ବିହାରୀ ବନ୍ଧୁକ ମାୟାରେ ଅପରାଧୀ । ରାଜଧାନୀରେ ଆକ୍ଟିଭ ବନ୍ଧୁକ ମାଫିଆ । କଥା କଥା କେ ଭୁବନେଶ୍ବରରେ ଫୁଟୁଛି ଗୁଳି । ବର୍ଷକ ମଧ୍ୟରେ ୬୦ରୁ ଅଧିକ ବନ୍ଧୁକ ଧରିଲାଣି ପୋଲିସ । କମିଶନରେଟ ପୋଲିସର ପଞ୍ଝାରେ ବନ୍ଧୁକ ମାଫିଆ ଗ୍ୟାଙ୍ଗ୍ । ବର୍ଷକ ମଧ୍ୟରେ ରାଜ୍ୟ ବାହାର ଏବଂ ଭିତରର ୫୦ ଜଣ ବନ୍ଧୁକ ମାଫିଆଙ୍କୁ ଗିରଫ କରି ଜେଲ ହାଜତକୁ ପଠାଇଛି ପୋଲିସ । ସେଥିରେ ଅଛନ୍ତି ଜମି ମାଫିଆ, ଗୋ ମାଫିଆ, ନିଶା ବେପାରୀ ଏବଂ ଖଣି ମାଫିଆ । ନିଜର ଦବଦବା ଏବଂ ଭାଇଗିରି ପାଇଁ ଅଣ୍ଟାରେ ବନ୍ଧୁକ ଖୋସି ବୁଲୁଥିଲେ ।

୧୭ ସେପ୍ଟେମ୍ବରରେ ଭୁବନେଶ୍ୱରରେ କମିଶନରେଟ ପୋଲିସର ସ୍ପେଶାଲ କ୍ରାଇମ ୟୁନିଟ କବ୍‌ଜାରେ ପଡ଼ିଥିଲେ ଏକ ବଡ଼ଧରଣର ବନ୍ଧୁକ ମାଫିଆ ଗ୍ୟାଙ୍ଗ୍ । ଦୀର୍ଘ ୧୭ ବର୍ଷ ଧରି ଏହି ତିନି ଜଣିଆ ଗ୍ୟାଙ୍ଗ କରୁଥିଲେ ବନ୍ଧୁକ ବେପାର । ଭୁବନେଶ୍ୱର, ଖୋର୍ଦ୍ଧା, ପୁରୀ, ଜଗତସିଂହପୁର, କେନ୍ଦ୍ରାପଡ଼ା ଆଦି ଜିଲ୍ଲାକୁ କରୁଥିଲେ ବନ୍ଧୁକ ଚୋରା ଚାଲାଣ । ସେମାନଙ୍କ ପାଖରୁ ୮ଟି ବିହାରୀ ବନ୍ଧୁକ, ୩୪ ରାଉଣ୍ଡ ଗୁଳି, ୧୦ଟି ମାଗାଜିନ୍ ଓ ୩ଟି କାର୍ ଜବତ କରାଯାଇଥିଲା । ସେହିଭଳି ସେପ୍ଟେମ୍ବର ୨୭ ତାରିଖରେ ଆଉ ଜଣେ ବନ୍ଧୁକ ବେପାରିକୁ ଗିରଫ କରିଥିଲା କମିସନରେଟ ପୋଲିସ । ତା ନିକଟରୁ ୧୦ଟି ବନ୍ଧୁକ ଏବଂ ୮ ରାଉଣ୍ଡ ଗୁଳି ଜବତ ହୋଇଥିଲା ।

