ରାୟପୁର: ସରଳ ମୁହଁଟିଏ । ପରିଣତ ବୟସ । ହେଲେ ବୁଦ୍ଧିରେ ଆଜିକାଲିର Gen Z ବି ପଛରେ ପଡ଼ିବେ । ଛତିଶଗଡ଼ର କ୍ୟାପିଟାଲ ସିଟି ରାୟପୁରର ଏକ ୪ ତାରକା ହୋଟେଲରେ ରହୁଥିବା ଜଣେ ୬୯ ବର୍ଷୀୟ ବ୍ୟକ୍ତିଙ୍କ ଚୋରି ବିଦ୍ୟା କାହାକୁ ବି ଆଶ୍ଚର୍ଯ୍ୟ କରିବ । ପ୍ରାୟ ୬୪,୦୦୦ ଟଙ୍କାର ବିଲ୍ ନ ଦେଇ ଚୁପଚାପ୍ ଚେକ୍ ଆଉଟ୍ କରିଥିଲେ ଏହି ବୃଦ୍ଧ । ଖାଲି ସେତିକି ନୁହେଁ ହୋଟେଲର ୧.୪୮ ଲକ୍ଷ ଟଙ୍କାର ଏକ ଲାପଟପ୍ ମଧ୍ୟ ନେଇ ଚମ୍ପଟ୍ ମାରିଥିଲେ । ପୋଲିସ ବୃଦ୍ଧଙ୍କ ଅପରାଧ ରେକର୍ଡ ଯାଞ୍ଚ କରିବା ପରେ ମୁଣ୍ଡରେ ହାତ ଦେଇଛି । ସେ ବିଦେଶୀ ଟୁର୍ ଗାଇଡ୍, ଇଂରାଜୀ ଶିକ୍ଷକ କିମ୍ବା ଯୋଗ ପ୍ରଶିକ୍ଷକ ସାଜି ହୋଟେଲରେ ରହୁଥିଲେ, ବିଲ୍ ନଦେଇ ଫେରାର ହେବା ସହ ମୂଲ୍ୟବାନ ସାମଗ୍ରୀ ମଧ୍ୟ ନେଇଯାଉଥିବା ପୋଲିସ କହିଛି।

ହୋଟେଲ ସୁରକ୍ଷା ଦାୟିତ୍ୱରେ ଥିବା ସୂରଜ ସିଂହ ତେଲିବନ୍ଧା ଥାନାରେ ଅଭିଯୁକ୍ତଙ୍କ ବିରୋଧରେ ମାମଲା ଦାୟର କରିଛନ୍ତି । ତଦନ୍ତ ପରେ ପୋଲିସ ଅଭିଯୁକ୍ତ ବିଙ୍ଗସନ୍ ଜନଙ୍କୁ ଓଡ଼ିଶାରୁ ଗିରଫ କରିଛି । ପଚରାଉଚରା ସମୟରେ ବିଙ୍ଗସନ୍ ଯେଉଁ ଖୁଲାସା କରିଥିଲେ ତାହା ପୋଲିସକୁ ଆଶ୍ଚର୍ଯ୍ୟ କରିଦେଇଥିଲା । ଅଭିଯୁକ୍ତ ୧୯୯୦ ମସିହାରୁ ଦେଶବ୍ୟାପୀ ୩୦୦ରୁ ଅଧିକ ପ୍ରସିଦ୍ଧ ବିଳାସପୂର୍ଣ୍ଣ ହୋଟେଲକୁ ଠକିଛି । ସେ ହୋଟେଲକୁ ଆସୁଥିଲା, ଖାଉଥିଲା, ପିଉଥିଲା, ରହୁଥିଲା ଏବଂ ପରେ ମୂଲ୍ୟବାନ ଜିନିଷପତ୍ର ନେଇ ଚମ୍ପଟ୍ ମାରୁଥିଲା । ଦୀର୍ଘ ୩୬ ବର୍ଷ ଧରି ଏହିପରି ଜୀବନଯାପନ କରୁଥିଲା ଅଭିଯୁକ୍ତ ବିଙ୍ଗସନ୍ ।

