Banks Merger News / ସତରେ କଣ ମର୍ଜ ହେବ ୯ଟି ସରକାରୀ ବ୍ୟାଙ୍କ; ଭାଇରାଲ ଡକ୍ୟୁମେଣ୍ଟକୁ ନେଇ ଚର୍ଚ୍ଚା

ନୂଆଦିଲ୍ଲୀ: ଗତ କିଛି ଦିନ ସୋସିଆଲ ମିଡିଆରେ କିଛି ପ୍ରମୁଖ ସରକାରୀ ବ୍ୟାଙ୍କଗୁଡ଼ିକର ମିଶ୍ରଣ ସମ୍ପର୍କିତ ଏକ ପୋଷ୍ଟ ସୋସିଆଲ ମିଡିଆରେ ଦ୍ରୁତ ଗତିରେ ଭାଇରାଲ ହେଉଛି । ଭାଇରାଲ ପୋଷ୍ଟରେ ଦାବି କରାଯାଇଛି ଯେ କେନ୍ଦ୍ର ସରକାର ୯ଟି ସରକାରୀ ବ୍ୟାଙ୍କକୁ ୩ଟି ବଡ଼ ୟୁନିଟରେ ମିଶ୍ରଣ କରିବା ପାଇଁ ଏକ ନିର୍ଦ୍ଦେଶ ଜାରି କରିଛନ୍ତି । ତେବେ ଏହା ଆଦୌ ସତ ନୁହେଁ । ପ୍ରେସ୍ ଇନଫର୍ମେସନ୍ ବ୍ୟୁରୋ (PIB) ଫ୍ୟାକ୍ଟ-ଚେକିଂ ୟୁନିଟ୍ ଏହି ଦାବିକୁ ମିଥ୍ୟା ବୋଲି କହିଛନ୍ତି ।

ସୋସିଆଲ ମିଡିଆ ପ୍ଲାଟଫର୍ମରେ ସେୟାର ହେଉଥିବା କିଛି ଡକ୍ୟୁମେଣ୍ଟକୁ ଅର୍ଥ ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ଦର୍ଶାଯାଇଛି । ଏହା ଭାରତ ସରକାରଙ୍କ ସରକାରୀ ଗେଜେଟ୍ ଭାବରେ ଦେଖାଯାଇ ଲୋକଙ୍କୁ ଭ୍ରମିତ କରିବା ପାଇଁ ପ୍ରସ୍ତୁତ କରାଯାଇଛି । ଭାଇରାଲ ଡକ୍ୟୁମେଣ୍ଟରେ ଦାବି କରାଯାଇଛି ଯେ କେନ୍ଦ୍ର ସରକାର କିଛି ପ୍ରମୁଖ ବ୍ୟାଙ୍କଗୁଡ଼ିକର ମିଶାଇ ଦେବା ଲାଗି ଅନୁମୋଦନ କରିଛନ୍ତି ।

• କେଉଁ ବ୍ଯାଙ୍କଗୁଡ଼ିକ ମର୍ଜ ହେବା ପାଇଁ ଦାବି ?

ଏହି ନକଲି ବିଜ୍ଞପ୍ତିରେ ଦାବି କରାଯାଇଥିଲା ଯେ ଇଣ୍ଡିଆନ୍ ବ୍ୟାଙ୍କ, ବ୍ୟାଙ୍କ ଅଫ୍ ମହାରାଷ୍ଟ୍ର ଏବଂ ସେଣ୍ଟ୍ରାଲ୍ ବ୍ୟାଙ୍କ ଅଫ୍ ଇଣ୍ଡିଆକୁ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ (SBI) ସହିତ ମିଶ୍ରଣ କରି ନୂତନ SBI ଗ୍ରୁପ୍ ଗଠନ କରାଯିବ । ଏଥିରେ ଏହା ମଧ୍ୟ ଦାବି କରାଯାଇଥିଲା ଯେ ୟୁନିଅନ୍ ବ୍ୟାଙ୍କ ଅଫ୍ ଇଣ୍ଡିଆ, ବ୍ୟାଙ୍କ ଅଫ୍ ଇଣ୍ଡିଆ ଏବଂ ପଞ୍ଜାବ ଆଣ୍ଡ୍ ସିନ୍ଧ ବ୍ୟାଙ୍କକୁ ପଞ୍ଜାବ ନ୍ୟାସନାଲ୍ ବ୍ୟାଙ୍କ (PNB) ସହିତ ମିଶ୍ରଣ କରାଯିବ । ସେହିପରି କାନାଡା ବ୍ୟାଙ୍କ, ଇଣ୍ଡିଆନ୍ ଓଭରସିଜ୍ ବ୍ୟାଙ୍କ ଏବଂ ୟୁକୋ ବ୍ୟାଙ୍କକୁ ବ୍ୟାଙ୍କ ଅଫ୍ ବରୋଦା (BOB)ରେ ମିଶାଇ ଦିଆଯିବ ।

A document circulating on social media, purportedly issued by the Ministry of Finance, claims that the Central Government has notified a scheme for the amalgamation of Public Sector Banks.#PIBFactCheck:

❌ The document is #Fake and has NOT been issued by @FinMinIndia.

