ଭୁବନେଶ୍ଵର: ରାଜଧାନୀ ପିଛା ଛାଡ଼ୁନି ଅପହରଣ । ପ୍ରଥମେ କ୍ୟାବ୍ ଡ୍ରାଇଭର ଆଉ ଏବେ ରୋଷେୟା । ମାତ୍ର ୧୦ ଦିନ ଭିତରେ ଭୁବନେଶ୍ଵରରେ ୨ ଜଣଙ୍କୁ ଅପହରଣ କରାଯାଇଛି । ପୂର୍ବରୁ ଅପହୃତ କ୍ୟାବ୍ ଡ୍ରାଇଭରଙ୍କୁ ଅପହରଣକାରୀ ଯାଜପୁର ନେଇ ଯାଇଥିବା ବେଳେ ସେ ଆତ୍ମହତ୍ୟା କରିବାରୁ ତାଙ୍କ ମୃତଦେହ ଆଣି ଚନ୍ଦକା ଜଙ୍ଗଲରେ ଫିଙ୍ଗି ଦେଇଥିଲେ ।

ଆଉ ଏବେ ଆସିଛି ନୂଆ ଅପହରଣ ଅଭିଯୋଗ । ରୋଷେୟା ଭାବେ କାମ କରୁଥିବା ଜଣେ ଯୁବକଙ୍କୁ ଅପହରଣ କରାଯାଇଥିବା ନେଇ ଅଭିଯୋଗ କରିଛନ୍ତି ପରିବାର ଲୋକେ । ଏନେଇ ଖଣ୍ଡଗିରି ଥାନା ପୋଲିସରେ ଏତଲା ହୋଇଛି ।

ଏଥିସହ ପଢ଼ନ୍ତୁ: କ୍ୟାବ୍ ଡ୍ରାଇଭରଙ୍କ ମୃତ୍ୟୁ ଉପରୁ ହଟିଲା ପରଦା; ଅପହରଣକାରୀଙ୍କ କବ୍‌ଜାରେ ଜୀବନ ହାରିଥିଲେ ବିଦ୍ୟାଧର

ଖଣ୍ଡଗିରି ଥାନାରେ ହୋଇଥିବା ଅଭିଯୋଗ ଅନୁସାରେ, "ଗଞ୍ଜାମ ଜିଲ୍ଲାର ହରିଶ୍ଚନ୍ଦ୍ର ସାହୁଙ୍କୁ ଅପହରଣ କରାଯାଇଛି । ହରିଶ୍ଚନ୍ଦ୍ରଙ୍କୁ ଅପହରଣ ପରେ ଅପହରଣକାରୀ ୨୦ ଲକ୍ଷ ଟଙ୍କା ମାଗୁଛନ୍ତି । ୨୮ ତାରିଖ ସୁଦ୍ଧା ୨୦ ଲକ୍ଷ ଟଙ୍କା ନ ଦେଲେ ଜୀବନରୁ ମାରିଦେବାକୁ ଧମକ ଦିଆଯାଇଛି ।"

ସୂଚନା ଅନୁସାରେ, ଗଞ୍ଜାମର ହରିଶ୍ଚନ୍ଦ୍ର ସାହୁ ୨୨ ତାରିଖ ରାତି ପ୍ରାୟ ସାଢ଼େ ୮ଟା ବେଳେ ଘରୁ ବାହାରିଥିଲେ । ସ୍ତ୍ରୀଙ୍କୁ କହିକି ଯାଇଥିଲେ, ଭୋଜି ଅଛି... କାମ ସାରି ସକାଳେ ଫେରିବି । ହେଲେ ଘରକୁ ସକାଳେ ଫେରି ନଥିଲେ ହରିଶ୍ଚନ୍ଦ୍ର । ଯାହାକୁ ନେଇ ସ୍ତ୍ରୀଙ୍କ ସନ୍ଦେହ ହୋଇଥିଲା ।

ଏଥିସହ ପଢ଼ନ୍ତୁ: "Emotion" ଉପରେ ଭାରି ପଡ଼ିଲା "Emoji", ଜେଜେଙ୍କ ଫଟୋ ପୋଷ୍ଟ ନେଇଗଲା ନାତି ଜୀବନ

