Jatia Gang / ରାଜଧାନୀରେ ମାତିଛନ୍ତି ଲୁଟେରା; ସ୍ପିଡ଼ ବାଇକରେ ଆସି ଝାମ୍ପି ନେଲେ

ଭୁବନେଶ୍ଵର: ରାଜଧାନୀ ଭୁବନେଶ୍ୱରରେ ଏବେ ମାତିଛନ୍ତି ସ୍ପିଡ୍ ବାଇକ୍ ଲୁଟେରା । ଆଖି ପିଛୁଳାକେ ମହିଳାମାନଙ୍କଠାରୁ ମୋବାଇଲ ଓ ସୁନା ଗହଣା ଝାମ୍ପି ନେଇ ଚମ୍ପଟ ମାରୁଛନ୍ତି । ତେବେ ରାଜଧାନୀରେ ସକ୍ରିୟ ଥିବା ଏଭଳି ଏକ କୁଖ୍ୟାତ 'ଜଟିଆ ଗ୍ୟାଙ୍ଗ'କୁ କବ୍‌ଜା କରିଛି କମିସନରେଟ ପୋଲିସ । ଏହି ଗ୍ୟାଙ୍ଗର ସଦସ୍ୟମାନେ ମାରଣାସ୍ତ୍ର ଦେଖାଇ ଲୁଟପାଟ କରୁଥିଲେ ଏବଂ ବିଶେଷ କରି ଏକାକୀ ଯାଉଥିବା ମହିଳାମାନଙ୍କୁ ଟାର୍ଗେଟ୍ କରୁଥିଲେ ।

• ଜଟିଆ ଗ୍ୟାଙ୍ଗର କାରନାମା

ଲୁଟ୍ କରିବା ପରେ ଏହି ମୋବାଇଲଗୁଡ଼ିକୁ ବାପୁଜୀନଗରର ଏକ ମୋବାଇଲ ଦୋକାନରେ ବିକ୍ରି କରି ଦିଆଯାଉଥିଲା । ସେଠାରେ ଦୋକାନୀ ଜଣକ ମୋବାଇଲର ବିଭିନ୍ନ ପାର୍ଟ୍ସକୁ ଅଲଗା କରି ଗ୍ରାହକଙ୍କୁ ବିକ୍ରି କରୁଥିଲା । ଖାରବେଳ ନଗର ଥାନାରେ ଏକାଧିକ ଅଭିଯୋଗ ପରେ ପୋଲିସ ତଦନ୍ତ କରି ୨ ଜଣ ଲୁଟେରା ଏବଂ ଜଣେ ମୋବାଇଲ ଦୋକାନୀ ସମେତ ୩ ଜଣଙ୍କୁ ଗିରଫ କରିଛି । ସେମାନଙ୍କ ନିକଟରୁ ୬ଟି ମୋବାଇଲ, କଟୁରି ଏବଂ ସ୍ପିଡ୍ ବାଇକ୍ ଜବତ ହୋଇଛି । ଜଟିଆ ଗ୍ୟାଙ୍ଗର ଅନ୍ୟ ଫେରାର ସଦସ୍ୟମାନଙ୍କୁ ଧରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି ।

• ଟାର୍ଗେଟରେ ଥିଲେ ଏକାକୀ ଯାଉଥିବା ମହିଳା

ଲୁଟେରାଙ୍କ ଆତଙ୍କ ଏତିକିରେ ଥମିନାହିଁ । ୟୁନିଟ-୩ ଅଞ୍ଚଳରେ ଥିବା 'ଆମ ବସ ଷ୍ଟପ'ରୁ ଜଣେ ଯୁବତୀଙ୍କ ଠାରୁ ମୋବାଇଲ ଛଡ଼ାଇ ନେବା ଅଭିଯୋଗରେ ଆଉ ଜଣେ ଲୁଟେରାକୁ ଗିରଫ କରିଛି ପୋଲିସ ଏବଂ ତା’ ନିକଟରୁ ମୋବାଇଲ ମଧ୍ୟ ଜବତ ହୋଇଛି । ସେହିଭଳି ଗତକାଲି ପଳାଶୁଣୀ ଛକ ନିକଟରେ ଏକ ବଡ଼ ଧରଣର ଛିନତାଇ ଦେଖିବାକୁ ମିଳିଛି । ଜଣେ ଯୁବତୀ ଉବର୍ ବାଇକ୍‌ରେ ଘରକୁ ଫେରୁଥିବା ବେଳେ ଏକ ସ୍ପୋର୍ଟସ ବାଇକ୍‌ରେ ଦୁଇ ଜଣ ଲୁଟେରା ଆସି ହଠାତ୍ ତାଙ୍କ ଭ୍ୟାନିଟି ବ୍ୟାଗ୍ ଝାମ୍ପି ନେଇ ଫେରାର ହୋଇଯାଇଛନ୍ତି ।

ପଢନ୍ତୁ ଏହି ଖବର: ମଟନ୍ ଖୁଆଇବେ କହି ଦେଇଦେଲେ ଚିକେନ୍; ବୁଲିଲା ଲାଠି, ବର କନ୍ୟା...

ତେବେ ଜନଗହଳିପୂର୍ଣ୍ଣ ରାସ୍ତାରେ ସର୍ବସମ୍ମୁଖରେ ଏହି ଲୁଟ୍ ହୋଇଛି । ଲୁଟ୍‌ର ଶିକାର ହେବା ପରେ ଭୟରେ କାନ୍ଦି କାନ୍ଦି ଯୁବତୀ ଜଣକ ଉବର୍ ଡ୍ରାଇଭରଙ୍କ ସହ ମଞ୍ଚେଶ୍ୱର ଥାନାରେ ଅଭିଯୋଗ କରିଛନ୍ତି । ଅଭିଯୋଗ ପରେ ପୋଲିସ ସିସିଟିଭି ଫୁଟେଜ୍ ଯାଞ୍ଚ କରିବା ସହ ତନାଘନା ତଦନ୍ତ ଆରମ୍ଭ କରିଛି । ରାଜଧାନୀରେ ଲୁଟପାଟ ବଢ଼ୁଥୁବାରୁ ଟେନ୍ସନରେ କମିସନରେଟ ପୋଲିସ | ରାଜଧାନୀରେ କଡା ପାଟ୍ରୋଲିଂ ସହ ଚେକିଂ ବ୍ଲକିଂ ଜୋରଦାର କରିବାରୁ ଦାବି ଜୋର ଧରିଛି ।