ବାଲିଅନ୍ତା ଭିଡ଼ ହତ୍ୟା ଘଟଣା ପରେ ପୋଲିସ ପ୍ରଶାସନ ଦ୍ୱାରା କଠୋର କାର୍ଯ୍ୟାନୁଷ୍ଠାନ ନିଆଯାଇଛି। ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି ବାଲିଅନ୍ତା ଥାନାର ଇନ୍ସପେକ୍ଟର-ଇନ୍-ଚାର୍ଜ ଅନୀଲ ପରିଡ଼ାଙ୍କୁ ଭୁବନେଶ୍ୱର ମୁଖ୍ୟାଳୟକୁ ବଦଳି କରାଯାଇଛି। ଏହା ସହିତ ଜଣେ ସବ୍- ଇନ୍ସପେକ୍ଟର , ଜଣେ ଅସିଷ୍ଟାଣ୍ଟ ସବ୍- ଇନ୍ସପେକ୍ଟର , ଜଣେ OAPF କର୍ମଚାରୀ ଓ ଜଣେ କନଷ୍ଟେବଲଙ୍କୁ ସସପେଣ୍ଡ୍ କରାଯାଇଛି ।

ଏହାସହିତ ଦୁଇ ଜଣ ହୋମଗାର୍ଡଙ୍କୁ କାର୍ଯ୍ୟରୁ ଅନ୍ତର କରାଯାଇଛି । ଘଟଣା ସମୟରେ କାର୍ଯ୍ୟରେ ଅବହେଳା ଓ ଶାନ୍ତି-ଶୃଙ୍ଖଳା ରକ୍ଷାରେ ଅସଫଳତାକୁ ନେଇ ଏହି କଠୋର ପଦକ୍ଷେପ ନିଆଯାଇଛି । ଏହି ଘଟଣା ପରେ ଅଞ୍ଚଳରେ ଚାପା ଉତ୍ତେଜନା ସୃଷ୍ଟି ହୋଇଥିବା ବେଳେ ପୋଲିସ ପ୍ରଶାସନ ଅଧିକ ସତର୍କତା ବଢ଼ାଇଛି ।

• ଘଟଣାର ତଦନ୍ତ କରୁଛି କ୍ରାଇମବ୍ରାଞ୍ଚ

ସାମ୍ନାକୁ ଆସିବ ସୌମ୍ୟ ହତ୍ୟା ଘଟଣାର ସତ । ୧୦ ଜଣ ଅଫିସରଙ୍କୁ ନେଇ ଗଠନ ହୋଇଛି କ୍ରାଇମବ୍ରାଞ୍ଚର ୨ଟି ଟିମ । ଆଜି ପ୍ରାୟ ୧୧ଟା ୩୮ ମିନିଟରେ ବାଲିଅନ୍ତା ଥାନାରେ ପହଞ୍ଚିଥିଲା କ୍ରାଇମବ୍ରାଞ୍ଚ ଟିମ । ଘଟଣା ଦିନଠାରୁ ଆଜି ପର୍ଯ୍ୟନ୍ତ ତଦନ୍ତର ରିପୋର୍ଟ ବାଲିଅନ୍ତା ଥାନାରୁ ନେଇଥିଲା କ୍ରାଇମବ୍ରାଞ୍ଚ ଟିମ । ଏହାପରେ ଅପରାହ୍ନ ୨ଟା ପାଖାପାଖି ଘଟଣାସ୍ଥଳରେ କ୍ରାଇମବ୍ରାଞ୍ଚ ଟିମ ପହଞ୍ଚି ପଡିଆରେ ତନାଘନା କରିଥିଲା । ଘଟଣାଦିନ ଉପସ୍ଥିତ ଥିବା ପିସିଆର କର୍ମଚାରୀ ରାମ ଚନ୍ଦ୍ର ବେହେରା ସମେତ ସମସ୍ତ ପୋଲିସକୁ ପଚରା ଉଚରା କରିଛି କ୍ରାଇମବ୍ରାଞ୍ଚ । ଏହାସହ କ୍ରାଇମ ସ୍ପଟରେ ଥିବା ମଇଁଷି ଗୋଠରେ ମଧ୍ୟ କ୍ରାଇମବ୍ରାଞ୍ଚ SP ଅନିରୁଦ୍ଧ ରାଉତରାୟ ଖୋଳତାଡ଼ କରିଛନ୍ତି, ଯେଉଁଠୁ ସୌମ୍ୟଙ୍କୁ ବାନ୍ଧିବା ପାଇଁ ରଶି ଓ ବାଉଁଶ ଅଣାଯାଇଥିଲା ।

