ପାଟନା: ଆଶା, ଭରସା, ଆଂକାକ୍ଷା... ଆଜି ମଉଳି ଯାଇଛି । ହଷ୍ଟେଲରେ ଛାଡ଼ିବାର ୫ ଦିନ ଭିତରେ ବଦଳି ଯାଇଛି ସବୁକିଛି । ମାଆ ପାଦ ତଳୁ ଧସି ଯାଇଛି ମାଟି । ମିଳିଛି କଅଁଳା ପୁଅର ମୃତଦେହ । ଏପ୍ରିଲ୍ ୧, ମାଆ ୬ ବର୍ଷର ପୁଅକୁ ନେଇ ଘରୋଇ ସ୍କୁଲ୍‌ର ହଷ୍ଟେଲ୍‌ରେ ଛାଡ଼ି ଆସିଥିଲା ।

ଆଉ ଠିକ୍ ୫ ଦିନ ପରେ ଏପ୍ରିଲ୍‌ ୬ରେ ମିଳିଲା ପୁଅର ମୃତଦେହ । ଏବେ କୁନି ପୁଅର ମୃତଦେହ ପାଖେ ବସି ମାଆ ଛାତି ପିଟି କାନ୍ଦୁଛି, ପୁଅର ଫଟୋ ଉପରେ ଟପ୍ ଟପ୍ କରି ଝରି ପଡ଼ୁଥିବା ଲୁହକୁ ପଣତ କାନିରେ ଆଦର ସହକାରେ ପୋଛି ଦେଉଛି । ମାଆ ସମସ୍ତଙ୍କୁ ଜବାବ ମାଗୁଛି, ମୋ ପୁଅର ମୃତ୍ୟୁ ପାଇଁ ଦାୟୀ କିଏ ?

ଏଥିସହ ପଢ଼ନ୍ତୁ: ହଷ୍ଟେଲରେ ଫ୍ୟାନ୍ ବୁଲୁ ନଥିବାରୁ ରାତି ଅଧରେ କୁଆଡ଼େ ପଳାଇଲେ ୨ ଦଶମ ଶ୍ରେଣୀ ଛାତ୍ର

ଏଭଳି ଅଭାବନୀୟ ଘଟଣା ଘଟିଛି ବିହାରରେ । ବିହାରର ଜେହନାବାଦ ସ୍ଥିତ ଗୁରୁକୁଳରେ ପଢ଼ିବା ଲାଗି ୫ ବର୍ଷର ଛୁଆକୁ ଛାଡ଼ିଥିଲେ ମାଆ । ଆଉ ଛୁଆକୁ ଛାଡ଼ି ଆସିବାର ୫ ଦିନ ପରେ ପୁଅର ମୃତ୍ୟୁ ଖବର ମାଆର ପଣତକାନି ଭିଜାଇ ଦେଇଛି । ଯେଉଁ ପଣତ ଛୁଆକୁ ଘୋଡ଼ାଇ ରଖୁଥିଲା ସେହି କାନି ଆଜି ଛୁଆ ପାଇଁ ନ୍ୟାୟ ଭିକ୍ଷା କରୁଛି ।

ପରିବାରର ଅଭିଯୋଗ, ୫ ବର୍ଷର ଛୁଆକୁ ଯୌନ ନିର୍ଯାତନା ଦିଆ ଯାଇଛି । ଧାରୁଆ ଅସ୍ତ୍ରରେ ଶରୀରକୁ ଗଭୀର ଆଘାତ କରାଯାଇଛି । ରାତି ସାରା ନିର୍ମମ, ଅକଥନୀୟ ଅତ୍ୟାଚାର ପରେ ସକାଳ ଆଖି ବୁଜିଛି ୫ ବର୍ଷର ଛୁଆ ।

ସାରା ରାତି ନିର୍ଯାତନା

ମୃତ ଛୁଆର ବାପା ଅଜୟ ଶର୍ମାଙ୍କ ଅଭିଯୋଗ କ୍ରମେ, ଏପ୍ରିଲ୍ ସକାଳ ପ୍ରାୟ ୫ଟା ୨୦ରେ ଫୋନ୍ ଆସିଥିଲା । ସ୍କୁଲ୍‌ର ଅଧ୍ୟକ୍ଷ ତରୁଣ କୁମାର ଫୋନ୍ କରି ପୁଅ ଗୁରୁତର ଅସୁସ୍ଥ ଥିବା ଜଣାଇଥିଲେ । ପୁଅ ଆଶୁକୁ ଏକ ଘରୋଇ ହସ୍ପିଟାଲ୍‌ରେ ଭର୍ତ୍ତି କରାଯାଇଥିବା ଜଣାଇଥିଲେ ।

