ନୂଆଦିଲ୍ଲୀ: GSTରେ ନୂଆ ସ୍ଲାବ । ଯୋଡ଼ି ହେଲା ୪୦ ପ୍ରତିଶତ ଟିକସ ସ୍ଲାବ । GST କାଉନସିଲ୍ ବୈଠକରେ ୧୨ ଓ ୨୮ ପ୍ରତିଶତ ସ୍ଲାବକୁ ହଟାଇ ଦିଆଯାଇଥିବା ବେଳେ ଆଉ ଏକ ସ୍ଲାବକୁ ଯୋଡ଼ା ଯାଇଛି । ଆଉ ଏହି ସ୍ଲାବ ହେଉଛି ୪୦ ପ୍ରତିଶତ । ଯାହାକି ହାନିକାରକ ବା କ୍ଷତିକାର ସାମଗ୍ରୀ ସହ କେତକ ନିର୍ଦ୍ଦିଷ୍ଟ ଲକଜୁରୀ ସାମଗ୍ରୀ ଉପରେ ଏହା ଲାଗୁ ହେବ ।

ଅନ୍ୟ ସମସ୍ତ ସାମଗ୍ରୀ GSTର ୨ଟି ସ୍ଲାବ ୫ ଓ ୧୮ ପ୍ରତିଶତ ମଧ୍ୟରେ ଆସିବ । ଏନେଇ GST କାଉନସିଲ୍ ବୈଠକ ପରେ ଘୋଷଣା କରିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ତେବେ ସମାଜ ଓ ଶରୀର ପାଇଁ କ୍ଷତିକାରକ ସାମଗ୍ରୀକୁ ୪୦ ପ୍ରତିଶତ ସ୍ଲାବରେ ରଖାଯାଇଛି । ଏଥିରେ ଗୁଟ୍‌ଖା, ସିଗାରେଟ୍, ପାନ ମସଲା, ମଦଲା ଏବଂ ମୃଦୁ ପାନୀୟ ଆସୁଛି ।

ଏଥିସହ ପଢ଼ନ୍ତୁ: କ୍ଷୀର-ପନିରଠୁ ଔଷଧ ପର୍ଯ୍ୟନ୍ତ...ଏହି ସବୁ ଜିନିଷ ଉପରେ ଆଉ ଲାଗିବନି ଟ୍ୟାକ୍ସ

ସାରା ବିଶ୍ଵରେ ହାନିକାରକ ସାମଗ୍ରୀ ଉପରେ ଅନେକ ଦେଶ ଅଧିକ ଟିକସ ଲଗାଇ ସାମଗ୍ରୀ ବ୍ୟବହାରକୁ ପ୍ରୋତ୍ସାହନ ଦେଉ ନଥିବା ବେଳେ ଏଥିରୁ ଆୟ ରାଜସ୍ଵରୁ ଉନ୍ନତିମୂଳକ କାର୍ଯ୍ୟ ହେଉଛି । ପୂର୍ବରୁ ଭାରତରେ ଏସବୁ ସାମଗ୍ରୀ ଉପରେ ୨୮ ପ୍ରତିଶତ GST ସହ କମ୍ପାନିସେସନ୍ ସେସ୍ ଲାଗୁ ହେଉଥିଲା । ଏବେ ସେସ୍ ଲାଗୁ ହେଉନଥିବା ବେଳେ ଏଣିକି ଏସବୁ ସାମଗ୍ରୀ ପାଇଁ ୪୦ ପ୍ରତିଶତ GST ଦେବାକୁ ପଡ଼ିବ ।

GSTରେ ସାମିଲ୍ କରାଯାଇଥିବା ୪୦ ପ୍ରତିଶତ ସ୍ଲାବକୁ ସ୍ଵତନ୍ତ୍ର ଦର କୁହାଯାଉଛି । କାରଣ ଏଥିରେ ମୁଖ୍ୟତଃ ହାନିକାରକ ଦ୍ରବ୍ୟ ପଦାର୍ଥ ଓ ସୁପର-ଲକଜୁରୀ ସାମଗ୍ରୀ ରହିଛି । ଆସନ୍ତୁ ନଜର ପକାଇବା କେଉଁ ସବୁ ସାମଗ୍ରୀ ଉପରେ ଲାଗିବ ୪୦ ପ୍ରତିଶତ GST ।...

ପାନ ମସଲା, ସିଗାରେଟ୍, ଗୁଟ୍‌ଖା, ମୃଦୁ ପାନୀୟ (କୋଲ୍ଡ ଡ୍ରିଙ୍କ୍ସ), ୧୨୦୦ ସିସିରୁ ଅଧିକ (ପେଟ୍ରୋଲ) ଓ ୧୫୦୦ ସିସିରୁ ଅଧିକ (ଡିଜେଲ୍) କାର ଉପର, ୩୫୦ ସିସିରୁ ଅଧିକ ବାଇକ୍ ଉପରେ, ପାଣିଜାହାଜ, ବ୍ୟକ୍ତିଗତ ବିମାନ, ରେସିଂ କାର୍‍, ଅନଲାଇନ୍ ଜୁଆ ଖେଳ ।