ସେପଟେ ଗିରଫ ହୋଇଥିବା ଅଭିଯୁକ୍ତ ମାନଙ୍କୁ ରିମାଣ୍ଡରେ ଆଣି ଜେରା କରିପାରେ କ୍ରାଇମବ୍ରାଞ୍ଚ । ଏହାସହ ପୀଡିତାଙ୍କ ଦାଦାଙ୍କୁ ସ୍କାନରକୁ ଆଣିଛି କ୍ରାଇମବ୍ରାଞ୍ଚ । ତାଙ୍କୁ ଜେରା କରିବା ପରେ ଅଭିଯୁକ୍ତମାନଙ୍କ ପାଖରେ ପହଞ୍ଚି ପାରିବ ବୋଲି ଆଶା ରଖିଛି କ୍ରାଇମବ୍ରାଞ୍ଚ ଟିମ । ଏହି ଘଟଣାରେ ଏଯାବତ ୧୧ ଜଣଙ୍କୁ ଗିରଫ କରିଛି ପୋଲିସ ।

• କଣ ପୂରା ଘଟଣା ?

ରାଜଧାନୀରେ ଦିନ ଦ୍ଵିପ୍ରହରରେ ରାମଚନ୍ଦ୍ରପୁର ବ୍ରିଜ୍ ଉପରେ ସୀମା ଟପିଥିଲା ବର୍ବରତା । ଭିଡ଼ ହିଂସାର ଭୟାନକ ରୂପ ଦେଖିଲା ସାରା ରାଜ୍ୟ । ଯାହାର ଶିକାର ହୋଇଛନ୍ତି ଯୁବକ ସୌମ୍ୟରଞ୍ଜନ ସ୍ଵାଇଁ । ସ୍ଥାନୀୟ ଲୋକଙ୍କ ବର୍ବର ଆକ୍ରମଣରେ ତାଙ୍କର ମୃତ୍ୟୁ ହୋଇଥିବାବେଳେ ଆହତ ହୋଇଛନ୍ତି ତାଙ୍କ ସାଙ୍ଗ ଓମ୍ ପ୍ରକାଶ ରାଉତ । ସୌମ୍ୟରଞ୍ଜନ ଏବଂ ଓମ୍ ପ୍ରକାଶ ବାଇକ୍‌ରେ ଯାଉଥିବା ସମୟରେ ଦୁଇଜଣ ଯୁବତୀଙ୍କୁ ଓଭରଟେକ କରିଥିଲେ ଏବଂ ପରେ ସେମାନଙ୍କୁ ଦୁଷ୍କର୍ମ ଉଦ୍ୟମ କରିଥିବା ଅଭିଯୋଗ ହୋଇଥିଲା । ଯୁବତୀଙ୍କୁ ରକ୍ଷା କରିବାକୁ ଆସିଥିବା ସ୍ଥାନୀୟ ଗ୍ରାମବାସୀଙ୍କ ମାଡରେ ସୌମ୍ୟଙ୍କ ମୃତ୍ୟୁ ହୋଇଥିଲା ।

ପଢନ୍ତୁ ଏହି ଖବର: ରହସ୍ୟ ଘେରରେ ସୌମ୍ୟରଞ୍ଜନଙ୍କ ମୃତ୍ୟୁ ଘଟଣା,ସତ ଜାଣିବାକୁ ପୋଲିସର ତନାଘନା

ଏଭଳି ଲୋମ ଟାଙ୍କୁରା ହତ୍ୟାକୁ କିନ୍ତୁ ସହଜରେ ଗ୍ରହଣ କରିପାରୁନାହାନ୍ତି ତାଙ୍କ ପରିବାର । ଯୋଜନାବଦ୍ଧ ଭାବେ ତାଙ୍କୁ ହତ୍ୟା କରାଯାଇଥିବା ପରିବାର ଲୋକ ଅଭିଯୋଗ କରିଛନ୍ତି । ସେପଟେ କିଛି ଦିନ ତଳେ ସୌମ୍ୟଙ୍କ ସାଙ୍ଗ କହିଛନ୍ତି ଯେ ସୌମ୍ୟଙ୍କୁ ବାତ ମାରିବାରୁ ସୌମ୍ୟ ତାଙ୍କ ବେକକୁ ଧରିପକାଇଥିଲେ, ଯେଉଁଥି କାରଣରୁ ସେ ସନ୍ତୁଳନ ହରାଇ ଯୁବତୀଙ୍କ ସ୍କୁଟିକୁ ଧକ୍କା ଦେଇଥିଲେ । ତେବେ କିଏ ସତ କହୁଛି ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଥିବାବେଳେ ଘଟଣାର ତଦନ୍ତ କରୁଛି କ୍ରାଇମବ୍ରାଞ୍ଚ ।