Twisha Sharma Funeral / ଯେଉଁ ଝିଅକୁ କୋଳେଇଥିଲି, କାଖେଇଥିଲି....ଦ୍ଵିତୀୟ ପୋଷ୍ଟମର୍ଟମ ପରେ ତ୍ଵିଶାଙ୍କୁ ବିଦାୟ ଦେଲେ ବାପା

ଯେଉଁ ଝିଅକୁ କାଖେଇ ଥିଲି, କୋଳରେ ଧରିଥିଲି, କାନ୍ଧରେ ବସାଇ ଦୁନିଆ ଦେଖାଇଥିଲି...ଆଉ ବୋହୂ କରି ଶାଶୁଘର ପଠେଇଥିଲି, ଆଜି ସେହି ଝିଅର ଅନ୍ତିମ ଯାତ୍ରାରେ ତାର କୋକେଇକୁ କାନ୍ଧ ଦେବାକୁ ପଡୁଛି । ତ୍ଵିଶା କେବଳ ତାଙ୍କ ଝିଅ ନଥିଲେ, ବରଂ ଅମୂଲ୍ୟ ରତ୍ନ ଥିଲା । କିଛି ଏମିତି ଲେଖି ତ୍ଵିଶାର ଅନ୍ତିମ ସଂସ୍କାରରେ ସାମିଲ ହେବାକୁ କିଛି ସଂଗଠନ ଓ ଲୋକଙ୍କୁ ନିବେଦନ କରିଥିଲେ ତ୍ଵିଶାଙ୍କ ପିତା । ଏହି ଚିଠି ଯିଏ ପଢିଥିଲା, ସିଏ ଭାବବିହ୍ଵଳ ହୋଇପଡ଼ିଥିଲା । ନୋଏଡା ମଡେଲ ତଥା ଅଭିନେତ୍ରୀ ତ୍ଵିଶା ଶର୍ମାଙ୍କ ଦ୍ଵିତୀୟ ପୋଷ୍ଟମର୍ଟମ ପରେ ଆଜି ହୋଇଛି ଅନ୍ତିମ ସଂସ୍କାର ।

ତ୍ଵିଶାଙ୍କ ଅନ୍ତିମ ସଂସ୍କାର ଭୋପାଳର ଭଦଭଦା ବିଶ୍ରାମଘାଟରେ ହୋଇଛି । ଦ୍ଵିତୀୟ ଶବ ବ୍ୟବଚ୍ଛେଦ ପ୍ରକ୍ରିୟା ଶେଷ ହେବା ପରେ ତାଙ୍କ ପରିବାର ସିଧା ତାଙ୍କୁ ଆଣି ଘାଟରେ ପହଞ୍ଚିଥିଲେ । ତ୍ଵିଶାଙ୍କୁ ଅନ୍ତିମ ବିଦାୟ ଦେବା ଲାଗି ପୂରା ପରିବାର ସହିତ ଅନେକ ସମ୍ପର୍କୀୟ ପହଞ୍ଚିଥିଲେ । ଅନ୍ତିମ ସଂସ୍କାର ପୂର୍ବରୁ ତ୍ଵିଶାଙ୍କ ପିତା ଏକ ଚିଠି ଲେଖି ଝିଅକୁ ଅନ୍ତିମ ବିଦାୟ ଦେବାକୁ ପରିବାର, ସଂଗଠନ ଓ ଅନ୍ୟାନ୍ୟ ଲୋକଙ୍କୁ ନିବେଦନ କରିଥିଲେ ।

• ଦିଲ୍ଲୀ AIIMSରେ ପୋଷ୍ଟମର୍ଟମ

ପରିବାର ଲୋକେ ଦ୍ଵିତୀୟ ବ୍ୟବଚ୍ଛେଦ ପାଇଁ ଦାବି କରିବା ପରେ କୋର୍ଟ ମଧ୍ୟ ନିର୍ଦ୍ଦେଶ ଦେଇଥିଲେ । ଏହାପରେ ତ୍ଵିଶାଙ୍କ ଦ୍ଵିତୀୟ ପୋଷ୍ଟମର୍ଟମ ଦିଲ୍ଲୀ ଏମ୍ସରେ ହୋଇଥିଲା । ଏଠାରେ ଏକ ସ୍ଵତନ୍ତ୍ର ଡାକ୍ତରୀ ଦଳ ଶବ ବ୍ୟବଚ୍ଛେଦ କରିଥିଲେ । କୋର୍ଟଙ୍କ ଦ୍ଵାରା ଗଠିତ ଏହି ଟିମରେ ୪ ଜଣ ବରିଷ୍ଠ ଡାକ୍ତର ଥିଲେ । ଫରେନ୍ସିକ ବିଭାଗର ମୁଖ୍ୟ ଡକ୍ଟର ସୁଧୀର ଗୁପ୍ତାଙ୍କ ତତ୍ତ୍ଵାବଧାନରେ ଶବ ବ୍ୟବଚ୍ଛେଦ କରାଯାଇଥିଲା । ଆଧୁନିକ ଉପକରଣର ବ୍ୟବହାର କରି ପୁରା ପ୍ରକ୍ରିୟା ହୋଇଥିଲା, ଯାହାଦ୍ଵାରା ମୃତ୍ୟୁର କାରଣକୁ ନେଇଆଉ ଯେପରି କୌଣସି ସନ୍ଦେହ ରହିବ ନାହିଁ ଓ ତ୍ଵିଶାଙ୍କ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ।

