Brown Sugar Racket / କଳା ସ୍କର୍ପିଓରେ ଧଳା ଜହର ବେପାର, ମହିଳା ସାଜିଥିଲେ ମାଷ୍ଟରମାଇଣ୍ଡ

କଳା ସ୍କର୍ପିଅରେ ଚାଲିଥିଲା ଧଳା ଜହର ବେପାର । ପୁରୁଷ ନୁହେଁ ବରଂ ମହିଳା ସାଜିଥିଲେ ଧଳାଜହର ବେପାରର ମାଷ୍ଟର ମାଇଣ୍ଡ । ଗୋଟିଏ କି ଦୁଇଟି ନୁହେଁ ୫ଟି ଜିଲ୍ଲା ପୋଲିସ୍ ପାଇଁ ମହିଳା ନିଶା ମାଫିଆ ଥିଲେ ମୋଷ୍ଟ ଓ୍ବାଣ୍ଡେଡ୍ । ଆଜି ଏହି ମହିଳା ନିଶା ମାଫିଆଙ୍କ ସହ ୩ ଜଣଙ୍କୁ ଗିରଫ କରିଛି ସ୍ପେଶାଲ କ୍ରାଇମ୍ ୟୁନିଟ୍‌ । ଜଟଣୀ ଅଞ୍ଚଳରେ ଡିଲ୍‌ କରୁଥିବା ବେଳେ ପୋଲିସ୍ ଧରିଛି । ତେବେ ଏହି ନିଶା ମାଫିଆଙ୍କ ଟାର୍ଗେଟରେ ଥିଲେ ପାଠ ପଢୁଆ ଯୁବକ । ବ୍ରାଉନସୁଗାର ବିକ୍ରି ଟଙ୍କାରେ ଅୟସ ଆରାମ ଜୀବନ ବିତାଉ ଥିଲା ମହିଳା ବ୍ରାଉନସୁଗାର ବେପାରୀ । ଚଢୁ ଥିଲା ଦାମୀ ଗାଡି । ପିନ୍ଧୁଥିଲା ସୁନା ଅଳଙ୍କାର ।

ସ୍ପେଶାଲ କ୍ରାଇମ୍ ୟୁନିଟ ଗିରଫ କରିଥିବା ନିଶା ମାଫିଆମାନେ ହେଉଛନ୍ତି ଲିନା ଓରଫ ଅନିତା ପରମଗୁରୁ, ରାଜା ଓରଫ ରାଜେନ୍ଦ୍ର କୁମାର ସାହୁ ଏବଂ ସାନୁ ଓରଫ ଶିବ ପ୍ରସାଦ ଦାସ । ସେମାନଙ୍କ ନିକଟରୁ ୫୫୫ଗ୍ରାମ ବ୍ରାଉନ ସୁଗାର, ଦୁଇଟି ଦାମୀ ଗାଡି, ୫ଟି ମୋବାଇଲ ଫୋନ୍‌, ସୁନା ଅଳଙ୍କାର ଏବଂ ନଗଦ ୫ଲକ୍ଷରୁ ଅଧିକ ଟଙ୍କା ଜବତ କରିଛି ସ୍ପେଶାଲ କ୍ରାଇମ ୟୁନିଟ । ଗିରଫ ନିଶା ବେପାରୀମାନଙ୍କ ନାଁରେ କମିଶନରେଟ୍‌ ପୋଲିସ୍ ସହ ବିଭିନ୍ନ ଜିଲ୍ଲା ପୋଲିସରେ ଏକାଧିକ ମାମଲା ଥିବା ତଦନ୍ତରୁ ଜଣାପଡ଼ିଛି ।

ଅଧିକ ପଢ଼ନ୍ତୁ: ଶୁଣାଣିକୁ ଆସିଲେନି କି ସହଯୋଗ କଲେନି ପୋଲିସ ବାବୁ, ଗିରଫ ନିର୍ଦ୍ଦେଶ ଦେଲେ OHRC

ଗତ ୩ ବର୍ଷରେ ୫ କେଜି ୧୧୪ ଗ୍ରାମ୍ ବ୍ରାଉନସୁଗାର ଜବତ କରିଛି ସ୍ପେଶାଲ କ୍ରାଇମ ୟୁନିଟ । ସେହିପରି ୨୦ଟି ମାମଲାରେ ୫୪ ଜଣ ନିଶା ବେପାରୀଙ୍କୁ ମଧ୍ୟ ଗିରଫ କରାଯାଇଛି । ଏହସହ ୧୬ଟି ଚାରି ଚକିଆ, ଗୋଟିଏ ତିନି ଚକିଆ ଗାଡ଼ି ଏବଂ ୧୨ଟି ମୋଟର ସାଇକେଲ, ୬୫ଟି ମୋବାଇଲ ସହ ଗୋଟିଏ ଲାପଟପ୍‌ ଜବତ କରି ସ୍ପେଶାଲ କ୍ରାଇମ୍ ୟୁନିଟ ତଦନ୍ତ ଚଳାଇଛି ।

କେବଳ ଚଳିତ ବର୍ଷରେ ୧ କେଜି ୭୭୮ ଗ୍ରାମ୍ ବ୍ରାଉନସୁଗାର ଜବତ ସହ ୭ ଜଣ ନିଶା ବେପାରୀଙ୍କୁ ଗିରଫ କରାଯାଇଛି । ସେମାନଙ୍କ ନିକଟରୁ ଦୁଇଟି ଚାରି ଚକିଆ ଗାଡି ସହ ଦୁଇଟି ଦୁଇଚକିଆ ଗାଡି ଏବଂ ୮ଟି ମୋବାଇଲ ଜବତ କରିଛି ପୋଲିସ । ଏହାସହ ୪ଟି NDPS ମାମଲା ରୁଜୁ କରି କମିଶନରେଟ୍‌ ପୋଲିସ୍‌ର ସ୍ପେଶାଲ କ୍ରାଇମ୍ ୟୁନିଟ୍ ଖୋଳତାଡ଼ କରୁଛି ।