Pitabas Panda Murder Mystery / ବେଙ୍ଗାଲୁରୁରୁ ଗଞ୍ଜାମର ସାର୍ପ ସୁଟର୍କୁ ଧରିଲା ପୋଲିସ, ହତ୍ୟାରେ ବ୍ୟବହୃତ ବନ୍ଧୁକ ଜବତ
Key Points
ବ୍ରହ୍ମପୁର: ଧରାପଡ଼ିଲା ପୀତବାସ ପଣ୍ଡାଙ୍କୁ ହତ୍ୟା କରିଥିବା ସାର୍ପ ସୁଟର୍ । ବ୍ରହ୍ମପୁର ପୋଲିସ ବେଙ୍ଗାଳୁରୁରୁ ଜଣେ ସାର୍ପ ସୁଟର୍ଙ୍କୁ ଧରିଥିବା ସୂଚନା ମିଳିଛି । ଖବର ଅନୁସାରେ, ସାର୍ପ ସୁଟର୍ ଜଣଙ୍କ ଗଞ୍ଜାମ ଜିଲ୍ଲାର ହୋଇଥିବା ବେଳେ ପୀତବାସ ପଣ୍ଡାଙ୍କୁ ହତ୍ୟା ପରେ ଫେରାର୍ ହୋଇ ଯାଇଥିଲା ।
ପୀତବାସଙ୍କୁ ହତ୍ୟା ପରେ ବ୍ରହ୍ମପୁର ପୋଲିସ ଏକାଧିକ ଟିମ୍ ଗଠନ କରିଥିଲା । ପଡ଼ୋଶୀ ଆନ୍ଧ୍ର ସହ ବିହାର, ପଶ୍ଚିମବଙ୍ଗ, ଦିଲ୍ଲୀ ଆଦି ୫ ରାଜ୍ୟରେ ପୋଲିସ ଚଢ଼ାଉ କରିଥିଲା । ପୋଲିସର ସ୍ଵତନ୍ତ୍ର ଟିମ୍ ବେଙ୍ଗାଲୁରୁରୁରେ ଚଢ଼ାଉ କରି ସାର୍ପ ସୁଟର୍କୁ ଧରି ବ୍ରହ୍ମପୁର ଆଣିଛି ।
ଏଥିସହ ପଢ଼ନ୍ତୁ: ପୀତବାସ ପଣ୍ଡାଙ୍କୁ ହତ୍ୟା ମାମଲା, ଜିଲ୍ଲା ବିଜେଡି ସଭାପତି ବିକ୍ରମ ପଣ୍ଡାଙ୍କୁ ଉଠାଇ ନେଲା ପୋଲିସ
ଗୁଳି କରାଯାଇଥିବା ବନ୍ଧୁକ ମଧ୍ୟ ପୋଲିସ ଜବତ କରିଥିବା ସୂଚନା ମିଳିଛି । ସେପଟେ ମଙ୍ଗଳବାର ବିଳମ୍ବିତ ରାତିରୁ ପୋଲିସ ପୂର୍ବତନ ବିଧାୟକ ତଥା ଜିଲ୍ଲା ବିଜେଡି ସଭାପତି ବିକ୍ରମ ପଣ୍ଡାଙ୍କୁ ଉଠାଇ ନେଇ ପଚରାଉଚରା କରୁଛି । ବ୍ରହ୍ମପୁର ଏସ୍ପିଙ୍କ ନେତୃତ୍ଵରେ ବିକ୍ରମ ପଣ୍ଡାଙ୍କୁ ତାଙ୍କ ବାସଭବନରୁ ପୋଲିସ ଟିମ୍ ଉଠାଇ ନେଇଥିବା ସୂଚନା ମିଳିଛି ।
ପୋଲିସ ବିକ୍ରମଙ୍କୁ ଉଠାଇ ନେବା ପରେ ବୈଦ୍ୟନାଥପୁର ଥାନାରେ ତାଙ୍କ ସମର୍ଥକଙ୍କ ଭିଡ଼ ଦେଖିବାକୁ ମିଳିଛି । ପୂର୍ବରୁ ପୂର୍ବତନ ମେୟର ଶିବ ଶଙ୍କର ଦାସଙ୍କୁ ଉଠାଇ ନେଇଥିଲା ପୋଲିସ । ଶିବ ଶଙ୍କରଙ୍କ ନାଁରେ ପୂର୍ବରୁ ଏକାଧିକ ମାମଲା ମଧ୍ୟ ରହିଛି । ବିଜେଡି କର୍ପୋରେଟର ମଳୟ ବିଷୋୟୀଙ୍କୁ ଉଠାଇ ନେଇ ପୋଲିସ ପଚରାଉଚରା କରିଥିଲା । ବିଜେଡି ନେତା ମଦନ ଦଳାଇକୁ ମଧ୍ୟ ଉଠାଇ ନେଇଛି ବ୍ରହ୍ମପୁର ପୋଲିସ ।
