Fake Note Detection / ନକଲି ନୋଟ୍ ନେଇ ବ୍ୟାଙ୍କକୁ ଯାଉଥିଲେ ସାବଧାନ, ସେହି କ୍ଷଣି ଧରାପଡ଼ିବେ; RBIର କଡ଼ା ନିର୍ଦ୍ଦେଶ

ନୂଆଦିଲ୍ଲୀ: ଯଦି ଆପଣ ବ୍ୟାଙ୍କରୁ ଟଙ୍କା ଉଠାନ୍ତି, ତେବେ ଏହି ଖବରଟି ଆପଣଙ୍କ ପାଇଁ । ଏବେ ବ୍ୟାଙ୍କଗୁଡ଼ିକରେ ନକଲି ନୋଟ୍ ବାହାରିବାର ସମ୍ଭାବନା ବହୁତ କମିପାରେ । ଭାରତୀୟ ରିଜର୍ଭ ବ୍ୟାଙ୍କ ସମସ୍ତ ବ୍ୟାଙ୍କକୁ ବିଶେଷ କରି ଅନ୍ତର୍ଜାତୀୟ ସୀମାକୁ ଲାଗି ରହିଥିବା ଜିଲ୍ଲା ନିକଟ ସମସ୍ତ ବ୍ୟାଙ୍କରେ ମୁଦ୍ରା ଯାଞ୍ଚ ମେସିନ୍ ସ୍ଥାପନ କରିବାକୁ ନିର୍ଦ୍ଦେଶ ଜାରି କରିଛି । ଫଳରେ ସୀମା ପାର ହୋଇ ଆସୁଥିବା ନକଲି ନୋଟ୍ଗୁଡ଼ିକୁ ତୁରନ୍ତ ଚିହ୍ନଟ କରାଯାଇପାରିବ ଏବଂ ସେଗୁଡ଼ିକୁ ପୁନଃବ୍ୟବହାର ହେବାରୁ ରୋକିହେବ।

• ନକଲି ଟଙ୍କାର ସମସ୍ୟା ଅନେକ ଦିନରୁ ରହିଛି

ଭାରତରେ ନକଲି ନୋଟର ସମସ୍ୟା ଅନେକ ଦିନ ଧରି ରହିଛି । ଏହାକୁ ରୋକିବା ପାଇଁ ୨୦୧୬ରେ ବିମୁଦ୍ରୀକରଣ କାର୍ଯ୍ୟକାରୀ କରାଯାଇଥିଲା । ପୁରୁଣା ୫୦୦ ଏବଂ ୧୦୦୦ ଟଙ୍କିଆ ନୋଟ୍ ପ୍ରଚଳନକୁ ବାଦ୍ ଦିଆଯାଇଥିଲା । ପରବର୍ତ୍ତୀ ସମୟରେ ୨୦୦୦ ଟଙ୍କିଆ ନୋଟ୍ ପ୍ରଚଳନ କରାଯାଇଥିଲା, କିନ୍ତୁ ଏହାକୁ ମଧ୍ୟ ଧୀରେ ଧୀରେ ବନ୍ଦ କରାଯାଇଥିଲା । ଏହି ବିମୁଦ୍ରୀକରଣ ମଧ୍ୟ ଦେଶରେ ନକଲି ଟଙ୍କାର ପ୍ରଚଳନକୁ ସମ୍ପୂର୍ଣ୍ଣ ଭାବରେ ରୋକିବାରେ ସଫଳ ହୋଇନଥିଲା । ଏବେ RBI ସ୍ପଷ୍ଟ ଭାବରେ ବ୍ୟାଙ୍କଗୁଡ଼ିକୁ ଏହି ସମ୍ପର୍କରେ କଠୋର ନିୟମ ଲାଗୁ କରିବାକୁ ନିର୍ଦ୍ଦେଶ ଦେଇଛି ।

• ସମସ୍ତ ନୋଟ୍ ଯାଞ୍ଚ କରାଯିବ

ଆରବିଆଇ ଏହାର ତଦନ୍ତରେ ଜାଣିପାରିଲା ଯେ କିଛି ବ୍ୟାଙ୍କ ନକଲି ନୋଟ୍ ଚିହ୍ନଟ କରିବା ପାଇଁ ଯଥେଷ୍ଟ ପ୍ରୟାସ କରୁନାହାନ୍ତି । ଏହା ପରେ ଏପ୍ରିଲରେ ଜାରି ହୋଇଥିବା ନୂତନ ସରକାରୀ ନିୟମାବଳୀ ଅନୁଯାୟୀ ବ୍ୟାଙ୍କଗୁଡ଼ିକ ନକଲି ନୋଟ୍ ଚିହ୍ନଟ, ରିପୋର୍ଟିଂ ଏବଂ ତଦାରଖ ସମ୍ବନ୍ଧୀୟ ନିୟମାବଳୀକୁ କଡ଼ାକଡ଼ି ପାଳନ କରିବେ । ସମସ୍ତ ବ୍ୟାଙ୍କ ନକଲି ନୋଟ୍‌କୁ କିପରି ଚିହ୍ନିବେ ତାହା ଜାଣିବା ଲାଗି କ୍ୟାସ୍ କାଉଣ୍ଟର କର୍ମଚାରୀମାନଙ୍କୁ ସମ୍ପୂର୍ଣ୍ଣ ତାଲିମ ଦେବାକୁ ମଧ୍ୟ ବାଧ୍ୟତାମୂଳକ କରାଯାଇଛି ।

ପଢନ୍ତୁ ଏହି ଖବର: ବୟସ ମାତ୍ର ୨୨; ଏମିତି କୋଟିପତି ହୋଇଗଲେ ଭାରତୀୟ GenZ

• ବ୍ୟାଙ୍କଗୁଡ଼ିକର ପ୍ରସ୍ତୁତି ଜୋରଦାର

ଆରବିଆଇ ସ୍ପଷ୍ଟ କରିଛି ଯେ ବ୍ୟାଙ୍କକୁ ଆସୁଥିବା ପ୍ରତ୍ୟେକ ନୋଟକୁ ମେସିନ୍ ଦ୍ୱାରା ଯାଞ୍ଚ କରାଯିବ । ଯଦି କୌଣସି ନକଲି ନୋଟ୍ ମିଳେ, ତେବେ ଏହାକୁ ତୁରନ୍ତ ଜବତ କରାଯିବ । କୌଣସି ପରିସ୍ଥିତିରେ ନୋଟ୍ ଫେରସ୍ତ କରାଯିବ ନାହିଁ ଏବଂ ବ୍ୟାଙ୍କଗୁଡ଼ିକ ଏହାକୁ ନିଜେ ନଷ୍ଟ କରିପାରିବେ ନାହିଁ । ନିୟମ ଅନୁଯାୟୀ ପ୍ରତ୍ୟେକ ନକଲି ଭାରତୀୟ ନୋଟ୍ ବିଷୟରେ ସମ୍ପୃକ୍ତ ସରକାରୀ ସଂସ୍ଥାଗୁଡ଼ିକୁ ଖବର ଦିଆଯିବ । ଫଳରେ ସୀମା ପାର ହୋଇ ଆସୁଥିବା ନକଲିଗୁଡ଼ିକୁ ଜବତ କରାଯାଇପାରିବ ଓ ସେଗୁଡ଼ିକର ପୁନଃବ୍ୟବହାରକୁ ମଧ୍ୟ ରୋକାଯାଇହେବ ।