🔰… pic.twitter.com/nCbOS9fRFX

— PIB Fact Check (@PIBFactCheck) September 16, 2026

• ଦାବିକୁ ମିଥ୍ୟା କହିଲା PIB

ସରକାରୀ ଗଣମାଧ୍ୟମ ସଂସ୍ଥା ପିଆଇବିର ଫ୍ୟାକ୍ଟ ଚେକ୍ ଭାଇରାଲ୍ ବିଜ୍ଞପ୍ତିକୁ ଖଣ୍ଡନ କରିଛି ଏବଂ ସ୍ପଷ୍ଟ ଭାବେ କହିଛି ଯେ ସୋସିଆଲ ମିଡିଆରେ ଘୂରି ବୁଲୁଥିବା ଡକ୍ୟୁମେଣ୍ଟଟି ସମ୍ପୂର୍ଣ୍ଣ ନକଲି । ପିଆଇବି ଅନୁଯାୟୀ, କେନ୍ଦ୍ର ସରକାରଙ୍କ ଦ୍ୱାରା ଏପରି କୌଣସି ସରକାରୀ ନିର୍ଦ୍ଦେଶ ଜାରି କରାଯାଇ ନାହିଁ । ମେସେଜିଂ ପ୍ଲାଟଫର୍ମ ଏବଂ ସୋସିଆଲ ମିଡିଆରେ ସେୟାର ହେବା ପରେ ଏହି ନକଲି ଡକ୍ୟୁମେଣ୍ଟଟି Xରେ ଏହାକୁ ଅନେକ ଲୋକ ଦେଖିଥିଲେ । ଯାହା ଫଳରେ ବ୍ୟାଙ୍କ ଗ୍ରାହକ ଏବଂ କର୍ମଚାରୀଙ୍କ ମଧ୍ୟରେ ଏହି ପ୍ରମୁଖ ବ୍ୟାଙ୍କଗୁଡ଼ିକର ନୂତନ ମିଶ୍ରଣ ବିଷୟରେ ଦ୍ୱନ୍ଦ୍ୱ ସୃଷ୍ଟି ହୋଇଥିଲା । ଗ୍ରାହକଙ୍କ ମଧ୍ୟରେ ଦ୍ଵନ୍ଦ୍ଵ ଦୂର କରିବା ଲାଗି ପିଆଇବି ସତ ସାମ୍ନାକୁ ଆଣିଛି ।

ପଢନ୍ତୁ ଏହି ଖବର: ଏଣିକି ATMରୁ ମିଳିବ ଡେବିଟ୍-କ୍ରେଡିଟ୍ କାର୍ଡ ! ଜାଣନ୍ତୁ ନୂଆ ବ୍ୟାଙ୍କିଂ ସୁବିଧା

• ୨୦୧୯ରେ ହୋଇଥିଲା ବଡ଼ ବ୍ୟାଙ୍କ ମିଶ୍ରଣ

ଭାଇରାଲ୍ ଦାବିଗୁଡ଼ିକୁ ଲୋକେ ସହଜରେ ମାନି ନେଇଥିଲେ । କାରଣ ଭାରତରେ ପୂର୍ବରୁ ସରକାରୀ କ୍ଷେତ୍ରର ବ୍ୟାଙ୍କଗୁଡ଼ିକର ବଡ଼ ଧରଣର ମିଶ୍ରଣ ହୋଇସାରିଛି । ୨୦୧୯ ମସିହାରେ, କେନ୍ଦ୍ର ସରକାର ୧୦ଟି ସରକାରୀ କ୍ଷେତ୍ରର ବ୍ୟାଙ୍କକୁ ଚାରିଟି ବଡ଼ ବ୍ୟାଙ୍କିଂ ସଂସ୍ଥାରେ ମିଶ୍ରଣ କରିବାକୁ ନିଷ୍ପତ୍ତି ନେଇଥିଲେ । ଏହା ପରେ, ଦେଶରେ ସରକାରୀ କ୍ଷେତ୍ରର ବ୍ୟାଙ୍କ ସଂଖ୍ୟା ୨୭ରୁ ୧୨କୁ ହ୍ରାସ ପାଇଥିଲା । ଲୋକଙ୍କ ମଧ୍ୟରେ ଦ୍ଵନ୍ଦ୍ଵ ସୃଷ୍ଟି କରିବା ଲାଗି କିଛି ଦୁର୍ବୃତ୍ତ ଏହି ପ୍ରକୃତ ଘଟଣାକୁ ଉଲ୍ଲେଖ କରି ବ୍ୟାଙ୍କ ମିଶ୍ରଣ ସମ୍ପର୍କିତ ନକଲି ଦାବିଗୁଡ଼ିକ ସମୟ ସମୟରେ ସୋସିଆଲ ମିଡିଆରେ ପ୍ରସାରିତ କରୁଛନ୍ତି । ତେବେ କୌଣସି ଦାବିଗୁଡ଼ିକୁ ସତ ମାନିବା ପୂର୍ବରୁ ଏହାର ମାଲିକାନା ବା ଅନ୍ଥେଟିସିଟି ଯାଞ୍ଚ କରନ୍ତୁ । ବର୍ତ୍ତମାନ ଡିଜିଟାଲୁ ଯୁଗରେ ସୋସିଆଲ ମିଡିଆରେ ଏପରି ଅନେକ ମିଥ୍ୟା ଖବର ପ୍ରସାରିତ ହେଉଛି, ଏହାକୁ ସହଜରେ ବିଶ୍ଵାସ କରନ୍ତୁ ନାହିଁ ।