Delivery Inside Toilet / iPhone କାରଖାନା ଟଏଲେଟରେ ଡେଲିଭରି; କୁଆଁ କୁଆଁ ରାବ ପୂର୍ବରୁ କାଟିଲା ବେକ, ଶିଶୁକୁ ମାରିଲା ଫ୍ଲସ୍

ଭାରତରେ ଆପଲର ଶୀର୍ଷ କାରଖାନା ମଧ୍ୟରୁ ଗୋଟିଏ ବେଙ୍ଗାଲୁରୁ ଫକ୍ସକନ କାରଖାନାରୁ ଏକ ଆଶ୍ଚର୍ଯ୍ୟଜନକ ଖବର ଆସିଛି । ଜଣେ ୧୯ ବର୍ଷୀୟା ଯୁବତୀ ଶୌଚାଳୟରେ ଏକ ଶିଶୁକୁ ଜନ୍ମ ଦେଇଥିଲେ । ଆଉ ଜନ୍ମ ହେବାର କିଛି ମିନିଟ୍ ମଧ୍ୟରେ ଶିଶୁଟିକୁ ହତ୍ୟା କରିଛନ୍ତି । ଏପରିକି ଶିଶୁଟିକୁ କାଟି ଶୌଚାଳୟରେ ଫ୍ଲସ୍ କରିବାକୁ ଚେଷ୍ଟା କରିଥିଲେ । ଅଭିଯୁକ୍ତ ଯୁବତୀ ଜଣକ ଫକ୍ସକନ କାରଖାନାର ଜଣେ କର୍ମଚାରୀ ଥିବା ଜଣାପଡ଼ିଛି ।

ଅଭିଯୁକ୍ତ ଯୁବତୀ ଜଣେ ଅବିବାହିତା ମା' ଥିଲେ ଏବଂ ଅପମାନର ଭୟରେ ଏହି ଭୟଙ୍କର ପଦକ୍ଷେପ ନେଇଛନ୍ତି । ପୋଲିସ ଯୁବତୀଙ୍କୁ ଗିରଫ କରିଛି । ପୋଲିସ ସୂତ୍ର ଅନୁସାରେ, କ୍ୟାମ୍ପସରେ ଏହା ଦ୍ୱିତୀୟ ଏପରି ଘଟଣା, ଯାହା ଅଧିକାରୀଙ୍କ ମଧ୍ୟରେ ଚିନ୍ତା ସୃଷ୍ଟି କରିଛି । ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି ଯେ ଶୌଚାଳୟ ପିଟ୍ ଭିତରେ ଭ୍ରୁଣ ମିଳିଥିଲା । ପରିସ୍ଥିତି ଦେଖିବା ପରେ ସ୍ଥାନୀୟ କର୍ମଚାରୀମାନେ କର୍ତ୍ତୃପକ୍ଷଙ୍କୁ ସତର୍କ କରାଇଥିଲେ ।

• କେହି ଜାଣି ନଥିଲେ ଯେ ସେ ଗର୍ଭବତୀ ଥିଲେ

ପୋଲିସ କହିଛି ଯେ ଯୁବତୀ ଜଣକ ଦେବନାହଲ୍ଲୀର ଏକ ଫକ୍ସକନ କାରଖାନାରେ କାମ କରନ୍ତି । ସେ ଅବିବାହିତ । ସେ ଗର୍ଭବତୀ ଥିଲେ କିନ୍ତୁ ତାଙ୍କ ଗର୍ଭଧାରଣକୁ ଗୁପ୍ତ ରଖିଥିଲେ । ଏଣୁ ସେ ଗର୍ଭବତୀ ଥିବା କେହି ଜାଣିପାରିନଥିଲେ । ଅବିବାହିତ ଥିବାରୁ ତାଙ୍କ ଗର୍ଭଧାରଣ ସମ୍ପର୍କରେ ମଧ୍ୟ କେହି ସନ୍ଦେହ କରିନଥିଲେ ।