• ରାୟପୁର ହୋଟେଲ ହାୟାତରେ ଠକେଇ

ରାୟପୁର କମିଶନରେଟର ଅପରାଧ ବିରୋଧୀ ୟୁନିଟ୍ ଡିସିପି ସ୍ମୃତିକ ରାଜନାଲାଙ୍କ ଅନୁଯାୟୀ, ହୋଟେଲ ହାୟତର ସୁରକ୍ଷା ଦାୟିତ୍ୱରେ ଥିବା ସୁରଜ ସିଂହ ତେଲିବନ୍ଧା ପୋଲିସ ଷ୍ଟେସନରେ ଏକ ମାମଲା ରୁଜୁ କରିଥିଲେ । ସେ କହିଥିଲେ ଯେ ୨୫ ତାରିଖରେ ଅଭିଯୁକ୍ତ ହୋଟେଲର ଏକ କୋଠରୀରେ ରହିଥିଲା । ସେ ଜୁନ ୨୭ ତାରିଖ ସକାଳ ପ୍ରାୟ ୭.୪୪ଟାରେ ଚେକ୍-ଆଉଟ୍ ପ୍ରକ୍ରିୟା ସମାପ୍ତ ନକରି ହୋଟେଲ ଛାଡ଼ି ପଳାଇଥିଲା । ସେ ହୋଟେଲର ₹୬୩,୭୫୫ ଟଙ୍କାର ବିଲ୍ ଦେଇନଥିଲା ଏବଂ ହୋଟେଲ ପକ୍ଷରୁ ତାର ଅନୁରୋଧ ପରେ ଦିଆଯାଇଥିବା ଏକ ₹୧.୪୮ ଲକ୍ଷ ଟଙ୍କାର ଏକ ଲାପଟପ୍ ମଧ୍ୟ ନେଇ ପଳାଇଥିଲା । ହୋଟେଲ ପରିଚାଳନା ତାଙ୍କ ମୋବାଇଲ୍ ନମ୍ବରରେ ଯୋଗାଯୋଗ କରିବାକୁ ଚେଷ୍ଟା କରିଥିଲେ, କିନ୍ତୁ ତାହା ବନ୍ଦ ରହିଥିଲା ।

• କିପରି ଧରାପଡ଼ିଲା ଅଭିଯୁକ୍ତ ବିଙ୍ଗସନ୍ ଜନ୍ ?

ରାୟପୁର ପୋଲିସ ମାମଲାର ତଦନ୍ତ ଆରମ୍ଭ କରିଛି । ହୋଟେଲରେ ଅଭିଯୁକ୍ତ ଦ୍ୱାରା ପ୍ରଦାନ କରାଯାଇଥିବା କାଗଜପତ୍ର ଏବଂ ମୋବାଇଲ୍ ନମ୍ବରଗୁଡ଼ିକ ଆଧାରରେ ତଦନ୍ତ କରାଯାଉଛି । ଏହି ତଦନ୍ତ ସମୟରେ, ଅଭିଯୁକ୍ତ ଭୁବନେଶ୍ୱରରେ ଅବସ୍ଥିତ ଥିଲା । ତାକୁ ଗିରଫ କରିବା ପାଇଁ ଏକ ଦଳ ଭୁବନେଶ୍ୱରରେ ପହଞ୍ଚି ଜନକୁ ଅଟକ ରଖିଥିଲା । ଗିରଫ ହେବା ପରେ ଅଭିଯୁକ୍ତର ପ୍ରକୃତ ପରିଚୟ ବିଙ୍ଗସନ୍ ଜନ୍ ବୋଲି ଜଣାପଡ଼ିଛି ।

ପଢନ୍ତୁ ଏହି ଖବର: ୨ କୋଟିର ବିବାହରେ ବି ମନଶାନ୍ତି ହେଲାନି; ସଲୋନିକୁ ଭିଏତନାମ ନେଇ...

• ଅଭିଯୁକ୍ତ ବିଙ୍ଗସନ୍ ଜନର ଘର କୋଉଠି ?

୬୯ ବର୍ଷୀୟ ଅଭିଯୁକ୍ତ ବିଙ୍ଗସନ୍ ଜନ୍ ତାମିଲନାଡୁର ଟୁଟିକୋରିନ୍ ଜିଲ୍ଲାର କିଲ୍ ରାସାଦାର ନଟରାଜପୁରମ୍ ଷ୍ଟ୍ରିଟ୍ ନିବାସୀ ଜ୍ଞାନ ପ୍ରକାଶଙ୍କ ପୁଅ । ସେ ୧୫ ବର୍ଷ ଧରି ବିଭିନ୍ନ ରାଜ୍ୟରେ ଜେଲରେ ବନ୍ଦୀ ମଧ୍ୟ ରହିଛି । ଦିଲ୍ଲୀର ତିହାର ଜେଲରେ ବନ୍ଦୀ ଥିବା ସମୟରେ ସେ ଅନେକ ପ୍ରମୁଖ ଅପରାଧୀଙ୍କ ସହ ସମ୍ପର୍କରେ ଥିଲା । ୧୯୯୦ ମସିହାରୁ ସେ ଦେଶର ପ୍ରସିଦ୍ଧ ହୋଟେଲଗୁଡ଼ିକୁ ଠକି ଆସୁଥିଲା । ସେ ୩୦୦ରୁ ଅଧିକ ହୋଟେଲରେ ରହି ଟଙ୍କା ନ ଦେଇ ଚାଲିଯାଇଥିବା ଅଭିଯୋଗ ରହିଛି ।