶ୍ରମ କରିବା ପରେ ମଧ୍ୟ ଚାଷୀମାନେ ପରିଣତ ବୟସରେ କଷ୍ଟ ସହନ୍ତି । ତେବେ ଅନ୍ନଦାତାଙ୍କ ଲାଗି ଏକ ଲାଭଦାୟକ ଯୋଜନା ଆଣିଛନ୍ତି କେନ୍ଦ୍ର ସରକାର, ଯାହାର ନାଁ ହେଉଛି ପିଏମ କିଷାନ ମାନଧନ ଯୋଜନା । ଏହି ଯୋଜନା ଅଧୀନରେ ଚାଷୀଙ୍କୁ ୬୦ବର୍ଷ ପରେ ପ୍ରତି ମାସକୁ ମିଳିବ ୩୦୦୦ ଟଙ୍କା ।

କେନ୍ଦ୍ର ସରକାରଙ୍କ ଚାଷୀଙ୍କୁ ପ୍ରାଥମିକତା ଦେଇ ଏହି ଯୋଜନା ଆଣିଛନ୍ତି । ଏହି ଯୋଜନା ମୁତାବକ, ଚାଷୀମାନେ ରୋଜଗାର କରୁଥିବା ସମୟରେ ସ୍ଵଳ୍ପ ଅର୍ଥରାଶି ଜମା କରନ୍ତି, ଯାହାଦ୍ଵାରା ୬୦ ବର୍ଷ ପରେ ସେମାନଙ୍କୁ ପ୍ରତି ମାସକୁ ୩୦୦୦ ଟଙ୍କା ପେନସନ ମିଳିଥାଏ । ଅର୍ଥାତ୍ ବର୍ଷକୁ ୩୬,୦୦୦ ଟଙ୍କା ମିଳେ । ମାତ୍ର ଏହି ଯୋଜନାର ଲାଭ ଉଠାଇବା ଲାଗି ଚାଷୀମାନଙ୍କୁ ଏକ ନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ କିଛି ସ୍ଵଳ୍ପ ଅର୍ଥ ଜମା କରିବାକୁ ପଡ଼ିଥାଏ ।

• କେତେ ଟଙ୍କା ଜମା କରିବେ ଚାଷୀ ?

ଏହି ଯୋଜନାରେ ଚାଷୀମାନଙ୍କୁ ପ୍ରତି ମାସ ନିଜ ବୟସ ଅନୁସାରେ କିଛି ନିର୍ଦିଷ୍ଟ ଅର୍ଥ ଜମା କରିବାକୁ ପଡେ । ଏହି ଯୋଗଦାନ ମାତ୍ର ୫୫ ଟଙ୍କାରୁ ଆରମ୍ଭ ହୋଇ ୨୦୦ ଟଙ୍କା ପ୍ରତି ମାସକୁ ରହିଥାଏ । ଚାଷୀଙ୍କ ବୟସ ଯେତେ କମ, ତାଙ୍କ ମାସିକ ଯୋଗଦାନ ମଧ୍ୟ ସେତେ କମ ହୋଇଥାଏ । ଚାଷୀମାନେ ଯେତିକି ଟଙ୍କା ଜମା କରନ୍ତି, କେନ୍ଦ୍ର ସରକାର ମଧ୍ୟ ସେତିକି ଟଙ୍କା ସେମାନଙ୍କ ପାଇଁ ଜମା କରିଥାନ୍ତି । ଏହିପରି ଭାବରେ ସରକାର ଓ ଚାଷୀଙ୍କ ଉଭୟ ଟଙ୍କା ମିଶି ପେନସନ ଲାଗି ଟଙ୍କା ଜମା ହୋଇଥାଏ ।

