ଉତ୍ତର ପ୍ରଦେଶର ଆଗ୍ରାରୁ ଏମିତି ଏକ ହତ୍ୟାକାଣ୍ଡ ଖବର ସାମ୍ନାକୁ ଆସିଛି, ଯଆହାକି ପୋଲିସ ଓ ସ୍ଥାନୀୟ ଲୋକଙ୍କୁ ଆଶ୍ଚର୍ଯ୍ୟଚକିତ କରିଛି । ପ୍ରାୟ ୪୫ ଦିନ ପର୍ଯ୍ୟନ୍ତ ଜଣେ ବ୍ୟକ୍ତି ନିଖୋଜ ଥିବା ଚର୍ଚ୍ଚା ହେଉଥିଲା, କିନ୍ତୁ ଯେତେବେଳେ ପୋଲିସ ଘରର ବାଥରୁମ ଟାଇଲ୍ ଭାଙ୍ଗିଥିଲା ସେତେବେଳେ ଟାଇଲ୍ ତଳୁ ବ୍ୟକ୍ତିଙ୍କ ମୃତଦେହ ମିଳିଛି । ଏହି ଘଟଣାରେ ଏବେ ମୃତବ୍ୟକ୍ତିଙ୍କ ପତ୍ନୀକୁ ପୋଲିସ ପଚରାଉଚରା କରୁଛି ।

• ମେ ୧୮ରୁ ନିଖୋଜ ଥିଲେ

ଆଗ୍ରାର ସିକନ୍ଦରା ଥାନା ଅଞ୍ଚଳର ପ୍ରାଚୀ ଟାୱାର ଛକ ନିକଟସ୍ଥ ରେଣୁକା ଧାମ କଲୋନିର ଘଟଣା । ଏଠାରେ ରହୁଥିବା ୪୪ ବର୍ଷୀୟ ସୁରେନ୍ଦ୍ର କୁମାର ଶର୍ମା ଗତ ମେ ୧୮ ତାରିଖଠାରୁ ନିଖୋଜ ଥିଲେ । ପରିବାର ଓ ସମ୍ପର୍କୀୟ ତାଙ୍କୁ ଖୋଜୁଥିଲେ । ଏହି ସମୟରେ ଯିଏ ପଚାରୁଥିଲା, ପତ୍ନୀ ରୁବି କହୁଥିଲେ ଯେ ସେ କେଉଁଆଡ଼େ ଚାଲିଯାଇଛନ୍ତି କିନ୍ତୁ ନିଶ୍ଚିତ ଭାବରେ ସେ ଶୀଘ୍ର ଫେରିବେ । ଏହାପରେ ମେ ୨୬ ତାରିଖରେ ଏକ ନିଖୋଜ ମାମଲା ରୁଜୁ ହୋଇଥିଲା ।

• କେମିତି ଜଣାପଡ଼ିଲା ସତ ?

ପୋଲିସ ପଚରାଉଚରା ସମୟରେ ପତ୍ନୀଙ୍କ କଥାରେ ମେଳ ଖାଉନଥିଲା । ଗତ ଶୁକ୍ରବାର ପୋଲିସ ପୁଣିଥରେ ପଚରାଉଚରା ପାଇଁ ମୃତ ବ୍ୟକ୍ତି ସୁରେନ୍ଦ୍ରଙ୍କ ଘରେ ପହଞ୍ଚିଥିଲା । ଏହି ସମୟରେ ପତ୍ନୀଙ୍କ ବ୍ୟବହାର ପୋଲିସର ସନ୍ଦେହକୁ ଆହୁରି ତୀବ୍ର କରିଥିଲା । ଏହି ସମୟରେ ମୃତକଙ୍କ ଭାଇ ଅନିଲ ଶର୍ମା ପୋଲିସକୁ କିଛି ଗୁରୁତ୍ଵପୂର୍ଣ୍ଣ ସୂଚନା ଦେଇଥିଲେ । ଏହାପରେ ପୋଲିସ ପୂରା ଘରେ ଯାଞ୍ଚ କରିଥିଲା ।