ଅଧିକ ପଢ଼ନ୍ତୁ: କଳା ସ୍କର୍ପିଓରେ ଧଳା ଜହର ବେପାର, ମହିଳା ସାଜିଥିଲେ ମାଷ୍ଟରମାଇଣ୍ଡ

ଗିରଫ ଅଭିଯୁକ୍ତ ହେଲେ ଝାଡ଼ଖଣ୍ଡ ଲୋହାରଦାଗା ଅଞ୍ଚଳର ୫୦ ବର୍ଷୀୟ ମହେଶ କୁମାର ଶାହା ଓରଫ ଟିପୁ, ଖୋର୍ଦ୍ଧା ଜିଲ୍ଲା ଦେଉଳଟାଙ୍ଗୀର ୪୮ ବର୍ଷୀୟ ମହମ୍ମଦ ସଜାବତ୍ ଓ ଖୋର୍ଦ୍ଧା ଜଙ୍କିଆ ଗୟାବନ୍ଧର ୫୩ ବର୍ଷୀୟ ଫିରୋଜ୍ ଅଲ୍ଲୀ ଖାଁ । ନୟାପଲ୍ଲୀ ହାତୀଆସୁଣୀ ନିକଟରେ ୩ଟି କାରରେ ୩ ବନ୍ଧୁକ ବେପାରୀ ବନ୍ଧୁକ ଡିଲ୍‌ କରୁଥିବା ବେଳେ ଖବର ପାଇ ପୂର୍ବରୁ ଜଗି ବସିଥିବା ସ୍ପେଶାଲ କ୍ରାଇମ ୟୁନିଟ ମାଡି ବସିଥିଲା ।

ଜବତ ବନ୍ଧୁକ ବିହାର ମୁଁଗେରରୁ ମହେଶ କୁମାର ଶାହା ଓରଫ ଟିପୁ ୩୦ ରୁ ୩୫ ହଜାର ଟଙ୍କାରେ ଆଣୁଥିଲା । ମହମ୍ମଦ ସଜାବତ ଓ ଫିରୋଜ ଅଲ୍ଲୀ ଖାଁ ଟ୍ରେନ ଓ କାରରେ ବନ୍ଧୁକ ଆଣି ରାଜ୍ୟରେ ୮୦ରୁ ୮୫ ହଜାର ଟଙ୍କାରେ ବିକ୍ରି କରୁଥିଲେ । ପୋଲିସ ସୂଚନା ଅନୁସାରେ ଦୀର୍ଘ ୧୭ ବର୍ଷ ଧରି ଏ ଗ୍ୟାଙ୍ଗ ଚଳାଇ ଆସୁଥିଲେ ଚୋରା ଚାଲାଣ । ବର୍ଷକୁ ଭୁବନେଶ୍ୱରରେ ଅତିକମ୍‌ରେ ୬୦ଟି ବନ୍ଧୁକ ବିକ୍ରି ହେଉଥିବା ପୋଲିସ ଆଗରେ କହିଛନ୍ତି ତିନି ଅଭିଯୁକ୍ତ ।

ପ୍ରଶ୍ନ ଉଠୁଛି, ସାରା ରାଜ୍ୟରେ କେତେ ବନ୍ଧୁକ ବିକ୍ରି କରିଛନ୍ତି ଏହି ଗ୍ୟାଙ୍ଗ ? ଅପରାଧୀ ହାତରେ କେତେ ବନ୍ଧୁକ ଏବେ ବି ରହିଛି ? ସେସବୁ ହିସାବ ପୋଲିସ ପାଖରେ ଅଛି କି ନାହିଁ ? କଟକ ୪୨ ମୌଜାରେ ଏକ ବନ୍ଧୁକ କାରଖାନା ଠାବ ପରେ ବନ୍ଧୁକ କାରବାରର ଚେର ଖୋଜିଥିଲା କ୍ରାଇମବ୍ରାଞ୍ଚ STF ଏବଂ କମିଶନରେଟ ପୋଲିସ । ନିକଟରେ ଗଞ୍ଜାମରେ ଆଇନଜୀବୀଙ୍କୁ ଗୁଳି କରି ହତ୍ୟା ଘଟଣା ପରେ ସାରା ରାଜ୍ୟରେ ବନ୍ଧୁକ କାରବାରର ଲିଙ୍କ୍ ନେଇ ଖୋଳତାଡ଼ କରୁଛି ଓଡିଶା ପୋଲିସ ।