Argus News - ଗୋଡ଼କୁ ରଶିରେ ବାନ୍ଧିଲା, ପ୍ରେମିକ ସହ ମିଶି ସ୍ଵାମୀର ତଣ୍ଟି କାଟିଦେଲା...

ଲକ୍ଷ୍ନୌ: ମଥାରେ ଯିଏ ସିନ୍ଦୂର ଦେଇଥିଲା, ତାରି ରକ୍ତ ପିଇଗଲା । ମାରିବା ପରେ ଚୋରି ନାଟକ ରଚିଲା । ସ୍ଵାମୀର ରକ୍ତାକ୍ତ ମୃତଦେହ ସହ ୨ ଛୁଆଙ୍କୁ ଧରି ରାତି ବି କାଟିଲା । ପରପୁରୁଷ ପ୍ରେମରେ ଅନ୍ଧ ହୋଇ ମହିଳା ଜଣଙ୍କ ଏଭଳି କାଣ୍ଡ ଭିଆଇଛନ୍ତି । ଯାହା ସମସ୍ତଙ୍କୁ ଚକିତ କରି ଦେଇଛି ।

ଉତ୍ତରପ୍ରଦେଶର ଅମରୋହା ଜିଲ୍ଲାରେ ଘଟିଥିବା ଏହି ବୀଭତ୍ସ ହତ୍ୟାକାଣ୍ଡକୁ ନେଇ ସମସ୍ତେ ସ୍ତବ୍ଧ । ହତ୍ୟା ମାମଲାରେ ପୋଲିସ ଅଭିଯୁକ୍ତ ସ୍ତ୍ରୀ ସହ ପ୍ରେମିକ ଓ ଅନ୍ଯ ଜଣେ ବନ୍ଧୁଙ୍କୁ ଗିରଫ କରିଛି ।

ଏଥିସହ ପଢ଼ନ୍ତୁ: ଲୋମହର୍ଷଣକାରୀ ଘଟଣା: ବିବାହିତ ନୌସେନା କର୍ମଚାରୀ ଘରେ ପ୍ରେମିକାଙ୍କୁ ହତ୍ୟା କଲେ, ମୃତଦେହ କାଟି ଫ୍ରିଜରେ ରଖିଲେ

ବିରୋଧରୁ ହତ୍ୟା

ମୃତକ ହେଉଛନ୍ତି ମେହରାଜ । ସେ ଅମରୋହାର ପିପଲାଓଟି କାଲା ଗାଁରେ ସ୍ତ୍ରୀ ରୁହିଙ୍କ ସହ ରହୁଥିଲେ । କିନ୍ତୁ ସ୍ତ୍ରୀ ରୁହି ମେହରାଜଙ୍କ ଭଉଣୀର ସ୍ଵାମୀ ଫରମାନଙ୍କ ସହ ଅବୈଧ ସମ୍ପର୍କରେ ଲିପ୍ତ ଥିଲେ ।

ଫରମାନଙ୍କ ସହ ବାକି ଜୀବନ ବିତାଇବାକୁ ମନ ବଳାଇ ସାରିଥିଲା ଦୁଇ ଛୁଆର ମାଆ ରୁହି । ଯାହାକୁ ନେଇ ମେହରାଜ ଓ ରୁହିଙ୍କ ମଧ୍ୟରେ ବାରମ୍ବାର ଝଗଡ଼ା ବି ହୋଇଥିଲା । ଫରମାନଙ୍କ ସହ ସମ୍ପର୍କକୁ ବିରୋଧ କରୁଥିଲେ ମେହରାଜ ।

ଖାଦ୍ୟରେ ବିଷ, ତା'ପରେ...

ଯାହା ପରେ ରୁହି ସ୍ଵାମୀ ମେହରାଜଙ୍କୁ ରାସ୍ତାରୁ ହଟାଇବା ଲାଗି ଷଡ଼ଯନ୍ତ୍ର ରଚିଥିଲା । ମେହରାଜଙ୍କ ଖାଇବାରେ ନିଶା ଔଷଧ ମିଶାଇ ଦେଇଥିଲା ରୁହି । ଏହାପରେ ଘରକୁ ଫରମାନ ସହ ଜଣେ ବନ୍ଧୁଙ୍କୁ ସେହି ରାତିରେ ଡାକିଥିଲା ।

ସମସ୍ତେ ମିଶି ମେହରାଜଙ୍କ ଗୋଡ଼କୁ ରଶିରେ ବାନ୍ଧି ଦେବା ସହ ଛୁରୀରେ ତଣ୍ଟି କାଟି ଦେଇଥିଲେ । ରାତିରେ ୩ ଜଣ ମିଶି ମେହରାଜଙ୍କୁ ନିର୍ଦ୍ଦୟ ଭାବେ ମାରିବା ପରେ ସ୍ଵାମୀର ମୃତଦେହ ସହ ରୁହି ଦୁଇ ପିଲାଙ୍କୁ ଧରି ଶୋଥିଲା ।

ସକାଳେ ମେହରାଜଙ୍କ ବାପା ଘରେ ପହଞ୍ଚିଥିଲେ । ଆଉ ଯାହା ଦେଖିଲେ ତାଙ୍କ ପାଦ ତଳୁ ମାଟି ଖସିଗଲା । କାରଣ ରକ୍ତାକ୍ତ ଅବସ୍ଥାରେ ବାରଣ୍ଡାରେ ପଡ଼ିଥିଲା ପୁଅର ଶବ, ବନ୍ଧା ହୋଇଥିଲା ହାତଗୋଡ଼ ।

ଏଥିସହ ପଢ଼ନ୍ତୁ: ମାଇଁ ପ୍ରେମରେ ଅନ୍ଧ ଭଣଜାର ନାରକୀୟ କାଣ୍ଡ! ଫିଲ୍ମି ଷ୍ଟାଇଲରେ ମାମୁଁଙ୍କୁ ହତ୍ୟା କରି...

ପୋଲିସ ଆଗରେ ସବୁ ମାନିଗଲା

ଶ୍ଵଶୁରଙ୍କୁ ଦେଖି ରୁହି ଡ୍ରାମା ଆରମ୍ଭ କରିଥିଲା । ରାତିରେ ଚୋରି ଓ ମାଡ଼ ମରା ଯାଇଥିବା କହିଥିଲା । ହେଲେ ମେହରାଜଙ୍କ ବାପା ସନ୍ଦେହ କରି ପୋଲିସକୁ ଖବର ଦେଇଥିଲେ । ପୋଲିସ ପହଞ୍ଚି ରୁହିଙ୍କୁ ହେପାଜତକୁ ନେଇ ପଚରାଉଚରା ପରେ ହତ୍ୟା ନେଇ ସବୁ ମାନି ଯାଇଥିଲା ରୁହି ।

ଏହି ମାମଲାରେ ପୋଲିସ ରୁହି ସହ ଫରମାନ ଓ ଅନ୍ୟ ଜଣେଙ୍କୁ ଗିରଫ କରିଛି । ହତ୍ୟାରେ ବ୍ୟବହୃତ ୨ଟି ଛୁରୀକୁ ଜବତ କରିଛି ପୋଲିସ । ଏବେ ୩ ଅଭିଯୁକ୍ତ ଜେଲ୍‌ରେ ଥିବା ବେଳେ ପୋଲିସ ଅଧିକ ଛାନଭିନ୍ ଜାରି ରଖିଛି ।