ଫୋନ୍‌ର ୧୫ ମିନିଟ୍ ପରେ ଅଜୟ ମେଡିକାଲ୍‌ରେ ପହଞ୍ଚିଥିଲେ । ସେତେବେଳକୁ ଆଶୁ ଆଇସିୟୁରେ ଭର୍ତ୍ତି ହୋଇଥିବା ବେଳେ ଦେହ ସାରା କେବଳ କଟା ଦାଗ ଥିଲା । ତଣ୍ଟିରେ ଛେଦ ସହ ଯୌନାଙ୍ଗ କାଟି ଦିଆଯାଇଥଲା । ଆଖି ପତ୍ତା ନଷ୍ଟ କରି ଦିଆଯାଇଥିବା ଏତଲାରେ ଉଲ୍ଲେଖ ରହିଛି ।

ଶାରୀରିକ ନିର୍ଯାତନାରୁ ମୃତ୍ୟୁ

ଅବସ୍ଥା ଗୁରୁତର ଥିବାରୁ ଡାକ୍ତର ଆଶୁକୁ ପାଟନାର ମଲ୍ଟି-ସ୍ପେସିଆଲିଟି ହସ୍ପିଟାଲ୍ ନେବାକୁ ପରାମର୍ଶ ଦେଇଥିଲେ । ଆଉ ସ୍ଥାନାନ୍ତର ବେଳେ ଆଶୁର ମୃତ୍ୟୁ ହୋଇଛି । ଡାକ୍ତରଙ୍କ ଅନୁସାରେ, ଛୁଆକୁ ବାରମ୍ବାର ଶାରୀରିକ ନିର୍ଯାତନା ଦିଆଯାଇଛି ଏବଂ ବାରମ୍ବାର ଧାରୁଆ ଅସ୍ତ୍ରରେ ଶରୀରକୁ ଆଘାତ ପହଞ୍ଚାଇଛି । ଏପରିକି ପରିବାର ଲୋକେ ଗଣଦୁଷ୍କର୍ମ ଅଭିଯୋଗ ମଧ୍ୟ ଆଣିଛନ୍ତି ।

ଏଥିସହ ପଢ଼ନ୍ତୁ: ରାଜଧାନୀରେ ବିଭତ୍ସ ହତ୍ୟାକାଣ୍ଡ, ସ୍ତ୍ରୀର ରକ୍ତରେ ହୋଲି ଖେଳିଲା ସୈତାନ ସ୍ୱାମୀ

ତେବେ ରୋଚକ କଥା ହେଉଛି, ଆଶୁକୁ ୫ ଦିନ ତଳେ ଯେଉଁ ସ୍କୁଲ୍ ହଷ୍ଟେଲ୍‌ରେ ଛଡ଼ା ଯାଇଥିଲା । ସେଠି ପୂର୍ବୁ ତା ବଡ଼ ଭାଇ ରିଷୁ ମଧ୍ୟ ପଢ଼ୁଛି । ସମା ସ୍କୁଲ୍ ଓ ସମାନ ହଷ୍ଟେଲରେ ଦୁଇ ଭାଇ ପଢ଼ୁଥିବା ବେଳେ ସେମାନଙ୍କ ରହିବା ରୁମ୍ ଓ ମହଲା ଅଲଗା ଥିଲା । ବଡ଼ ଭାଇ ଋିଷୁ ଅନୁସାରେ, ଘଟଣା ଦିନ ଶୋଇବା ପାଇଁ ଆଶୁକୁ ସାଙ୍ଗରେ ନେଇଥିଲା କୁମାର।

ଏ ମାମଲାରେ ପୋଲିସ ଘରୋଇ ସ୍କୁଲ୍‌ର ମାଲିକ ତଥା ଅଧ୍ୟକ୍ଷ ତରୁଣ କୁମାରଙ୍କୁ ଗିରଫ କରିଛି । ଜଣେ ଶିକ୍ଷକ ଓ ଦୁଇ ଜଣ ମହିଳା ସହକର୍ମୀଙ୍କୁ ଅଟକ ରଖି ପଚରାଉଚରା କରୁଛି ପୋଲିସ । ସ୍କୁଲ୍‌ରେ ନିୟୋଜିତ ସୁରକ୍ଷାକର୍ମୀଙ୍କୁ ମଧ୍ୟ ପୋଲିସ ଜେରା କରୁଛି । ଦୁଷ୍କର୍ମ, ଶାରୀରିକ ନିର୍ଯାତନା ଏବଂ ପକ୍ସୋ ଆକ୍ଟରେ ପୋଲିସ ମାମଲା ରୁଜୁ କରି ତଦନ୍ତ ଚଳାଇଛି । ଏବେ ଉକ୍ତ ସ୍କୁଲ୍‌କୁ ପ୍ରଶାସନ ସିଲ୍ କରି ଦେଇଛି ।