ରାଜଧାନୀ ଭୁବନେଶ୍ୱରରେ ଏବେ ବଢ଼ିବାରେ ଲାଗିଛି ରୋଡ୍ ରୋମିଓଙ୍କ ଉତ୍ପାତ । ରାଜଧାନୀର ରାଜରାସ୍ତାରେ ମୁଖା ପିନ୍ଧି ବୁଲୁଛନ୍ତି କିଛି ଅସଭ୍ୟ ଯୁବକ । ଏକୁଟିଆ ଝିଅଙ୍କୁ ଦେଖିଲେ କରୁଛନ୍ତି ଅତି ଅଭଦ୍ର ଓ ଦୁର୍ବ୍ୟବହାର । ମର୍ଣ୍ଣିଂ ୱାର୍କ୍ କରୁଥିବା ଝିଅ ହେଉ କି ଏକୁଟିଆ ରାସ୍ତାରେ ଯାଉଥିବା ଯୁବତୀ କିମ୍ବା ନାବାଳିକା କାହାକୁ ବି ଛାଡୁ ନାହାନ୍ତି ଏହି ମଦନ ମାର୍କା ଯୁବକ । ମାସ୍କ ପିନ୍ଧି, ବିନା ନମ୍ବର ପ୍ଲେଟ୍ ଗାଡିରେ ଆସି ଏଭଳି ଅଭଦ୍ରାମି କରୁଥିବା ଘଟଣା ଏବେ ଗୋଟେ ପରେ ଗୋଟେ ସାମ୍ନାକୁ ଆସୁଛି । ଗତକାଲି ଜଣେ ଯୁବତୀ ଏନେଇ ମୁହଁ ଖୋଲିଥିବା ବେଳେ, ଆଜି ପୁଣି ଜଣେ ପୀଡ଼ିତା ଯୁବତୀ ସାମ୍ନାକୁ ଆସିଛନ୍ତି ।

ରାଜଧାନୀରେ ସୁରକ୍ଷିତ ନୁହନ୍ତି କି ଝିଅ ? ଏଭଳି ପ୍ରଶ୍ନ ଏଥିପାଇଁ ଉଠୁଛି କାରଣ ପୁଣି ଜଣେ ଯୁବତୀ ରୋଡ୍ ରୋମିଓଙ୍କ ଶିକାର ହୋଇଛନ୍ତି । ବଡ଼ି ଭୋରୁ ସିଆରପି ଛକ ନିକଟ ଗଳିରେ ଘଟିଛି ଏହି ଲଜ୍ଜାଜନକ ଘଟଣା । ଗତ ଜୁନ୍ ୨୯ ସକାଳ ପ୍ରାୟ ୫ଟା ୩୦ ମିନିଟ୍‌ରେ ଯୁବତୀ ଜଣକ ବସ୍ ଯୋଗେ ଭୁବନେଶ୍ୱର ଆସି ସିଆରପି ଛକରେ ଓହ୍ଲାଇଥିଲେ । ସେହି ସମୟରେ ରାସ୍ତା କଡ଼ରେ ଏକ ଦାମୀ ବାଇକ୍‌ରେ ଜଣେ ଯୁବକ ବସିଥିଲେ । ଯୁବତୀଙ୍କୁ ଏକୁଟିଆ ଦେଖି ପାଖକୁ ଡାକିଥିଲା ଏବଂ ପରେ ଅଶ୍ଳୀଳ ବ୍ୟବହାର ଦେଖାଇବା ସହ ଖରାପ ଇଙ୍ଗିତ କରିଥିଲା । ଏହି ଘଟଣା ପରେ ସେ ମାନସିକ ସ୍ତରରେ ସମ୍ପୂର୍ଣ୍ଣ ଭାଙ୍ଗି ପଡ଼ିଥିବା ବେଳେ ଏବେ ସେ ଓ ତାଙ୍କ ସମ୍ପର୍କୀୟ କ୍ୟାମେରା ସାମ୍ନାରେ ମୁହଁ ଖୋଲିଛନ୍ତି ।

ଅଧିକ ପଢ଼ନ୍ତୁ: ଭୁବନେଶ୍ୱରରେ ବଢୁଛି 'ଭାଇଗିରି', ଦେଢ଼ ମାସରେ ହେଲାଣି ୨୫ରୁ ଅଧିକ ରକ୍ତାକ୍ତ ସଂଘର୍ଷ

କେବଳ ଏହି ଗୋଟିଏ ଘଟଣା ନୁହେଁ, ଗୋଟେ ପରେ ଗୋଟେ ଏଭଳି ଅନେକ ମାମଲା ଏବେ ସାମ୍ନାକୁ ଆସୁଛି । ନୟାପଲ୍ଲୀ ଏବଂ ସହିଦନଗର ଭଳି ପ୍ରମୁଖ ଥାନାରେ ଅଭିଯୋଗ ହେବା ପରେ ବି ପୋଲିସ ହାତ ଏବେ ବି ଖାଲି । ସିସିଟିଭି ଫୁଟେଜ୍‌ରୁ କେବଳ ଯୁବକର ଚେହେରା ଚିହ୍ନଟ ହୋଇପାରୁଛି, ହେଲେ ତାକୁ ଟ୍ରେସ୍ କରିବାରେ ପୋଲିସ ବିଫଳ ହେଉଛି । ଆଇନଜୀବୀଙ୍କ କହିବା ଅନୁସାରେ, ନୂତନ ଆଇନରେ ମହିଳାଙ୍କ ପ୍ରତି ହେଉଥିବା ଏଭଳି ଅପରାଧ ପାଇଁ କଡ଼ା ଦଣ୍ଡର ବିଧାନ ରହିଛି । BNS ବା ଭାରତୀୟ ନ୍ୟାୟ ସଂହିତାର ଧାରା ୭୪ ଅନୁସାରେ ଏହା ସମ୍ପୂର୍ଣ୍ଣ ଭାବେ ଏକ ଜାମିନ ବିହୀନ ଅପରାଧ, ଯେଉଁଥିରେ ଅଭିଯୁକ୍ତକୁ ୧ ବର୍ଷରୁ ୫ ବର୍ଷ ପର୍ଯ୍ୟନ୍ତ ଜେଲ ଦଣ୍ଡାଦେଶ ହୋଇପାରେ ।

ପ୍ରଶ୍ନ ଉଠୁଛି କମିଶନରେଟ୍ ପୋଲିସର 'ସେଫ୍ ସିଟି' ଦାବି ଭିତରେ ଏହି ରୋଡ୍ ରୋମିଓମାନେ କେବେ ସାବାଡ୍ ହେବେ ? କେବେ ମିଳିବ ରାଜଧାନୀର ଝିଅମାନଙ୍କୁ ସୁରକ୍ଷା, ତା' ଉପରେ ରହିଛି ସମସ୍ତଙ୍କ ନଜର ?