ନୂଆଦିଲ୍ଲୀ: ଚାକିରିରୁ ଅବସର ନେବା ପରେ ନିୟମିତ ଆୟର ଅଭାବ ଅନେକଙ୍କ ପାଇଁ ଚିନ୍ତାର କାରଣ ପାଲଟିଥାଏ । ବିଶେଷକରି ବୃଦ୍ଧାବସ୍ଥାରେ ଦୈନନ୍ଦିନ ଖର୍ଚ୍ଚ ପାଇଁ ଅନ୍ୟ ଉପରେ ନିର୍ଭର ନକରି ଆର୍ଥିକ ଭାବେ ସ୍ୱାଧୀନ ରହିବାକୁ ସମସ୍ତେ ଚାହାନ୍ତି । ଏପରି ସ୍ଥିତିରେ ବରିଷ୍ଠ ନାଗରିକଙ୍କ ପାଇଁ ଡାକଘରର ସିନିୟର ସିଟିଜେନ୍ସ ସେଭିଂସ୍ ସ୍କିମ୍ (SCSS) ଏକ ଆକର୍ଷଣୀୟ ସଞ୍ଚୟ ବିକଳ୍ପ ହୋଇପାରେ । ଏହି ଯୋଜନାରେ ୩୦ ଲକ୍ଷ ଟଙ୍କା ନିବେଶ କଲେ ବାର୍ଷିକ ୨.୪୬ ଲକ୍ଷ ଟଙ୍କା ସୁଧ ମିଳିପାରିବ । ଅର୍ଥାତ୍ ମାସିକ ହାରାହାରି ୨୦,୫୦୦ ଟଙ୍କା ହାତକୁ ଆସିବ ।
- ୮.୨% ସୁଧ ହାରକୁ ସୁରକ୍ଷିତ ନିବେଶ
SCSS ଯୋଜନାରେ ବାର୍ଷିକ ୮.୨% ସୁଧ ହାର ଅନୁଯାୟୀ ଆୟର ସୁଯୋଗ ରହିଛି । ଏହି ଯୋଜନାର ଏକ ପ୍ରମୁଖ ବିଶେଷତ୍ୱ ହେଉଛି ଯେ ଏଥିରେ ସୁଧ ଟଙ୍କା ପ୍ରତି ମାସରେ ନୁହେଁ, ବରଂ ପ୍ରତି ତିନି ମାସରେ ଥରେ ପ୍ରଦାନ କରାଯାଏ । ଯଦି ଜଣେ ବ୍ୟକ୍ତି ଏହି ଯୋଜନାରେ ସର୍ବାଧିକ ୩୦ ଲକ୍ଷ ଟଙ୍କା ଜମା କରନ୍ତି, ତେବେ ୮.୨% ସୁଧ ହାର ଅନୁଯାୟୀ ବର୍ଷକୁ ୨,୪୬,୦୦୦ ଟଙ୍କା ସୁଧ ମିଳିବ । ଏହି ହିସାବରେ ପ୍ରତି ତିନି ମାସରେ ୬୧,୫୦୦ ଟଙ୍କା ମିଳିପାରିବ । ଏହାକୁ ମାସିକ ହାରାହାରି ହିସାବରେ ଦେଖିଲେ ଆୟ ୨୦,୫୦୦ ଟଙ୍କା ହେବ । ତେଣୁ ଅବସର ପରେ ଘର ଖର୍ଚ୍ଚ, ଔଷଧପତ୍ର ଓ ଅନ୍ୟାନ୍ୟ ଆବଶ୍ୟକତା ପାଇଁ ନିୟମିତ ଆୟର ଯୋଜନା କରୁଥିବା ବରିଷ୍ଠ ନାଗରିକଙ୍କ ପାଇଁ ଏହା ଉପଯୋଗୀ ହୋଇପାରେ ।
- କେଉଁମାନେ ଖୋଲିପାରିବେ ଆକାଉଣ୍ଟ ?
