ଭୁବନେଶ୍ଵର: ଅସୁରକ୍ଷିତ ରାଜଧାନୀ । ପୁଣି ଆସିଲା ଆଉ ଏକ ଅପହରଣ ଅଭିଯୋଗ । ଚଳନ୍ତା ଅଟୋରେ ଯୁବତୀଙ୍କୁ ବେହୋସ୍ କରିବାକୁ ଉଦ୍ୟମ ହୋଇଛି । ଆଉ ନିଜକୁ ବଞ୍ଚାଇବାକୁ ଯାଇ ଚଳନ୍ତା ଅଟୋରୁ ଡେଇଁ ପଡ଼ି ଗୁରୁତର ଆହାତ ହୋଇଛନ୍ତି ଯୁବତୀ ଜଣଙ୍କ ।

ଏ ଘଟଣା ରାଜଧାନୀ ଭୁବନେଶ୍ଵରରେ ଚାଞ୍ଚଲ୍ୟ ଖେଳାଇ ଦେଇଛି । ଜୟଦେବ ବିହାର ଅଞ୍ଚଳରେ ଏ ଘଟଣା ଘଟିଛି । ଗୁରୁତର ଯୁବତୀଙ୍କୁ ଚିକିତ୍ସା ଲାଗି ମେଡିକାଲ୍‌ରେ ଭର୍ତ୍ତି କରାଯାଇଛି । ଏନେଇ ନୟାପଲ୍ଲୀ ଥାନା ପୋଲିସରେ ଏତଲା ଦେଇଛନ୍ତି ଯୁବତୀଙ୍କ ଭାଇ ।

ଏଥିସହ ପଢ଼ନ୍ତୁ: ଦେଢ଼ ମାସର ଲୁଚକାଳି ପରେ ଧରାପଡ଼ିଲା ନରହନ୍ତା ଡ୍ରାଇଭର୍, ରେସିଂ ବେଳେ ମାଆଝିଅଙ୍କୁ ଚଢ଼ାଇ ଦେଇଥିଲା ଗାଡ଼ି

ଯୁବତୀଙ୍କ ଭାଇଙ୍କ ଅନୁସାରେ, "ନୟାପଲ୍ଲୀ ଥାନା ଅଞ୍ଚଳରେ ଯୁବତୀ ଜଣଙ୍କ ରୁହନ୍ତି । ସେ ଘରକୁ ଆସିବା ଲାଗି ଆଚାର୍ଯ୍ୟ ବିହାରରେ ଏକ ଲାଇନ୍ ଅଟୋରେ ଚଢ଼ିଥିଲେ । ଆଉ ଅଟୋରେ ପୂର୍ବରୁ ବସିଥିବା ଜଣେ ମହିଳା ହଠାତ୍ ଯୁବତୀଙ୍କ ଟଣା ଓଟରା କରିଥିଲେ । ମୋବାଇଲ୍ ଛଡ଼ାଇ ନେବା ସହ ମୁହଁରେ କପଡ଼ା ଗୁଡ଼ାଇ ବେହୋସ୍ କରିବାକୁ ଉଦ୍ୟମ କରିଥିଲେ ।"

କୌଣସି ଉପାୟ ନ ପାଇ ଯୁବତୀ ଜଣଙ୍କ ଚଳନ୍ତା ଅଟୋରୁ ଡେଇଁ ପଡ଼ିଥିଲେ । ଯୁବତୀଙ୍କ ମୁଣ୍ଡ ସହ ହାତ ଓ ଗୋଡ଼ରେ ଆଘାତ ଲାଗିଛି । ଏବେ ମେଡିକାଲ୍‌ରେ ଯୁବତୀ ଚିକିତ୍ସିତ ହେଉଥିବା ବେଳେ ଛାନଭିନ୍ ଆରମ୍ଭ କରିଛି ନୟାପଲ୍ଲୀ ଥାନା ପୋଲିସ । ତେବେ, ଚଳନ୍ତା ଅଟୋରେ ଯୁବତୀଙ୍କ ସହ ଏଭଳି ବ୍ୟବହାର ଅପହରଣ ଆଡ଼କୁ ଇଙ୍ଗିତ କରୁଥିବା ବେଳେ ପ୍ରକୃତ ତଥ୍ୟ ସ୍ପଷ୍ଟ ହୋଇ ନାହିଁ ।

ଏଥିସହ ପଢ଼ନ୍ତୁ: ଭୋଜି ଅଛି କହି ଘରୁ ଗଲେ ରୋଷେୟା, ଦୁଇ ଦିନ ହେଲା ମିଳୁନି ପତ୍ତା

ତେବେ ରାଜଧାନୀରେ ଅପହରଣ ନେଇ ଏହା ଗୋଟିଏ ଅଭିଯୋଗ ନୁହେଁ । ପ୍ରଥମେ କ୍ୟାବ୍ ଡ୍ରାଇଭର ପରେ ରୋଷେୟା, ଆଉ ଏବେ ଅଟୋରେ ଯୁବତୀଙ୍କୁ ଅପହରଣ ଉଦ୍ୟମ । ମାତ୍ର ୧୦ ଦିନ ଭିତରେ ଭୁବନେଶ୍ଵରରେ ୨ ଜଣଙ୍କୁ ଅପହରଣ କରାଯାଇଥିବା ବେଳେ ଏବେ ପୁଣି ନୂଆ ମାମଲା ଆସିଛି । ପୂର୍ବରୁ ଅପହୃତ କ୍ୟାବ୍ ଡ୍ରାଇଭରଙ୍କୁ ଅପହରଣକାରୀ ଯାଜପୁର ନେଇ ଯାଇଥିବା ବେଳେ ସେ ଆତ୍ମହତ୍ୟା କରିବାରୁ ତାଙ୍କ ମୃତଦେହ ଆଣି ଚନ୍ଦକା ଜଙ୍ଗଲରେ ଫିଙ୍ଗି ଦେଇଥିଲେ ।

କ୍ୟାବ୍ ଡ୍ରାଇଭରଙ୍କ ପରେ ଜଣେ ରୋଷେୟାଙ୍କୁ ଅପହରଣ କରାଯାଇଥିବା ଅଭିଯୋଗ ହୋଇଛି । ଏନେଇ ଖଣ୍ଡଗିରି ଥାନା ପୋଲିସରେ ଏତଲା ଦେଇଛନ୍ତି ନିଖୋଜ ରୋଷେୟାଙ୍କ ପତ୍ନୀ । ୨୮ ତାରିଖ ସୁଦ୍ଧା ୨୦ ଲକ୍ଷ ଟଙ୍କା ନ ଦେଲେ ମାରିଦେବାକୁ ଧମକ ଦିଆ ଯାଇଛି ।

Argus News | argus news | Odisha Latest News, Breaking News, Trending News, Live TV