ପଢନ୍ତୁ ଏହି ଖବର: ଘରୁ ସୁନା ଅଳଙ୍କାର ଚୋରି କଲେ; ଧରାପଡ଼ିଯିବାରୁ ଡ୍ରେସ୍ ଖୋଲିବାକୁ ଧମକ

ଏହି ସମୟରେ ପୋଲିସର ନଜର ବାଥରୁମ ଟାଇଲ୍ ଉପରେ ପଡ଼ିଥିଲା । ତାଜା ପ୍ଲାଷ୍ଟର ହେବା ଦେଖି ପୋଲିସର ସନ୍ଦେହ ହୋଇଥିଲା । ଏହାପରେ ବାଥରୁମ ଟାଇଲ୍ ହଟାଇ ଖୋଳାଖୋଳି ଆରମ୍ଭ ହୋଇଥିଲା ଏବଂ ଟାଇଲ୍ ତଳୁ ସୁରେନ୍ଦ୍ର କୁମାର ଶର୍ମାଙ୍କ ଶବ ମିଳିଥିଲା । ଏହି ଖବର ନିଆଁ ପରି ଚାରିଆଡ଼େ ବ୍ୟାପିଯାଇଥିଲା । ଘଟଣାରେ ସ୍ଥାନୀୟ ଲୋକେ ଯେତିକି ଆଶ୍ଚର୍ଯ୍ୟ ସେତିକି ଭୟଭୀତ ମଧ୍ୟ ହୋଇପଡ଼ିଛନ୍ତି । ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି ଯେ ହତ୍ୟାକାରୀ ହେଉଛନ୍ତି ସୁରେନ୍ଦ୍ରଙ୍କ ସ୍ତ୍ରୀ ରୁବି । ସେ ସ୍ଵାମୀଙ୍କୁ ହତ୍ୟା କରିବା ପରେ ବାଥରୁମ ତଳେ ପୋତି ନୂଆ ଟାଇଲ୍ ଲଗାଇଥିଲେ ।

• କାହିଁକି ସ୍ଵାମୀଙ୍କୁ ହତ୍ୟା କଲେ ରୁବି ?

ମୃତକଙ୍କ ଭାଇ ଅନିଲ ଶର୍ମା କହିଥିଲେ ଯେ ସୁରେନ୍ଦ୍ର ସବୁବେଳେ ମଦ ପିଉଥିଲେ, ଯେଉଁଥିପାଇଁ ପରିବାରରେ ଅଶାନ୍ତି ଲାଗି ରହୁଥିଲା । ଏପରିକି ସୁରେନ୍ଦ୍ର ମଦ ପିଇ ତାଙ୍କ ପତ୍ନୀଙ୍କୁ ମାରପିଟ କରୁଥିଲେ । ପତ୍ନୀ ରୁବି ପ୍ରଥମେ ସୁରେନ୍ଦ୍ରଙ୍କୁ ଖିରିରେ ଏକାଧିକ ନିଦ ବଟିକା ଦେଇଥିଲା । ସୁରେନ୍ଦ୍ର ଅଚେତ ହେବାପରେ ସେ ତାଙ୍କୁ ହତ୍ୟା କରିଥିବା ପୋଲିସ ସନ୍ଦେହ କରୁଛି । ରୁବି ଏହି ହତ୍ୟାକାଣ୍ଡ ଭିଆଇବା ପରେ ନିଜେ ଫୋନ କରି ତାଙ୍କ ଶାଶୂ ଘର ଲୋକଙ୍କୁ ସ୍ଵାମୀ ନିଖୋଜ ଥିବା ନେଇ ଖବର ଦେଇଥିଲେ ଓ ପରେ ଥାନାରେ ନିଖୋଜ ରିପୋର୍ଟ ରୁଜୁ ହୋଇଥିଲା । ପରିବାର ଲଗାତାର ସୁରେନ୍ଦ୍ରଙ୍କୁ ଖୋଜୁଥିଲା, କିନ୍ତୁ କୌଣସି ସୁରାକ ମିଳୁନଥିଲା । ଶେଷରେ ପଚରାଉଚରା ପରେ ହତ୍ୟାକାରୀ ସ୍ତ୍ରୀ ନିକଟରେ ପୋଲିସ ପହଞ୍ଚିଛି । ଏବେ ସୁରେନ୍ଦ୍ରଙ୍କ ଗଳିତ ଶବକୁ ବ୍ୟବଚ୍ଛେଦ ପାଇଁ ପଠାଯାଇଛି ଏବଂ ରୁବିଙ୍କୁ ହେପାଜତକୁ ନେଇ ଅଧିତ ତଦନ୍ତ କରୁଛି ପୋଲିସ । ରୁବି ଓ ସୁରେନ୍ଦ୍ରଙ୍କ ଦୁଇଟି ଝିଅ ଥିବା ଜଣାପଡ଼ିଛି ।