୨୩ ତାରିଖ ସକାଳେ ସ୍ତ୍ରୀ, ହରିଶ୍ଚନ୍ଦ୍ରଙ୍କ ମୋବାଇଲ୍‌କୁ ଫୋନ୍ କରିଥିବା ବେଳେ ତାହା ବନ୍ଦ ଥିଲା । ଅଫିସ୍ ନମ୍ବର ବି ସ୍ଵିଚ୍ ଅଫ୍ ରହିଥିଲା । ଆଉ ଅଫିସ୍‌କୁ ଫୋନ୍ କରି ପଚାରିବାରୁ ହରିଶ୍ଚନ୍ଦ୍ର ସେଠାରେ ନଥିବା ଜାଣିବାକୁ ପାଇଥିଲେ । ରାତିରୁ ଯାଇ ତା'ପରଦିନ ସନ୍ଧ୍ଯା ପର୍ଯ୍ୟନ୍ତ ସ୍ଵାମୀ ନ ଫେରିବାରୁ ସ୍ତ୍ରୀ ଚିନ୍ତିତ ହୋଇ ପଡ଼ିଥିଲେ ।

ଆଉ ଠିକ୍ ୨୩ ତାରିଖ ସନ୍ଧ୍ୟା ୫ଟା ୩୧ରେ ସ୍ଵାମୀ ହରିଶ୍ଚନ୍ଦ୍ରଙ୍କ ମୋବାଇଲ୍‌ରୁ ସ୍ତ୍ରୀଙ୍କ ହ୍ଵାଟ୍ସଆପ୍‌କୁ ଆସିଥିଲା ଏକ ମେସେଜ୍ । ହ୍ଵାଟ୍ସଆପ୍‌ରେ ଆସିଥିବା ମେସେଜ୍‌ରେ ଲେଖା ଅଛି "୨୮ ତାରିଖ... ୨୦ ଲକ୍ଷ ନ ଦେଲେ ମାରି ଦେବି ।" ଆଉ ଏହି ହ୍ଵାଟ୍ସଆପ୍ ମେସେଜକୁ ନେଇ ହରିଶ୍ଚନ୍ଦ୍ରଙ୍କୁ ଅପହରଣ କରାଯାଇଥିବା ସ୍ତ୍ରୀ ଖଣ୍ଡଗିରି ଥାନାରେ ଅଭିଯୋଗ କରିଛନ୍ତି । ଏନେଇ ଖଣ୍ଡଗିରି ଥାନା ପୋଲିସର ପ୍ରତିକ୍ରିୟା ମିଳିପାରି ନାହିଁ ।

ଏଥିସହ ପଢ଼ନ୍ତୁ: ଦେଢ଼ ମାସର ଲୁଚକାଳି ପରେ ଧରାପଡ଼ିଲା ନରହନ୍ତା ଡ୍ରାଇଭର୍, ରେସିଂ ବେଳେ ମାଆଝିଅଙ୍କୁ ଚଢ଼ାଇ ଦେଇଥିଲା ଗାଡ଼ି

ତେବେ ହରିଶ୍ଚନ୍ଦ୍ରଙ୍କୁ ପ୍ରକୃତରେ ଅପହରଣ କରାଯାଇଛି କି ? ଯଦି ହଁ, କିଏ ଓ କାହିଁକି ରୋଷେୟା ହରିଶ୍ଚନ୍ଦ୍ରଙ୍କୁ କଲା ଅପହରଣ ? ଖୋଦ୍ ହରିଶ୍ଚନ୍ଦ୍ରଙ୍କ ମୋବାଇଲ୍‌ରୁ ହ୍ଵାଟ୍ସଆପ୍ ମେସେଜ୍ କରି ଟଙ୍କା ମାଗିବା ସନ୍ଦେହକୁ ବଢ଼ାଇ ଦେଇଛି । ସତରେ ହରିଶ୍ଚନ୍ଦ୍ରଙ୍କୁ ଅପହରଣ କରାଯାଇଛି ନା ଅନ୍ୟ କୌଣସି କାରଣରୁ ହରିଶ୍ଚନ୍ଦ୍ର ନିଜେ ଏଭଳି ନାଟକ କରୁଛନ୍ତି । ତାହା ପୋଲିସର ତଦନ୍ତ ପରେ ହିଁ ସ୍ପଷ୍ଟ ହୋଇ ପାରିବ ।

Argus News | argus news | Odisha Latest News, Breaking News, Trending News, Live TV