Bhoot Bangla Murder Mystery / `ଭୂତ ବଙ୍ଗଳା' ମର୍ଡର ମିଷ୍ଟ୍ରି: ଭୂତ ନୁହେଁ, ଶାଳକ ସାଜିଲା ଯମ...ଭିଣୋଇକୁ ହତ୍ୟା ପରେ ରଚିଥିଲା ମିଛ ନାଟକ

'ଭୂତ ବଙ୍ଗଳା' ମର୍ଡର ମିଷ୍ଟ୍ରି ଉପରୁ ହଟିଲା ପରଦା । ଅଭିଯୁକ୍ତ କେୟରଟେକର ଗିରଫ । ଚନ୍ଦକା ପାଇକରାପୁରରେ ଘଟିଥିଲା ଏ ହତ୍ୟାକାଣ୍ଡ । ଠେଙ୍ଗାରେ ପିଟି ହତ୍ୟା କରିଥିଲା ଅଭିଯୁକ୍ତ ଶାଳକ ଆଉ ହତ୍ୟା ପରେ ଦୁର୍ଘଟଣାର ରୂପ ଦେଇଥିଲା । ତେବେ ପ୍ରତ୍ୟକ୍ଷଦର୍ଶୀଙ୍କ ବୟାନ ଆଧାରରେ ଛାନଭିନ୍‌ ପରେ ଅଭିଯୁକ୍ତକୁ ଗିରଫ କରିଛି ପୋଲିସ ।

ରାଜଧାନୀ ଉପକଣ୍ଠ ଚନ୍ଦକା ଥାନା ଅଧୀନ ପାଇକରାପୁରରେ ରହିଛି ଏହି 'ଭୂତ ବଙ୍ଗଳା' । ଯେଉଁଠି ଗତ ୨ ତାରିଖରେ ଘଟିଥିଲା ରହସ୍ୟଜନକ ହତ୍ୟାକାଣ୍ଡ । ଆରମ୍ଭରୁ ସମସ୍ତେ ଭୂତ ଛାତରୁ ପେଲିଦେଇଥିବା ନେଇ ଚର୍ଚ୍ଚା ହେଉଥିବା ବେଳେ ପ୍ରକୃତ ସତ ଆଜି ପଦାକୁ ଆସିଛି । ଭୂତ ନୁହେଁ ଶାଳକର ଠେଙ୍ଗା ମାଡ଼ରେ ପ୍ରାଣ ହରାଇଛନ୍ତି ଭିଣୋଇ । ମୃତକ ମୋହନୀ ଦାସ ଅଭିଯୁକ୍ତ ବାପିର ସମ୍ପର୍କୀୟ ଭିଣୋଇ । ତେବେ ନିଜର ସମ୍ପର୍କୀୟଙ୍କୁ କାହିଁକି ଏପରି ନିର୍ଦ୍ଦୟ ଭାବେ ହତ୍ୟା କରିବାର ପ୍ରକୃତ କାରଣ କ'ଣ, ତାହା ବର୍ତ୍ତମାନ ପୋଲିସ ପାଇଁ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି ।

ଅଧିକ ପଢ଼ନ୍ତୁ: ଜେଲରେ ଖାଦ୍ୟ ଖାଉନି ଗ୍ୟାଙ୍ଗଷ୍ଟର ଅତିକ୍‌ର ପୁଅ; କାନ୍ଦି କାନ୍ଦି ଅବସ୍ଥା ଖରାପ

ଗତ ୨ ତାରିଖରେ ଗାଁ ମୁଣ୍ଡରେ ଥିବା ଏକ ପରିତ୍ୟକ୍ତ ଘରୁ ମୋହନୀ ଦାସଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଥିଲା । ଚିକିତ୍ସା ପାଇଁ କଟକ ବଡ଼ ମେଡିକାଲରେ ଭର୍ତ୍ତି କରାଯାଇଥିବା ବେଳେ ସେଠାରେ ତାଙ୍କର ମୃତ୍ୟୁ ହୋଇଥିଲା । ଘରର ଦେଖାଶୁଣା କରୁଥିବା ବାପି ଭୋଇ କହିଥିଲା ଯେ ମୋହନୀ ରାତିରେ ଛାତରୁ ପଡ଼ିଯାଇଛନ୍ତି । କିନ୍ତୁ ପ୍ରତ୍ୟକ୍ଷଦର୍ଶୀଙ୍କ ବୟାନ ପରେ ସମସ୍ତ ସତ୍ୟ ସାମ୍ନାକୁ ଆସିଥିଲା ।

'ଭୂତ ବଙ୍ଗଳା'ରୁ ହତ୍ୟାରେ ବ୍ୟବହୃତ ଠେଙ୍ଗା ଜବତ ହୋଇଛି । ତେବେ ଏହି ପରିତ୍ୟକ୍ତ ଘରର ପ୍ରକୃତ ମାଲିକ କିଏ, କେବେଠାରୁ ଏହା ପରିତ୍ୟକ୍ତ ଅବସ୍ଥାରେ ପଡ଼ିରହିଛି । ଜମି କିମ୍ବା ଘର ଅକ୍ତିଆର ପାଇଁ ଏଭଳି ଚକ୍ରାନ୍ତ ହୋଇଥିଲା କି ନାହିଁ, ସେ ଦିଗରେ ମଧ୍ୟ ପୋଲିସ ତଦନ୍ତ ଚଳାଇଛି ।