• ସ୍ଵାମୀ-ସ୍ତ୍ରୀ ଉଭୟ ଲାଭ ପାଇପାରିବେ

ଯଦି ସ୍ଵାମୀ ଓ ସ୍ତ୍ରୀ ଯୋଜନାର ଯୋଗ୍ୟ ପ୍ରାର୍ଥୀ ହୁଅନ୍ତି ଓ ଭିନ୍ନ ଭିନ୍ନ ଭାବେ ଏହି ଯୋଜନାରେ ସାମିଲ ହୁଅନ୍ତି ତେବେ ଉଭୟଙ୍କ ବ୍ଯାଙ୍କ ଖାତାକୁ ପେନସନ ଟଙ୍କା ଆସିଥାଏ । ଏହିପରି ଭାବରେ ସ୍ଵାମୀ ସ୍ତ୍ରୀ ଉଭୟଙ୍କୁ ପ୍ରତି ମାସରେ ୩୦୦୦-୩୦୦୦ ଟଙ୍କା ପେନସନ ମିଳିବ । ଫଳରେ ଗୋଟିଏ ପରିବାରକୁ ୬୦୦୦ ଟଙ୍କା ପେନସନ ଦେବେ ସରକାର ।

ପଢନ୍ତୁ ଏହି ଖବର: ଆପଣଙ୍କ ଦରମା ₹୫୦,୦୦୦ କି ? ଅଷ୍ଟମ ବେତନରେ କେତେ ମିଳିବ ଏରିଅର, ଜାଣନ୍ତୁ

• କେଉଁ ଚାଷୀ ଯୋଜନାର ଲାଭ ଉଠାଇପାରିବେ ?

ଏହି ଯୋଜନାର ଲାଭ ଉଠାଇବା ଲାଗି ଚାଷୀଙ୍କ ବୟସ ୧୮ରୁ ୪୦ ବର୍ଷ ମଧ୍ୟରେ ହୋଇଥିବା ଆବଶ୍ୟକ । ଏହାସହିତ ଚାଷୀଙ୍କ ନିକଟରେ ୨ ହେକ୍ଟର ପର୍ଯ୍ୟନ୍ତ ଚାଷଜମି ରହିଥିବା ଆବଶ୍ୟକ । ଯୋଜନାରେ ସାମିଲ ହେବା ଲାଗି ଚାଷୀଙ୍କୁ ନିଜ ଯୋଗ୍ୟତା ମୁତାବକ ନିୟମିତ ଭାବେ ଟଙ୍କା ପୈଠ କରିବାକୁ ପଡ଼େ । ଏହାପରେ ହିଁ ସେମାନେ ୬୦ ବର୍ଷ ପରେ ପେନସନ ପାଇବା ପାଇଁ ଯୋଗ୍ୟ ବିବେଚିତ ହୋଇପାରିବେ ।

• କେମିତି କରିବେ ଆବେଦନ ?

ଯୋଜନାରେ ସାମିଲ ହେବା ଲାଗି ଚାଷୀଙ୍କୁ ନିକଟସ୍ଥ କମନ୍ ସର୍ଭିସ୍ ସେଣ୍ଟର (CSC)କୁ ଯାଇ ରେଜିଷ୍ଟ୍ରେସନ କରିବାକୁ ପଡ଼ିବ । ଆବେଦନ ଲାଗି ଆଧାର କାର୍ଡ, ବ୍ୟାଙ୍କ ଆକାଉଣ୍ଟର ତଥ୍ୟ ଓ ଚାଷଜମି ସହ ଜଡ଼ିତ କାଗଜପତ୍ରଗୁଡ଼ିକର ଆବଶ୍ୟକତା ପଡ଼ିପାରେ । ଆବେଦନ କରିବା ପୂର୍ବରୁ ଚାଷୀମାନଙ୍କୁ ନିଜର ଯୋଗ୍ୟତା ଓ ଆବଶ୍ୟକୀୟ ନିୟମଗୁଡ଼ିକ ସମ୍ପର୍କରେ ଜାଣିବା ନିହାତି ଜରୁରୀ ।