• ନିଜେ କଲେ ନିଜର ଡେଲିଭରି

ବୁଧବାର ଦିନ ତାଙ୍କର ପେଟ ଯନ୍ତ୍ରଣା ହୋଇଥିଲା । ସେ ଶୌଚାଳୟ ଯାଇଥିଲେ । ସେଠାରେ ସେ ଶିଶୁକୁ ଜନ୍ମ ଦେଇଥିଲେ । କେହି ଜାଣିବାକୁ ନପାଇବା ପାଇଁ ପ୍ରସବ ପରେ ଶିଶୁଟି କାନ୍ଦିବା ପୂର୍ବରୁ ସେ ତାର ପାଟିକୁ ବନ୍ଦ କରି ଦେଇଥିଲେ । ଏହାପରେ ସେ ଶିଶୁଟିର ଗଳା କାଟି ଏକ ବ୍ୟାଗରେ ଶବ ରଖିଥିଲେ । କିନ୍ତୁ, ସେ ଅନୁଭବ କଲେ ଯେ ସେ ପିଲାଟିର ଶବକୁ ବ୍ୟାଗରେ ବୋହି ନେଇପାରିବେ ନାହିଁ, ତେଣୁ ସେ ଏହାକୁ ଶୌଚାଳୟରେ ଫ୍ଲସ୍ କରିବାକୁ ଚିନ୍ତା କଲେ । ସେ ଶିଶୁଟିର ଶରୀରକୁ କାଟି ଶୌଚାଳୟ ପିଟ୍‌ରେ ପକାଇଲେ । କିନ୍ତୁ ଶିଶୁଟିର ମୁଣ୍ଡ ସେଥିରେ ଫସିଗଲା । ଏହାପରେ ସେ ଭୟରେ ବାହାରକୁ ଆସି ସ୍ୱାଭାବିକ ଭାବରେ କାମ କରିବାକୁ ଲାଗିଲେ ।

• କେମିତି ଘଟଣା ଜଣାପଡ଼ିଲା ?

ଘଟଣାଟି ସେତେବେଳେ ଜଣାପଡ଼ିଲା ଯେତେବେଳେ ଅନ୍ୟ ଜଣେ କର୍ମଚାରୀ ଶୌଚାଳୟକୁ ଯାଇ ଶିଶୁଟିର ମୃତଦେହ ଦେଖିଥିଲେ ଏବଂ ତୁରନ୍ତ ପୋଲିସକୁ ସୂଚନା ଦେଇଥିଲେ । ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଘଟଣାସ୍ଥଳ ଯାଞ୍ଚ କଲା ଏବଂ ଶିଶୁଟିକୁ ଜନ୍ମ ପରେ ହତ୍ୟା କରାଯାଇଥିବା ନିଶ୍ଚିତ କଲା । ତଦନ୍ତ ସମୟରେ, ମହିଳା ଜଣକ ଉକ୍ତ ଫ୍ୟାକ୍ଟ୍ରିର ଜଣେ କର୍ମଚାରୀ ବୋଲି ଚିହ୍ନଟ ହୋଇଥିଲେ । ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି ଏବଂ ଏକ ମାମଲା ରୁଜୁ କରାଯାଇଛି ।

ପଢନ୍ତୁ ଏହି ଖବର: ବଳପୂର୍ବକ ପ୍ରସବ କରାଇଲେ, ଶିଶୁର ମୁଣ୍ଡ କଟି ମହିଳାଙ୍କ ପେଟ ଭିତରେ ବାକି ଅଧା ଅଂଶ ବାହାରେ

• ଗତ ବର୍ଷ ଘଟିଥିଲା ସମାନ ଘଟଣା

ଗତ ବର୍ଷ ୧୪ ମାର୍ଚ୍ଚରେ ମଧ୍ୟ ସମାନ ଘଟଣା ଘଟିଥିଲା । ସେହି ସମୟରେ, ଫକ୍ସକନ୍ କ୍ୟାମ୍ପସ୍ ବାହାରେ ଏକ ଛାତ୍ରାବାସ ନିକଟରେ ଅବସ୍ଥିତ ଏକ ସ୍ୱେରେଜ୍ ଟ୍ରିଟମେଣ୍ଟ ପ୍ଲାଣ୍ଟ (STP)ର ବାର ଚାମ୍ବରର ନିୟମିତ ସଫା କରିବା ସମୟରେ ରକ୍ଷଣାବେକ୍ଷଣ କର୍ମଚାରୀମାନେ ଏକ ଭ୍ରୁଣ (ଶିଶୁଟିର ଜନ୍ମ ହେବା ପୂର୍ବ ଅବସ୍ଥା) ଠାବ କରିଥିଲେ । ଭ୍ରୁଣକୁ ଏକ ପ୍ଲାଷ୍ଟିକ୍ ପାତ୍ରରେ ରଖାଯାଇଥିଲା । ଏହାପରେ ସେମାନେ ସ୍ଥାନୀୟ କର୍ତ୍ତୃପକ୍ଷଙ୍କୁ ତୁରନ୍ତ ସୂଚିତ କରିଥିଲେ ।