OAS Sexual Assault / ସହକର୍ମୀଙ୍କୁ ଯୌନ ଶୋଷଣ ଘଟଣା; ଜେଲର ୪ କାନ୍ଥ ଭିତରେ କଟିଲା ବାବୁଙ୍କ ରାତି

ଭୁବନେଶ୍ଵର: ଝାରପଡ଼ା ଜେଲର ଚାରି କାନ୍ଥ ଭିତରେ କଟିଲା ବାବୁଙ୍କ ରାତି । ଏପଟେ ସହକର୍ମୀଙ୍କୁ ଯୌନ ଶୋଷଣ ଓ ହତ୍ୟା ଉଦ୍ୟମ ଭଳି ସାଂଘାତିକ ଅଭିଯୋଗରେ ଗିରଫ ହୋଇଥିବା ପରିବହନ ବିଭାଗର ଅତିରିକ୍ତ ସଚିବ ଅରୁଣ ବିଶ୍ୱାଳଙ୍କ ମାମଲାରେ ଏବେ ଆକ୍ସନ ମୋଡ୍‌ରେ ମହିଳା କମିସନ । ପରିବହନ ବିଭାଗର ଆଡିସନାଲ ସେକ୍ରେଟାରୀ ଅରୁଣ ବିଶ୍ବାଳଙ୍କ ବିରୋଧରେ ତଦନ୍ତ ଜୋର୍‌ଦାର କରିଛି କମିସନ।

• ୧୫ ଦିନ ମଧ୍ୟରେ ରିପୋର୍ଟ ତଲବ

ଅରୁଣ ବିଶ୍ୱାଳଙ୍କ ବିରୋଧରେ BBS 218/2026ରେ ମାମଲା ରୁଜୁ କରିଛି କମିସନ । ଏହାସହ ଭୁବନେଶ୍ୱର DCPଙ୍କୁ ତଲବ କରାଯାଇଛି । ୧୫ ଦିନ ମଧ୍ୟରେ ସମ୍ପୂର୍ଣ୍ଣ ତଦନ୍ତ ରିପୋର୍ଟ ମହିଳା କମିସନଙ୍କୁ ଦେବାକୁ ନିର୍ଦ୍ଦେଶ ରହିଛି । ମାମଲାରେ ଏବେ ଅନେକ ପ୍ରଶ୍ନର ଉତ୍ତର ଖୋଜିବ ମହିଳା କମିସନ । ଅରୁଣ ବିଶ୍ୱାଳଙ୍କ ବିରୋଧରେ ପୂର୍ବରୁ କୌଣସି ଯୁବତୀ କିମ୍ବା ମହିଳା କର୍ମଚାରୀ ICC ଅର୍ଥାତ୍ ଇଣ୍ଟରନାଲ କମ୍ପ୍ଲେନ୍ କମିଟିରେ ଅଭିଯୋଗ କରିଥିଲେ କି ? ବର୍ତ୍ତମାନର ଅଭିଯୋଗକାରିଣୀ ପୂର୍ବରୁ ଅରୁଣଙ୍କ ବିରୋଧରେ ICCରେ କୌଣସି ଅଭିଯୋଗ ଦେଇଥିଲେ କି? ଅଭିଯୋଗ ପରେ ବିଭାଗୀୟ ସ୍ତରରେ କୌଣସି ତଦନ୍ତ ହୋଇଥିଲା କି? ଏସବୁ ଦିଗକୁ ନେଇ ତଥ୍ୟ ଖୋଜିବ କମିସନ ।

• ଜେଲରେ ଭିତରେ କଟିଲା ରାତି

ପୋଲିସର ତଦନ୍ତ ରିପୋର୍ଟ ମିଳିବା ପରେ OSRTCକୁ ମଧ୍ୟ ରିପୋର୍ଟ ତଲବ କରିବ ମହିଳା କମିସନ। ଅର୍ଥାତ୍ ମାମଲାରେ ପୋଲିସ ତଦନ୍ତ ସହ ବିଭାଗୀୟ ସ୍ତରରେ ଅଭିଯୋଗର ପୂର୍ବ ଓ ବର୍ତ୍ତମାନର ସ୍ଥିତିକୁ ମଧ୍ୟ ଯାଞ୍ଚ କରାଯିବ । ଜାମିନ ନାମଞ୍ଜୁର ହେବାରୁ ବିଚାର ବିଭିନ୍ନ ହାଜତ ଅର୍ଥାତ୍ ଝାରପଡ଼ା ଜେଲ୍‌କୁ ଯାଇଛନ୍ତି ରସିକିଆ ଆଡିସନାଲ ସେକ୍ରେଟାରୀ ଅରୁଣ ବିଶ୍ୱାଳ । ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ପହଞ୍ଚି ଛାନଭିନ୍ କରିଥିବା ବେଳେ, ଖାରବେଳନଗର ଥାନା ପୋଲିସ ପୀଡ଼ିତାଙ୍କ ବୟାନ ରେକର୍ଡ କରି ଅରୁଣଙ୍କୁ କୋର୍ଟଚାଲାଣ କରିଛି ।

ପଢନ୍ତୁ ଏହି ଖବର: ସହକର୍ମୀଙ୍କୁ ଯୌନ ଶୋଷଣ ମାମଲା, ୧୫ ଦିନ ମଧ୍ୟରେ ତଦନ୍ତ ରିପୋର୍ଟ ଦିଅ

ଦୁଷ୍କର୍ମ ଓ ହତ୍ୟା ଉଦ୍ୟମ ଭଳି ସାଂଘାତିକ ଅଭିଯୋଗରେ ଜଣେ ବରିଷ୍ଠ ସରକାରୀ ଅଧିକାରୀ ଗିରଫ ହୋଇ ଜେଲ୍ ଯିବା ପରେ, ବର୍ତ୍ତମାନ ସମସ୍ତଙ୍କ ନଜର ରହିଛି ପରିବହନ ବିଭାଗ ଏହାଙ୍କ ବିରୋଧରେ କିଭଳି ଓ କେଉଁ କଠିନ ବିଭାଗୀୟ କାର୍ଯ୍ୟାନୁଷ୍ଠାନ ଗ୍ରହଣ କରୁଛି ।