ଭୁବନେଶ୍ଵର: ଗର୍ଜିଲା ପୋଲିସ ବନ୍ଧୁକ । ଘାଇଲା ହେଲା ଡ୍ରଗ୍ସ ମାଫିଆ । ରାଜଧାନୀ ଭୁବନେଶ୍ଵରରେ ଏନ୍‌କାଉଣ୍ଟର କରିଛି କମିଶନରେଟ୍ ପୋଲିସର ସ୍ପେଶାଲ୍ କ୍ରାଇମ୍ ୟୁନିଟ୍ । ପୋଲିସ ଏନ୍‌କାଉଣ୍ଟରରେ କୁଖ୍ୟାତ ଡ୍ରଗ୍ସ ମାଫିଆ ପପୁନ ମାଝୀ ଆହତ ହୋଇଛି ।

ମିଳିଥିବା ସୂଚନା ଅନୁସାରେ, ଇନଫୋଭ୍ଯାଲି ଥାନା ଅନ୍ତର୍ଗତ ଅରିସଲ ନିକଟରେ ପପୁନ ବଡ଼ ଧରଣର ନିଶା ସାମଗ୍ରୀ ବିକ୍ରି ପାଇଁ ଯୋଜନା କରୁଥିଲା । ଏନେଇ ନେଇ ସ୍ପେଶାଲ କ୍ରାଇମ୍ ୟୁନିଟ୍‌ ବିଶ୍ୱସ୍ତ ସୂତ୍ରରୁ ଖବର ପାଇ ଉକ୍ତ ସ୍ଥାନରେ ଚଢ଼ାଉ କରିଥିଲା ।

ଏଥିସହ ପଢ଼ନ୍ତୁ: ବ୍ରହ୍ମପୁରରେ ପୁଣି ଦୁଇ ଅପରାଧୀଙ୍କୁ ପୋଲିସର ଏନକାଉଣ୍ଟର୍ 

ପୋଲିସକୁ ଦେଖି ଅଭିଯୁକ୍ତ ପପୁନ ସେଠାରୁ ବାଇକ୍‌ରେ ଖସିଯିବାକୁ ଉଦ୍ୟମ କରିଥିଲା । ପୋଲିସ ତାକୁ କାବୁ କରିବାକୁ ଚେଷ୍ଟା କରିବାରୁ ପପୁନ ନିଜ ପାଖରେ ରଖିଥିବା ବନ୍ଧୁକରୁ ପୋଲିସ ଉପରକୁ ଗୁଳି ଚଳାଇବା ଆରମ୍ଭ କରିଥିଲା ।

ଏହାର ଜବାବରେ ପୋଲିସ ନିଜର ଆତ୍ମରକ୍ଷା ପାଇଁ ପାଲଟା ଗୁଳି ଚାଳନା କରିଥିଲା । ପୋଲିସ ଗୁଳି ପପୁନର ଗୋଡ଼ରେ ବାଜିବାରୁ ସେ ସେଠାରେ ହିଁ ପଡ଼ି ଯାଇଥିଲା । ପପୁନକୁ ଆହତ ଅବସ୍ଥାରେ ମେଡିକାଲ୍‌ରେ ଭର୍ତ୍ତି କରାଯାଇଛି ।

ଗଞ୍ଜାମ ଜିଲ୍ଲା ଜଗନ୍ନାଥ ପ୍ରସାଦ ଅଞ୍ଚଳରେ ପପୁନ ମାଝୀର ଘର । ସେ ଜଣେ ହାର୍ଡକୋର ନିଶା ବେପାରୀ ହୋଇଥିବା ବେଳେ ତାର ବାମ ଗୋଡ଼ରେ ଗୁଳି ବାଜିଥିବା ଜଣାପଡ଼ିଛି ।

ସେପଟେ ବ୍ରହ୍ମପୁରରେ ପୋଲିସର ଏନକାଉଣ୍ଟର ଜାରି ରହିଛି । ସୋମବାର-ମଙ୍ଗଳବାର ରାତିରେ ବ୍ରହ୍ମପୁରରେ ଦୁଇ ଅପରାଧୀଙ୍କୁ ଏନକାଉଣ୍ଟର କରିଛି ପୋଲିସ । ହିଞ୍ଜିଳିକାଟୁ ଓ ସିକିରି ଗ୍ରାମ ଦୁଇ ଜଣ ଅପରାଧୀଙ୍କୁ ଏନକାଉଣ୍ଟର କରାଯାଇଛି ।

ବହୁ ଚର୍ଚ୍ଚିତ ଗୋପାଳପୁର ପ୍ଲଟ ବ୍ୟବସାୟୀ ସୁଧିର ପାତ୍ର ହତ୍ୟା ଘଟଣାରେ ଫେରାର ଥିବା ଦୁଇ ଅଭିଯୁକ୍ତଙ୍କୁ ଏନକାଉଣ୍ଟର କରିଛି ପୋଲିସ । ବ୍ରହ୍ମପୁର ଉପକଣ୍ଠ ଆଙ୍କୁଶପୁରରେ ଉଭୟ ଅଭିଯୁକ୍ତ ପୋଲିସକୁ ଆକ୍ରମଣ କରି ଫେରାର ହେବା ପାଇଁ ଉଦ୍ୟମ କରିଥିଲେ ।

ଏଥିସହ ପଢ଼ନ୍ତୁ: ପୋଲିସକୁ ଆଉ ଭୟ ନାହିଁ କି ? ରାଜଧାନୀରେ କାହିଁକି ବଢ଼ୁଛି ଅପରାଧ ? 

ପୋଲିସ ଉପରେ ଆକ୍ରମଣ କରିବାରୁ ଆଙ୍କୁଶପୁରରେ ରଞ୍ଜନ ଓ ସରୋଜକୁ ପୋଲିସ କରିଛି ଏନକାଉଣ୍ଟର । ରଞ୍ଜନଙ୍କ ଡାହାଣ ଗୋଡ଼ରେ ଗୋଟିଏ ଗୁଳି ଓ ସରୋଜର ବାମ ଗୋଡ଼ରେ ଗୋଟିଏ ଗୁଳି ବାଜିଛି । ଆହତ ଅବସ୍ଥାରେ ଉଭୟଙ୍କୁ ଏମକେସିଜି ମେଡିକାଲରେ ଭର୍ତ୍ତି କରିଛି ପୋଲିସ ।

ଏହା ପୂର୍ବରୁ ରବିବାର ଦିନ ମଧ୍ୟ ବ୍ରହ୍ମପୁରରେ ଏକ ଏନକାଉଣ୍ଟର୍ ହୋଇଥିଲା । ଜଗା ସାହୁ ଓରଫ ଜଗନ୍ନାଥକୁ ଏନକାଉଣ୍ଟର କରିଥିଲା ପୋଲିସ। ଜଗା ବାଉରୀ ସୁକୁଣ୍ଡାରେ ଥିବା ସୂଚନା ପାଇ ପୋଲିସ ଚଢ଼ାଉ କରିବା ବେଳେ ଜଗା ପୁଲିସ ଉପରକୁ ବୋମା ଫିଙ୍ଗି ଖସିଯିବାକୁ ଉଦ୍ୟମ କରିଥିଲା । ପୁଲିସର ପାଲଟା ଗୁଳି ଚାଳନାରେ ଜଗା ଆହତ ହୋଇଥିଲା ।