ଏବେ ପୋଲିସ କବ୍ଜାରେ ଜଣେ ଛାତ୍ର ନେତା ଓ ସାର୍ପ ସୁଟର ଥାନାରେ ଅଟକ ଥିବା ସୂଚନା ମିଳିଛି । ରେକି କରିଥିବା ଦୁର୍ବୃତ୍ତଙ୍କୁ ମଧ୍ୟ ପୋଲିସ ଅଟକ ରଖିଥିବା ଜଣାପଡ଼ିଛି । ବିଜେଡିର ଏକାଧିକ ନେତାଙ୍କୁ ପୋଲିସ ଉଠାଇ ନେଇ ପଚରାଉଚରା କରିବା ପରେ ରାଜନୈତିକ ଶତ୍ରୁତାରୁ ଏହି ହାଇପ୍ରୋଫାଇଲ୍ ହତ୍ୟାକାଣ୍ଡ ହୋଇଥିବା ସନ୍ଦେହ ଦୃଢ଼ୀଭୂତ ହୋଇଛି । ହେଲେ ପୋଲିସ ଏନେଇ କୌଣସି ସ୍ପଷ୍ଟ ସୂଚନା ଦେଇନାହିଁ ।
କୁମାର ପୂର୍ଣ୍ଣିମା ରାତି ପ୍ରାୟ ୧୦ଟା ସମୟରେ ପୀତବାସ ତାଙ୍କ ଚ୍ୟାମ୍ବରରେ କାମ ସାରି ସ୍କୁଟିରେ ଘରକୁ ଫେରୁଥିଲେ । ଘରଠୁ ମାତ୍ର ୧୦୦ ମିଟର ଦୂରରେ ଥିବା ବେଳେ ବାଇଖ୍ରେ ଆସି ଦୁର୍ବୃତ୍ତ ଅତି ପାଖରୁ ଗୁଳି କରିଥିଲେ ।
ଏଥିସହ ପଢ଼ନ୍ତୁ: ଲକ୍ଷ୍ମୀସାଗରରେ ସେକ୍ସ ରାକେଟ ଠାବ ଘଟଣା, ନାବାଳିକା HIV ପଜିଟିଭ୍ ପରେ ଗ୍ରାହକଙ୍କ ଠିକଣା ଖୋଜିବ ପୋଲିସ
ବ୍ରହ୍ମପୁର ପୋଲିସ ୧୦ରୁ ଅଧିକ ଜଣଙ୍କୁ ଅଟକ ରଖି ଜେରା କରୁଥିବା ବେଳେ ଆଜି ଥାନାରୁ ନେଇ ଏସ୍ପି ଅଫିସ୍ ଓ କ୍ରାଇମ୍ ସ୍ପଷ୍ଟରେ କଡ଼ା ସୁରକ୍ଷା ଦେଖିବାକୁ ମିଳିଛି । ତେଣୁ, ଆଜି ପୋଲିସ ପୀତବାସଙ୍କ ହତ୍ୟା ଉପରୁ ପରଦା ଉଠାଇବା ସହ କିଛି ଜଣଙ୍କୁ ଗିରଫ କରିବାର ସମ୍ଭାବନା ରହିଛି । ରାଜନୈତିକ ନା ବ୍ୟକ୍ତିଗତ ଓ ବୃତ୍ତିଗତ ବିବାଦକୁ ନେଇ ପୀତବାସଙ୍କୁ ହତ୍ୟା କରାଯାଇଛି ତା'ର ଗୁମର ଖୋଲିପାରେ ।
📱 Get Argus News App
✨Related Topics
Explore more stories