• ତଦନ୍ତ କରୁଛି SIT

ଏହି ହାଇପ୍ରୋଫାଇଲ ମାମଲାର ଯାଞ୍ଚ କରୁଛି ଏସଆଇଟି ଟିମ । ତଦନ୍ତକାରୀ ଦଳ ତ୍ଵିଶାଙ୍କ ଶାଶୁ ଗିରିବାଲା ଓ ସ୍ଵାମୀ ସିଦ୍ଧାର୍ଥଙ୍କୁ ଘରେ ରହିବାକୁ ନିର୍ଦ୍ଦେଶ ଦେଇଛି । ମାମଲାର ୧୦ ଦିନ ପରେ ସ୍ଵାମୀ ସିଦ୍ଧାର୍ଥଙ୍କୁ ଗିରଫ କରିଥିଲା ପୋଲିସ । ଆଶା କରାଯାଉଛି ଟିମ ତୁରନ୍ତ ସିଦ୍ଧାର୍ଥଙ୍କୁ ନେଇ ତ୍ଵିଶାଙ୍କ ଶାଶୁଘରେ ପହଞ୍ଚିପାରେ, ଯେଉଁଠି ଘଟଣାର ରିକ୍ରିଏସନ କରାଯିବ । ପୋଲିସ ଏବେ ଏହି ମାମଲାରୁ ବିଭିନ୍ନ ଦିଗରୁ ତଦନ୍ତ କରୁଛି । ଦ୍ଵିତୀୟ ପୋଷ୍ଟମର୍ଟମ ରିପୋର୍ଟ ଆସିବା ପରେ ସବୁ ସତ ଜଣାପଡ଼ିବ ।

ପଢନ୍ତୁ ଏହି ଖବର: ତ୍ଵିଶା ଶର୍ମା ମୃତ୍ୟୁ ମାମଲା: ଦ୍ୱିତୀୟ ଥର ଶବ ବ୍ୟବଚ୍ଛେଦ ପାଇଁ ଭୋପାଳରେ ଦିଲ୍ଲୀ ଏମ୍ସ ଟିମ୍

• କେମିତି ହୋଇଥିଲା ତ୍ଵିଶାଙ୍କ ମୃତ୍ୟୁ ?

ନୋଏଡାର ୩୩ ବର୍ଷୀୟ ମଡେଲ ତ୍ଵିଶାଙ୍କ ବିବାହ ଡିସେମ୍ବର ୨୦୨୫ରେ ହୋଇଥିଲା । ପରିବାର ଲୋକଙ୍କ ଅଭିଯୋଗ ଅନୁସାରେ ବିବାହର ମାତ୍ର ୧ ବର୍ଷ ପରେ ଦୁଇ ଜଣଙ୍କ ସମ୍ପର୍କରେ ତିକ୍ତତା ଆସିଥିଲା । ଗତ ମେ ୧୨ ତାରିଖରେ ତ୍ଵିଶାଙ୍କ ଝୁଲନ୍ତା ମୃତଦେହ ତାଙ୍କ ଶାଶୁଘରେ ମିଳିଥିଲା । ତ୍ଵିଶାଙ୍କ ପ୍ରଥମ ପୋଷ୍ଟମର୍ଟମରୁ ସେ ଆତ୍ମହତ୍ୟା (ରସି ଲଗାଇ) କରିଥିବା ଜଣାପଡ଼ିଥିଲା । ତ୍ଵିଶାଙ୍କ ଶରୀରରେ ଅନେକ ଦାଗ ଥିବାରୁ ପରିବାର ପୋଷ୍ଟମର୍ଟମ ରିପୋର୍ଟରେ ସନ୍ତୁଷ୍ଟ ନଥିଲା । ଏଣୁ ଦ୍ଵିତୀୟ ପୋଷ୍ଟମର୍ଟମ ପାଇଁ ଦାବି କରିଥିଲା । ଝିଅକୁ ଯୌତୁକ ନିର୍ଯାତନା ଦିଆଯାଉଥିବା ଅଭିଯୋଗ କରିବା ସହ ତାଙ୍କୁ ହତ୍ୟା କରାଯାଇଥିବା ଅଭିଯୋଗ ମଧ୍ୟ ଆଣିଥିଲେ ।