ଧୀରେ ଧୀରେ ସ୍ୱାଭାବିକ ହେଉଛି ରାଜଧାନୀର ପ୍ରେଟ୍ରୋଲ ପମ୍ପ୍ । କିଛି ଦିନ ତଳର ପ୍ରବଳ ଭିଡ଼ ଆଉ ଆଜି ଦେଖିବାକୁ ମିଳିନି । ଗତକାଲି ସନ୍ଧ୍ୟାରୁ ଭିଡ଼ କମିଥିବାବେଳେ ରାଜ୍ୟରେ ତେଲ ସଙ୍କଟ ଆସନ୍ତା ୨ରୁ ୩ ଦିନ ଭିତରେ ସମ୍ପୂର୍ଣ୍ଣ ଭାବେ ସ୍ବାଭାବିକ ହେବ । ତେବେ ରାଜ୍ୟରେ ଗତ ୫ ଦିନରେ ୧୫ ଦିନର ତେଲ ବିକ୍ରି ହୋଇଛି । ଆମ ପାଖରେ ମହଜୁଦ ରହିଛି ପ୍ରଚୁର ତୈଳ । ଷ୍ଟକ୍ ଥାଇ ବିକ୍ରି କରିନଥିବା ଡିଲରଙ୍କ ଉପରେ ଆକ୍ସନ ହେବ ବୋଲି ଉତ୍କଳ ପେଟ୍ରୋଲିୟମ ଡିଲର ସଂଘ ସାଧାରଣ ସମ୍ପାଦକ ସଞ୍ଜୟ ଲାଠ କହିଛନ୍ତି ।

ତେଲ ସଙ୍କଟ ନେଇ ଉତ୍କଳ ପେଟ୍ରୋଲିୟମ ଡିଲର ସଂଘ ସାଧାରଣ ସମ୍ପାଦକ ସଞ୍ଜୟ ଲାଠ କହିଛନ୍ତି, "କଟକ ଭୁବନେଶ୍ୱରରେ ସ୍ଥିତି ସ୍ୱାଭାବିକ ରହିଛି । ପୂର୍ବ ୫ ଦିନରେ ୧୫ ଦିନର ତେଲ ବିକ୍ରି ହୋଇଛି । ଆସନ୍ତା ୪-୫ ଦିନ ପର୍ଯ୍ୟନ୍ତ ପେଟ୍ରୋଲ ବ୍ୟବସାୟ ପ୍ରଭାବିତ ହେବ । ଆସନ୍ତା ୨ରୁ୩ ଦିନ ମଧ୍ୟରେ ସମ୍ପୂର୍ଣ୍ଣ ସ୍ୱାଭାବିକ ହୋଇଯିବ ସ୍ଥିତି । ଆସନ୍ତାକାଲି ସନ୍ଧ୍ୟା ସୁଦ୍ଧା ସବୁ ପେଟ୍ରୋଲ ପମ୍ପ ଗୁଡିକରେ ତେଲ ଉପଲବ୍ଧ ହୋଇଯିବ ।"

• ଷ୍ଟକ୍ ଥାଇ ବିକ୍ରି କରିନଥିବା ଡିଲରଙ୍କ ଉପରେ ଆକ୍ସନ

ଅନ୍ୟପଟେ ଯେଉଁମାନେ ତୈଳ ବିକ୍ରିରେ ଷ୍ଟକ୍ ଥାଇ ମଧ୍ୟ ବିକ୍ରି କରିନଥିବେ ସେମାନଙ୍କ ବିରୋଧରେ ଆବଶ୍ୟକ ସ୍ଥଳରେ ଅଭିଯୋଗ ଆଧାରରେ ତୈଳ କମ୍ପାନୀ ଦ୍ୱାରା କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି ସଞ୍ଜୟ କହିଛନ୍ତି । ସେ ଆହୁରି କହିଛନ୍ତି ଯେ ଓଡ଼ିଶାରେ ୧୩ରୁ ୧୭ ଦିନର ତେଲ ଷ୍ଟକ୍ ରହିଥାଏ । ଆମ ପାଖରେ ପ୍ରଚୁର ତୈଳ ମହଜୁଦ ରହିଛି । ବ୍ୟସ୍ତ ହେବାର କୌଣସି ଆବଶ୍ୟକତା ନାହିଁ ।

• କଟକରେ ବି ସ୍ଥିତି ସ୍ଵାଭାବିକ

କଟକରେ ଥିବା ବିଭିନ୍ନ ପେଟ୍ରୋଲ ଟାଙ୍କି ଆଗରେ ଆଜି ନାହଁ ଆଉ ଲମ୍ବା ଲାଇନ । ଗାଡି ଚାଳକମାନେ ପୂର୍ବପରି ତେଲ ଟାଙ୍କି ଆସି ତେଲ ପକାଉଥିବା ଦେଖିବାକୁ ମିଳିଛି । ସେପଟେ ତେଲ ଟାଙ୍କିରେ ପ୍ରର୍ଯ୍ୟାପ୍ତ ପେଟ୍ରୋଲ ଡିଜେଲ ମହଜୁଦ ରହିଛି । ଗତକାଲି ଏବଂ ଆଜି ରବିବାର ସତ୍ତ୍ଵେ ଡିପୋରୁ ଟ୍ୟାଙ୍କର ଆସିଛି । ତେଣୁ ଆଉ କିଛି ଅସୁବିଧା ନାହିଁ ବୋଲି ପେଟ୍ରୋଲ ଟାଙ୍କି କର୍ମଚାରୀ କହିଛନ୍ତି ।

ପଢନ୍ତୁ ଏହି ଖବର: ପେଟ୍ରୋଲ୍‌ ପମ୍ପରେ ମିଳୁନି ତେଲ, ୧୪ ହଜାରରୁ ୨ ହଜାର ଘରୋଇ ବସ୍‌ ବନ୍ଦ

ସୂଚନା ଥାଉ କି ରାଜ୍ୟରେ ତେଲ ସଙ୍କଟକୁ ନେଇ ଗୁଜବ ଉଠିବା ପରେ ତେଲ ଟାଙ୍କିରେ ଲୋକଙ୍କ ପ୍ରବଳ ଭିଡ଼ ଜମିଥିଲା । ସମସ୍ତ ପେଟ୍ରୋଲ ପମ୍ପରେ ଗାଡ଼ିର ଲମ୍ଵା ଲାଇନ୍ ଲାଗିଥିଲା । ଯେଉଁଠି ପୂର୍ବରୁ ଲୋକେ ୧୦୦ରୁ ୨୦୦ ଟଙ୍କାର ତେଲ ପକାଉଥିଲେ, ଗୁଜବ ଉଠିବା ପରେ ସମସ୍ତେ ଟାଙ୍କି ଫୁଲ୍ କରିଥିଲେ । ଏହାଫଳରେ କୃତ୍ରିମ ତେଲ ସଙ୍କଟ ସୃଷ୍ଟି ହୋଇଥିଲା ।