ନୋଏଡା ମଡେଲ ତଥା ଅଭିନେତ୍ରୀ ତ୍ଵିଶା ଶର୍ମା ଆତ୍ମହତ୍ୟା ଘଟଣାରେ ଏକ ବଡ଼ ଖବର ସାମ୍ନାକୁ ଆସିଛି । ତ୍ଵିଶାଙ୍କ ସ୍ଵାମୀ ସମର୍ଥ ସିଂହଙ୍କ ଓକିଲ ମୁଗେନ୍ଦ୍ର ସିଂ ତାଙ୍କ କେସ୍ ଲଢିବାକୁ ସିଧାସିଧା ମନା କରିଦେଇଛନ୍ତି । ସେ ଏବେ ସମର୍ଥ ଓ ତ୍ଵିଶାଙ୍କ ଶାଶୁ ଗିରିବାଲା ସିଂହଙ୍କ କେସ୍ ଲଢିବେ ନାହିଁ ବୋଲି ଗଣମାଧ୍ୟମକୁ ସୂଚିତ କରିଛନ୍ତି । ତେବେ ଗତକାଲି ତ୍ଵିଶାଙ୍କ ଦ୍ଵିତୀୟ ଶବ ବ୍ୟବଚ୍ଛେଦ ପରେ ଅନ୍ତିମ ସଂସ୍କାର ହୋଇଛି, ଏପଟେ ସ୍ଵାମୀଙ୍କ ପାଇଁ କେସ୍ ଲଢୁଥିବା ଓକିଲଙ୍କ ଏପରି ନିଷ୍ପତ୍ତିକୁ ନେଇ ଏବେ ଚର୍ଚ୍ଚା ହେଉଛି ।

ମୁଗେନ୍ଦ୍ର ସିଂ କହିଛନ୍ତି ଯେ ସେ ପରିବାରକୁ ପରାମର୍ଶ ଦେଇଥିଲେ ଯେ ସିଦ୍ଧାର୍ଥ ଆତ୍ମସମର୍ପଣ କରିଦିଅନ୍ତୁ । ତାଙ୍କ ପରାମର୍ଶ ପରେ ହିଁ ସମର୍ଥ ଆତ୍ମସମର୍ପଣ କରିଥିଲେ, କିନ୍ତୁ ପରିବାର ଆଇନଜୀବୀ ମୁଗେନ୍ଦ୍ରଙ୍କ ଏହି ନିଷ୍ପତ୍ତିକୁ ନେଇ ଅସନ୍ତୋଷ ବ୍ୟକ୍ତ କରିଥିଲେ । ସିଦ୍ଧାର୍ଥ ପୋଲିସ ଆଗରେ ଆତ୍ମସମର୍ପଣ କରିବାକୁ ପରିବାର ହୁଏତ ଚାହୁଁନଥିଲା ବୋଲି କହିଛନ୍ତି ଆଇନଜୀବୀ ମୁଗେନ୍ଦ୍ର । ଏଠାରେ କହିରଖୁଛୁ କି, ତ୍ଵିଶାଙ୍କ ଆତ୍ମହତ୍ୟାର ପ୍ରାୟ ୧୦ ଦିନ ପରେ ଅଭିଯୁକ୍ତ ସ୍ଵାମୀ ସିଦ୍ଧାର୍ଥଙ୍କୁ ଗିରଫ କରିଥିଲା ପୋଲିସ ।

• ସମର୍ଥଙ୍କୁ ଶକ୍ତ ଝଟକା

ଜଣାଶୁଣା ଆଇନଜୀବୀ ମୁଗେନ୍ଦ୍ର ସିଂ କେସ୍ ଛାଡ଼ିବା ପରେ ଏବେ ତ୍ଵିଶାଙ୍କ ସ୍ଵାମୀ ସମର୍ଥଙ୍କ ଆଇନ ଟିମକୁ ଶକ୍ତ ଝଟକା ଲାଗିଛି । ଆଗକୁ ଏହି ହାଇପ୍ରୋଫାଇଲ ମାମଲାଟି ଉଭୟ ସୁପ୍ରିମକୋର୍ଟ ଓ ହାଇକୋର୍ଟରେ ଅଲଗା ଅଲଗା ଶୁଣାଣି ହେବ । ଏହା ପୂର୍ବରୁ ଆଇନଜୀବୀ ମୁଗେନ୍ଦ୍ରଙ୍କ ଏହି ନିଷ୍ପତ୍ତି ତ୍ଵିଶାଙ୍କ ଶାଶୁ ଗିରିବାଲା ସିଂହଙ୍କ ଚିନ୍ତା ବଢାଇଛି ।