ସାଧାରଣତଃ ୬୦ ବର୍ଷ କିମ୍ବା ତଦୂର୍ଦ୍ଧ୍ୱ ବୟସର ବ୍ୟକ୍ତିମାନେ ଏହି ଯୋଜନାରେ ଖାତା ଖୋଲିପାରିବେ । ଏହା ସହିତ ନିର୍ଦ୍ଦିଷ୍ଟ ସର୍ତ୍ତ ପୂରଣ କରୁଥିବା ୫୫ରୁ ୬୦ ବର୍ଷ ବୟସ ମଧ୍ୟରେ ଅବସର ନେଇଥିବା କର୍ମଚାରୀମାନେ ମଧ୍ୟ ଏଥିରେ ନିବେଶ କରିପାରିବେ । ଅନ୍ୟପଟେ ନିର୍ଦ୍ଦିଷ୍ଟ ନିୟମ ପୂରଣ କରୁଥିବା ପ୍ରତିରକ୍ଷା ବାହିନୀର ଅବସରପ୍ରାପ୍ତ କର୍ମଚାରୀମାନେ ୫୦ ବର୍ଷ ବୟସ ପରେ ମଧ୍ୟ ଏହି ଯୋଜନାରେ ଖାତା ଖୋଲିପାରିବେ । ଏହି ଯୋଜନାରେ ସର୍ବନିମ୍ନ ୧,୦୦୦ ଟଙ୍କା ଜମା କରି ଖାତା ଖୋଲିବାର ବ୍ୟବସ୍ଥା ରହିଛି । ଜଣେ ନିବେଶକ ସର୍ବାଧିକ ୩୦ ଲକ୍ଷ ଟଙ୍କା ପର୍ଯ୍ୟନ୍ତ ଜମା କରିପାରିବେ । ତେବେ ଖାତା ଖୋଲିବା ପୂର୍ବରୁ ବୟସ, ଅବସର ଓ ଜମା ସମ୍ପର୍କିତ ନିୟମାବଳୀ ଯାଞ୍ଚ କରିନେବା ଜରୁରୀ ।
ପଢନ୍ତୁ ଏହି ଖବର: ସରକାରୀ କର୍ମଚାରୀଙ୍କ ପାଇଁ ଖୁସି ଖବର; ୨% ବଢିଲା DA - ୫ ବର୍ଷ ପରେ ଫେରିପାଇବେ ମୂଳଧନ
SCSS ଯୋଜନାର ମୂଳ ଅବଧି ୫ ବର୍ଷ । ଏହି ସମୟ ଶେଷ ହେବା ପରେ ନିୟମ ଅନୁଯାୟୀ ଜମା ହୋଇଥିବା ମୂଳଧନ ଫେରସ୍ତ ମିଳିଥାଏ । ଯୋଗ୍ୟ ଖାତାଧାରୀ ଚାହିଁଲେ ନିୟମ ଅନୁସାରେ ଆଉ ୩ ବର୍ଷ ପାଇଁ ଖାତାର ଅବଧି ବୃଦ୍ଧି କରିପାରିବେ । ସରକାରୀ ସମର୍ଥନ ଥିବା ଏହି ସଞ୍ଚୟ ଯୋଜନା ବଜାରଭିତ୍ତିକ ନିବେଶ ତୁଳନାରେ ଅଧିକ ସ୍ଥିରତା ଚାହୁଁଥିବା ଲୋକଙ୍କ ପାଇଁ ଭଲ ବିକଳ୍ପ । ତେବେ ନିବେଶ ପୂର୍ବରୁ ଚାଲୁଥିବା ସୁଧ ହାର, କର ସମ୍ପର୍କିତ ନିୟମ ଏବଂ ଅବଧି ପୂର୍ବରୁ ଟଙ୍କା ଉଠାଣର ସର୍ତ୍ତ ଜାଣିନେବା ଆବଶ୍ୟକ । ଏହି ଯୋଜନାର ସବୁଠୁ ଖାସ୍ କଥା ହେଉଛି ଏଥିରେ ସେୟାର ମାର୍କେଟର କୌଣସି ପ୍ରଭାବ ପଡ଼ିନଥାଏ । କାରଣ ଏହା ଏକ ସରକାରୀ ଯୋଜନା ।