• ହାଇକୋର୍ଟରେ ଆଜି ଶୁଣାଣି

ରବିବାର ଅପରାହ୍ନରେ ତ୍ଵିଶାଙ୍କ ଅନ୍ତିମ ସଂସ୍କାର ପରେ ତ୍ଵିଶାଙ୍କ ପରିବାର ଏବେ ଭୋପାଳରେ ଅଛନ୍ତି । ମଧ୍ୟପ୍ରଦେଶ ହାଇକୋର୍ଟରେ ମାମଲାର ଆଜି ଶୁଣାଣି ହେବ ଏବଂ ପରିବାର ଶୁଣାଣି ସମୟରେ ହାଇକୋର୍ଟରେ ଉପସ୍ଥିତ ରହିବେ । ଏହାପରେ ମଙ୍ଗଳବାର ସେମାନେ ନୋଏଡାକୁ ଫେରିବେ । ନୋଏଡାରେ ୧୩ ଦିନ ପରେ ଅନ୍ୟାନ୍ୟ ଶୁଦ୍ଧିକ୍ରିୟା ହେବ । ତେବେ ତ୍ଵିଶାଙ୍କ ପରିବାର ସିବିଆଇ ତଦନ୍ତ ଲାଗି ଦାବି କରିଆସୁଥିଲା । ତେବେ ସିବିଆଇ ଦିନେ କି ୨ଦିନ ମଧ୍ୟରେ ଏହି ମାମଲାକୁ ହାତକୁ ନେବ ବୋଲି ଆଜି ସୁପ୍ରିମକୋର୍ଟ କହିଛନ୍ତି । ଏଠାରେ କହିରଖୁଛୁ କି, ସୁପ୍ରିମକୋର୍ଟରେ ମଧ୍ୟ ଆଜି ଶୁଣାଣି ହୋଇଛି । ଉଚ୍ଚତମ ନ୍ୟାୟାଳୟ ଗଣମାଧ୍ୟମକୁ ଦାୟିତ୍ୱପୂର୍ଣ୍ଣ ଭାବରେ ନିଜର କର୍ତ୍ତବ୍ୟ ପାଳନ କରିବାକୁ ଏବଂ କୌଣସି ପକ୍ଷର ବୟାନ ଉପରେ ଆଧାରିତ ଦାବିକୁ ନେଇ ଖବର ପ୍ରସାରଣ ନକରିବାକୁ ଅନୁରୋଧ କରିଛନ୍ତି ।

ପଢନ୍ତୁ ଏହି ଖବର: ଯେଉଁ ଝିଅକୁ କୋଳେଇଥିଲି, କାଖେଇଥିଲି...ଦ୍ଵିତୀୟ ପୋଷ୍ଟମର୍ଟମ ପରେ ତ୍ଵିଶାଙ୍କୁ ବିଦାୟ ଦେଲେ ବାପା

• କେମିତି ହୋଇଥିଲା ତ୍ଵିଶାଙ୍କ ମୃତ୍ୟୁ ?

ନୋଏଡାର ୩୩ ବର୍ଷୀୟ ମଡେଲ ତ୍ଵିଶାଙ୍କ ବିବାହ ଡିସେମ୍ବର ୨୦୨୫ରେ ହୋଇଥିଲା । ପରିବାର ଲୋକଙ୍କ ଅଭିଯୋଗ ଅନୁସାରେ ବିବାହର ମାତ୍ର ୧ ବର୍ଷ ପରେ ଦୁଇ ଜଣଙ୍କ ସମ୍ପର୍କରେ ତିକ୍ତତା ଆସିଥିଲା । ଗତ ମେ ୧୨ ତାରିଖରେ ତ୍ଵିଶାଙ୍କ ଝୁଲନ୍ତା ମୃତଦେହ ତାଙ୍କ ଶାଶୁଘରେ ମିଳିଥିଲା । ତ୍ଵିଶାଙ୍କ ପ୍ରଥମ ପୋଷ୍ଟମର୍ଟମରୁ ସେ ଆତ୍ମହତ୍ୟା (ରସି ଲଗାଇ) କରିଥିବା ଜଣାପଡ଼ିଥିଲା । ତ୍ଵିଶାଙ୍କ ଶରୀରରେ ଅନେକ ଦାଗ ଥିବାରୁ ପରିବାର ପୋଷ୍ଟମର୍ଟମ ରିପୋର୍ଟରେ ସନ୍ତୁଷ୍ଟ ନଥିଲା, ଏଣୁ ଦ୍ଵିତୀୟ ପୋଷ୍ଟମର୍ଟମ ପାଇଁ ଦାବି କରିଥିଲା । ଝିଅକୁ ଯୌତୁକ ନିର୍ଯାତନା ଦିଆଯାଉଥିବା ଅଭିଯୋଗ କରିବା ସହ ତାଙ୍କୁ ହତ୍ୟା କରାଯାଇଥିବା ଅଭିଯୋଗ ମଧ୍ୟ ଆଣିଥିଲେ ।